Cyclon Thlichia A Fahkhawhnak Chin Le Rakhine Ramkulh Ah Myanmar Meithahnak Zung Nih Papek In Timhtuahnak An Ngei
=========
Thazaang thawng ngai mi Mocha Cyclon thlichia a fah khawhnak hmun a bik in Chin le Rakhine ramkulh ah papek in timhtuahnak ngeih a si tiah Myanmar meithahnak zung Director Thein Tun Oo nih a chim.
“Thlichia nih fak ngai in a phak khawhnak Chin ram le Rakhine ramkulh hna ah papek in caan karlak hman chom mi thilri, mi bawmhchanhnak thilri, caan karlak i dor chungnak hmunhma le a dangdang kong zong timh tuahnak kan ngei chung” tiah a chim chap. Bangladesh rili in aa thok ding Mocha Cyclon thlichia cu May 12 ni thok in suimilam 48 chungah Rakhine ramkulh Sittwe khua a phan cang lai tiah khuacaan zohnak zung nih an langh ter.
Bomb Puah Ruangah Lunghrinh In Tlaih Mi Chin Mino 4 Kum 2 Thongthlak Hnu Ah An Luat; Chin ramkulh, Paletwa khua chung Bomb puah ruangah lunghrinh in tlaih mi Chin mino 4 hna cu thong kum 2 chung an tlak hna hnu ah May 12 Sittwe thonginn chungin an luat tiah neihniam pakhat nih a chim. Thong chung in a luat mi 4 hna hi hlasak thiam, Company riantuan le cozah zung riantuan zong an tel.
Aluan cia 2021 May 28 zinglei suimilam 8 tluk ah Paletwa khua chung Economic Bank le Penguk zung hmai Bomb puahnak ruang ah mah hna pali cu lunghrinh in an rak tlaih hna hi a si.
Mah hna pali cu an tlaih hna thla 5 hnu 2021 October 12 ah an sual lo tiin an rak thlah hna nain October 13 ah Palik nih an rak tlaih than hna. 2022 April 5 ah upadi (505) ning in kum 2 thong thlak ding bia an ceih hna hnu ah Sittwe thong ah an thlak hna hi a si.
Khualtlawng Sinah Tangka Haltu SAC Ralhrang Drone Bomb Thlakhnawhnak In 6 An Thi; 7 Hliam An Tuar; Sagaing ramthen, Watlat peng Yua-tharkyi khua lam 4 aa tonnak hmun pakhat ah khualtlawng hna sin ah tangka hal lengmang tu SAC ralhrang hna cu PDF nih Drone Bomb an thlak hnawh hna caah ralhrang 6 an thi tiah kan theih.
May 11 zing suimilam 9:45 ah SAC ralhrang 15 tluk cu khualtlawng hna sin ah tangka hal dingin a buin an i timhtuah lio ah Drone bomb an thlak hnawh hna hi a si.
“Tangka hal dingin ralhrang 15 hna cu a bu in an um lio ah bomb 2 kan thlak hnawh hna, cuchung ah 13 an i teng nain 6 cu an thi, 7 hliam an tuar”tiah Myingyan PDF Zero Battalion 7 an hruaitu pa nih a chim.
“Ralhrang a thimi le hliam tuar hna cu a pawngkam tlakrawk inn ah an kal pi hna i inn ka zong hrenh, an aukhuan thawng zong theih an si i an thi chuak mi zong tampi hmuh khawh a si” tiah a cunglei upa nih a chim. Hi kahdohnak cu tualchung PDF tangti phu 6 an i bawm tiah kan theih.
Myaing Peng SAC Ralhrang Riahcaw Lak Kalmi Motor An Khangh; Umhmun An Khuarnak Bomb Puahhnawhnak In Ralhrang 1 A Thi ; Magway ramthen Myaing peng, Thar-yet-kaan khua umhmun khuar mi SAC ralhrang riahcaw lak ding a kal mi motor le an i thutnak khur cu PDF nih Bomb an puah hnawh hna caah an motor an khangh dih pin ah ralhrang 1 an thi tiah Myaing Pah-kah-phah tuanvo ngeitu pakhat nih a chim.
May 11 zinglei suimilam 7 tluk ah Thar-yet-kaan khua ralhrang umhmun an khuarnak khur cu bomb puahhnawh in Pyusaw-hti pakhat a thi i tampi hliam an tuar. “Mah pin ah Pyusaw-hti sakhan in Pakkoku lei ah riahcaw lak a kal mi ralhrang hna cu lam pi Bomb kan puah hnawh than hna caah an motor a rawk i Pyusaw-hti tampi hliamfak an tuar. Hliam tuar mi hna zong Drone bomb 5 kan thlak hnawh than hna. An motor rawk ni zong kan khangh piak dih hna i a thimi le hliamtuar zat fiangin theih khawh an si rih lo.’tiah a cunglei upa nih a chim. Credite; Lungmili Post