Breaking News; CNA, PDF-Gangaw le phu dang i bawm in SAC ralkap 30 tluk kahthah

CNA, PDF-Gangaw le phu dang i bawm in SAC ralkap 30 tluk kahthah
==============================
October 1 zing 10:00 AM hrawng Gangaw le Kalaymyo kar lam ah SAC ralkap pawl cu CNA, PDF-Gangaw le phu dangdang i bawm in an kah hna i minung 30 tluk an thi, tiah PDF-Gangaw nih an chim tiin PDFChannel nih a tial. Hi kong ah The Hakha Times nih CNF tuanvo ngeitu kan pehtlai kho rih lo.

Nihin October 1, CDF-Kalay-Kabaw-Gangaw sin ah SAC phu in CDM a tuah mi minung 3 an si. Minung pakhat cu meithal le zenkuan tling he CDM a tuah i laksawng pek a si pin ah a hawile he a himnak hmun ah kan chiahthlah cang hna, tiah cathanh an chuah.

Chin Ramkulh tel in SAC phu doh ding ah raldohnak cahmai thar kan kau cang, tiah PRA nih thanh. Chin Ramkulh, Magway Ramthen, le Sagaing Ramthen hna ramri ah hmunhma la mi People Revolution Army (PRA) nih raltuk a cawng mi an dih siaherh biachimnak ah raldo ding ah cahmai thar an kaunak kong an chim, tiah Mizzima nih a tial.

Dalaan ruang ah Sagaing Ramthen ah SAC phu nih kum 5 ngakchianu tel in minung 5 kahthah. Sagaing Ramthen, Khin-U Peng, Pintaung khua ah kum 5 ngakchianu Myo Thandar Hlaing, Ko Tun Shi, Ko Aung Oo, Ko Pu Cho le Daw Pu hna cu SAC ralkap nih meithal in an kah hna i an nunnak a liam.

Hihi Dalaan nih Pintaung khua ah PDF an um, tiin thawng pek aa palh ruang ah minung hawi zuanruahnak ngeilo mi SAC ralkap nih khuami cu an kah hna i atu bantuk in mual an liam hi a si, tiah Khit Thit Media nih a tial.

“Nan ngamh ahcun rak chuak u,” tiin NUG an zuamcawh hnu ah Nay Pyi Taw um Ralkap lei Director zung an puahhnawh. September 30 zaan ah PDF-Nay Pyi Taw le PDF phu dang i bawm in Ralkap lei Director (Director of Military Affairs) zung cu bomb an puahhnawh tiah theih a si.

SAC phu Chimnak Nawlngeitu Zaw Min Tun nih, “NUG upa pawl, nan ngamh tak ahcun nanmah pumpak rak chuak u,” tiah zuamcawhnak bia a chim in suimilaam tlawmpal ah atu bantuk in bomb an puahhnawh hna hi a si. Minung hliamh mi an um lo nain motor hring le inn vampang pawl an rawk, tiah The Irrawaddy nih a tial.

PDF-Putao nih ra seh, timhcia kan si, ti an thanh hnu ah Min Aung Hlaing a khuallam aa leet than. SAC phu lutlai Min Aung Hlaing cu Kachin Ramkulh Putao kal ding voi hnih tiang aa tim nain PDF-Putao nih rak doh ding ah timhcia kan si tiin cathanh an chuah hnu ah aa leet than, tiah theih a si.

September thla chung ah Putao kal a rak i tim i amah rungvengtu ding pawl kha KIA nih kan hmunhma chung ah nan luut kholo, an ti hna i a rak i leet. September thla dongh le October thla thokka ah kal than aa tim nain PDF-Putao nih kan kah lai an ti ruang ah aa leet than tiah PDF Channel nih a tial. Credit: The Hakha Times