Thantlang Khualei Panh In Kahdohnak A Tuah Mi SAC Ralkap Pawl CNA, CDF Nih An Kham Hna
=================
CNF/CNA Headquarters a umnak Thantlang peng lei panh ding in kahdohnak a tuah mi SAC ralkap phu 2 cu CNA, CDF phufonh nih an kham hna caah SAC ralkap pawl hmai fong kho ti lo in Hakha peng chung ah an tap rih ko tiah CNF biachimnak nawl a ngeitu Salai Htet Ni nih a chim.
SAC ralkap pawl nih May thla dongh lei thawk in vanlawng bawmhnak, hriamngan bawmhnak hna he Hakha khua in Thantlang lei panh in kahdohnak an tuah i atutiang kahdohnak le kaphnih karlak entainak a um peng rih. “Hakha in an rak i thawhnak hmunhma ah atutiang kahdohnak a um peng rih.
Hnu an tolh rih lo i hmai fong ding in timhtuahnak an ngei. A hlan phu 2 in an rak kai nain atu cun phukhat ah fonh cang in cawlcanghnak an tuah. Atutiang cuka hmun ah kan kham rih ko hna. Hmai an fong kho ti lo. Hriamngan in cun an kan kah pah lengmang” tiah Salai Htet Ni nih a chim.
May 29 in tuni tiang kahdohnak chung ah CNA, CDF lei in 17 nih ram le miphun caah an nunak an pek cang i hliam a tuar mi 10 leng an um tiah a chim. SAC lei zong a thi mi an tam tiah Salai Htet Ni nih a chim. “Kan theih khawh tawk cu 30 hrawng hliamhma he sizung an phan tiah kan theih.
Cun anmah lei 30 leng an thi tiah kan theih fawn. A fiang in kan fehter khawh lo nak a ruang cu ruah a sur tuk ruang le nikhua a chiat tuk ruang ah a si. Asinain anmah lei 30 leng an thi lai tiah kan ruahdamh” tiah a chim. SAC ralkap nih Thantlang khua ah thazang tampi chap kho in Thantlang khua uk khawh ṭhan an i zuam tiah theih a si.
“Cucaah anmah lei in Thantlang ah bawmhnak an pek khawh nak hnga lo kan doh/kham lengmang nak hna hi a si” tiah a chim. SAC ralkap pawl nih a phunphun in Hakha khua ah thazang an chap i mi zapi citnak mawṭaw pawl ah khualtlawng muisam in thazang an chap lengmang caah CNF theihpinak lawng in mawṭaw le khuatlawng pawl ramchung nan lut kho cang lai tiah CNF nih June 8 ah a rak thanh.
“Fur kan phanh cang lai caah SAC ralkap pawl hmaifon ding cu an i harh ngai cang lai. Nain kahdohnak dirhmun cu chim awk a ṭhat lo caah timhcia tein kan um” tiah Salai Htet Ni nih a chim.