Breaking News; CNA/F Camp Victoria in thawngpang a hung leng!!

CNA Ralkap Van Uk A Nunnak A Liam
=================
Sikpar 20 ah CNA miphun ralkap Van Uk (Kum 22) cu ram le miphun ca rian a ṭuan lio cuahmah ah a nunnak a liam tiah theih a si.
A dam pah lo buin a hawi pa he cycle an i ciit lio ah a tla i a nunnak a liam hi a si.

A lung a mih ruang ah a tlak hi si dawh a si tiah a hawi le sin in theih a si. CNF/CNA headquarters nih nihin Sikpar 22 ah tantakmi chungkhar ngaihchiatpi nak le upat peknak ca an chuah.

Mandalay Ah SAC Ralkap Nih Mino 4 An Thah Hna, Mandalay, Patheinkyi pengchung TB zawtnak i thlopnak sizung ah nizaan chunhnu ah SAC ralkap nih mino 4 an thah hna hnuah PDF an si tiah thawng thanhnak an tuah tiah theih a si.

November 21, chunhnu suimilam 2:00 hrawng ah Patheinkyi peng chungum TB i thlopnak sizung hmai ah mino 4 cu SAC ralkap nih karlak ceh in hmaitonh in an kah hna.

SAC ralkap nih thawngthanhnak an tuahmi ah a thimi mino 4 hna hi Mandalay pah-kah-phah Generation Z Power phu chungtel an si tiah an langhter.

Thah a tongmi 4 hna hi hriamtlaitu phu hruaitu a pahnihnak, phaisa lei tuanvo ngeitu le chungtel 2 an si tiin SAC ralkap nih cun an purhdah hna tiah theih a si.

India-Myanmar Ramri Ah Hriamthil An Tlaih Mizoram ramkulh le Chin ramkulh ramri ah Assam rifle le Champhai nawl ngeitu phufonh hna nih hriamthil an tlaih tiah theih a si. Hriamthil an tlaihnak hmun cu Mizoram le Chin ramkulh ramri Farlui Tiau pawng ah a si i, India chuak rifle 2, kuan, bomb le walkie talkie kan tlaih tiah Vanglaini nitin thawngthanhnak nih a langhter. An tlaihmi hriamthil hna cu Champhai Customs Department ah an chiah naij minung tlaih an ton le ton lo belte thawng thanhnak an tuahmi ah an langhter lo.

PDF Nu Ralkap Nih Pakokku No.14, Sang Khuabawi An Fimhlawm, Magway ramṭhen, Pakokku no.14 sang khuabawi cu PDF nu ralkap nih an fimhlawm tiah Earthquake People’s Defence Force nih cathanh an chuah. SAC ralkap kuttang ah rianṭuan in mipi cung ah phunkip in hremnak a tuahtu no.14 sang khuabawi U Myint Thein cu nihin November 22, zinglei suimilam 7:30 hrawng ah fimhlawm a tong tiah an thanhmi ah cun an langhter.

“Amah cu SAC ralkap hna he a tangti mi a si hleiah sangchung mipi hna cung ah phunkip in hremnak a tuahnak kong cu tet-te he phuannak a um caah kan fimhlawmnak hi a si” tiah Earthquake People’s Defence Force in Ko Pein nih a chim. SAC ralkap kuttang rianṭuantu khuabawi cu a umnak inn lila ah tualchung hriamtlai nu ralkap hna nih an luhhnawh i meithal in voi thum an kah hnuah a thih hi a si.

SAC ralkap kuttang rianṭuannak in chuah ding ah voi tampi cathanh chuah a si cang na in, cu nawl chuahnak zul duh loin a ummi rih mi zong hmailei ah hmalaknak tuahding a um rih tiah theihternak an tuah chih tiah theih a si.

Malaysia Ah Amah Tein A Nunnak Ai La Mi Lal Hnem Sung Ruak Myanmar Ram Ah An Kuat Lai, Malaysia, Kuala Lampur ah amah tein a nunnak ai la mi Chin nu Lal Hnem Sung ruak cu November 23 ah Mingalardone airport ah phanhpi ding in kan kuat lai tiah Malaysia um Myanmar miphun a bawmtu phu hna sin in theih a si.

“CRC, a chungkhar hna he i fonh in nihin November 22 chunhnu suimilam 2:00 (persuaran Kajang) ah thlacamnak tuah hnuah Malaysia airport in Myanmar ram Mingalardone airport ah November 23, zinglei ah a phan lai, cun a chungkhar sin ah phan ding in kuat a si lai” tiah Malaysia um Myanmar mi bawmchantu phu nih an social media ah an langhter.

Amah tein a nunnak ai latu Chin nu Mai Lal Hnem Sung hi Chin ramkulh Thantlang peng Hmawngtlang khua mi a si i, November 18 lio ah ah khan amah le amah a nunnak a rak i la. Mai Lal Nun Hmen a nunnak a liam ah hin kum 37 lawng a si rih tiah theih a si.

Hramhram in uknak a latu SAC cu kahdohnak system a tha lo mi vanlawng an cawk sual tiah SAC vanlei ralkap kong a hlathlaitu nih an chim.
SAC cu China ram in JF-17 kahdohnak vanlawng pawl cawk khawh ding in 2016 kum thok hrawng ah hnatlaknak min an rak thut i vawlei cung ah JF-17 a caw kho hmasa bik ramdang ram ah tuanbia a tial.

Hi kahdohnak vanlawng i lakhruak kahdohnak le bom a zang mi pawl a thla khotu vanlawng le a langhlat pi in vanlei a kap kho mi a si ko nain atu SAC ralkap caah cun a dawhnak lawng in mawngh sawhsawh awk a tha mi ah a cang tiah hlathlaitu pawl nih an chim.

KNU Hmunram Ah SAC Ralkap Nih Vanlawng In Bomb A Thlak Caah Tualchungmi Minung 23,000 Leng An Zam, KNU Kawthu Lay hmunram Nyaunglaypin pengkomh Brigade 3 ah SAC ralkap nih bomb an thlak caah tualchungmi minung 23,000 leng an zam, tiah KNU nih cathanh an chuah. A luancia November 12 in KNU Kyaukkyi peng le Shwe Kyin peng chung um mi SAC ralkap sakhan 3 cu KNLA le ṭangṭi phu hna nih an lak, cuti sakhan an laak khawh in SAC ralkap vanlawng nih khuate ah bomb thlaknak a tuah hi a si.

SAC ralkap nih Kyaukyi peng Bawkahtar(ဘောကထာ) khua chungah vanlawng in voi 2, Kawtharse(ကော်သာစေး) khua ah voi 3, Padekaw khua ah voi 1, Shwe Kyin peng chung Thanseih le Kyauktan (ကျောက်တန်း) khua ah voi 8 bomb an thlak, tiah KNU nih an langhter. Ralhrial mi Karen rammi hna cu atu tiang ral an hrialnak hmun in an khua ah an kir ngam rih lo, tiah theih a si.

Tuluk Ram Ah Seh Zung Pakhat A Kangh Caah Minung 36 An Nunnak A Liam, Tuluk ram ah seh zung pakhat ah mei kanghnak a chuak i, minung 36 an nunnak a liam, tiah theih a si. Nizan November 21 ah Henan ramkulh, An Yang khua seh zung pakhat ah mei kanghnak a chuak i, minung 36 an nunnak a liam pinah 2 an tlau, tiah Tuluk media nih an langhter.

A luan cia 2021 lio zong ah seh zung le thilri ser chuahnak ah meikanghnak a rak chuak i a thimi le a tlaumi an rak tam, tiah theih a si. Seh zung a kanghnak kong ah hliamhma a pumi cheukhat an um ko nain thinphan awk a um lo. Seh zung a kaangmi cu sml 7:00 chung kan phalh hnuah mei a dai, tiah bawmchantu hna nih an chim.

Seh zung a kangh ning hi hngalh a si lo caah Henan palik phu nih, seh zung ṭuanvo ngeitu hna le rianṭuantu cheu khat belte an tlaih hna i biahalnak an tuah hna, tiah theih a si. October thla lio zong ah Shan Yang khua ah gas dur pakhat a rak puak i, minung 3 an nunnak a liam i 30 leng hliamhma an rak pu cang tiah theih a si.

Tamu Ah CDM Sianginn Sayamah Pakhat SAC Ralkap Nih Thong 10 An Thlak, Sagaing ramṭhen, Tamu ah CDM sianginn sayamah pakhat cu SAC ralkap nih an tlaihnak kum khat hrawng a rauh hnu ah thong kum 10 thlak ding in bia khiahnak an tuah piak, tiah theih a si. Tamu, Nan Farlong sang um Chaungnatkyi(ချောင်းနက်ကြီး) siangniamrun sayamah Honey Sukyi Zaw cu SAC ralkap nih, nizan November 21 ah thong kum 10 thlak ding in bia an khiahpiak hi a si.

“An tlaih hnu kum 1 hrawng a rauh ah kum 10 thlak ding in bia an khiahpiak. Anih hi a fapa kum 9 he a um mi a si i, mi ralṭha ngaimi sayamah pakhat a si,” tiah Honey Sukyi Zaw a hawinu pakhat nih a chim. Kum 30 tluk siangniamrun sayamah Honey Sukyi Zaw cu SAC ralkap nih a luancia 2021 November 23 ah an rak tlaih, tiah theih a si. Tamu ah sianginn sayamah Honey Sukyi Zaw telh in thong thlak ding in bia khiaknak a tuah piaktu hi pengkomh biaceihtu Hla Oo a si, tiah Tamu khuami hna nih an chim.

Sagaing ramṭhen, Katha peng ah SAC ralkap pawl bom an puah hnawh hna i SAC ralkap a thi mi an um tiah Katha PDF nih an thanh. November 20 ah Katha peng, Chaungwa hmunhma in a rak chuak mi SAC ralkap pawl cu Muta khua pawng an phanh ni November 22 zinglei ah Muta khua in an chuak i zinglei sml 6:00am hrawng ah KIA, PDF phufonh nih bom an puah hnawh hna. Bom an puah hnawh hna hnu ah kahdohnak a chuak i SAC ralkap a thi mi an um. Phufonh lei him tein an kir kho tiah theihternak a tuah.