Breaking News: Chuncung khua ah ralhraang motor pasarih he an taang rih

Chuncung khua ah ralhraang motor pasarih he an taang rih
=================
Falam lei in a ra i zahan zaan Ramthlo ah a riak mi Ralhraang chung in cheukhat cu Chuncung khua ah an taang rih tiah kan theih. Baptist Biakinn le RC Biakinn ah umhmun an khuar i meithal zong an puah tiah khuami sin in kan theih.

“Motor pasarih an riak. Meithal zong an puah len. Ralkap tih ah a tli mi zg rak ra ko uh, zei hmanh kan in ti hna lai lo an ti” tiah Chuncung khuami pakhat nih The Hakha Post ah a chim.

Chinram tuk awk ah Kalaymyo lei in a rak kai mi ralhraang pawl nih an rak kai pah in lam cung ah a um mi khuate pawl ah inn tampi an duah, inn a bauh, thil an fir, inn zuat satil tampi an thah hna leng ah sualnak ngeilo minung pahnih zong an thah hna. Atu Chuncung khua ah a taang mi ralhraang pawl hi raal hnu kham ah a taang mi si dawh in an chim.

Falam – Hakha kar ah aa tap mi ralkap Hakha khuachung an lut. Falam le Hakha karlak ah zarhkhat tluk aa tap mi ralkap motor 40 fai, tank pahnih le JCB pakhat cu nihin zanlei sml 3: 15 tluk ah Hakha khua an lut kho cang tiah thawng kan theih. Falam in October 13 ah Hakha lei aa thawh mi ralkap cu CNA, CNDF le CDF nih lam an kham hna i an kah hna caah zarhkhat fai lampi ah an i tap.

Chin ralkap nih SAC ralhrang a tlawm bik minung 20 an thah hna, 40 renglo an hliamh hna pin ah an motor 16 an hrawhpiak hna. Ralhrang hna nih Rialti khua ah biakinn telh in inn 13 an khangh pin ah Thlanrawn khua inn 13 a khanghpiak rih hna. Cun an biakinn zong an hrawhpiak hna.

October 19 zan ah ramthlo biakinn pahnih (AG le Baptist) biakinn ah an riak i ramthlo khuami satil an thahpiak hna pin ah inn 100 tluk an baoh piak hna tiah kan theih. Ralhrang hna nih Rialti, Thlanrawn, Lungrang le Ramthlo khua hna ah mipi thil tampi an firpiak rih hna.

SAC ralkap pawl Falam in Hakha khuachung ah motor 50 hrawng, raltuknak motor 2 le Pazero motor he nihin October 20, 3:20 PM hrawng ah an lut. Hi hna pawl hi zahan October 19, Ramthlo khua Biakinn ah a riak mi an si i atu thawng kan tial lio (3:20 hrawng) hi Hakhathar 6-Lamtonnak hrawng an phan, tiah kan theih. Nihin October 20 hi Hakha khuachung le kiangkap ah bomb puah thawng pehtlai in a thang.

Uknak chuttu Min Aung Hlaing ralkap hna nih inn an bauh, thil an fir lawng si loin Sia pakhat an kah. Min Aung Hlaing hnuzul Ralhraang pawl nih Hakha le Falam kar um Falam Peng, Tlangzaar khuachung ah lut in inn an bauh pinah sia pakhat an kah thah tiah theih a si.

Khuami pakhat nih, “Khuachung an phak in inn kip ah an lut i fir an kawl. Inn an bauh. Inn chung thilri pawl an lehthal dih cikcek. Tangka le man sung thil a tlau mi tu cu fiang in theih a si rih lo. Sia pakhat zong an kah i a sa can lo in an chiah taak,” tiah a chim.

Hakha lei panh in an rat lio ah Min Aung Hlaing ralkap hna cu Hakha le Falam kar ah CNA, CDF le CNDF hna i fonh in an doh hna i an motor 16 an khanghpiak hna. A thimi zong an tam tiah kan theih. Nihin October 20 zaanlei sang in Hakha khua ah an rak lut cang i hmun cheukhat ah bomb thawng zong theih a si. Credit: The Hakha Post, The Chinland Post