Breaking News: Chief Minister Phyu Myint Thein Le Dr. Zaw Myint Maung Thinpang Ngai A Si

Chief Minister Phyu Myint Thein Le Dr. Zaw Myint Maung Cu An Tlaih Than Cang Hna
==================
Yangon ramthen Chief Minister Phyu Myint Thein le Mandalay ramthen Chief Minister Dr. Zaw Myint Maung hna cu inn thong ah an chiah hna hnu ah hmun dang ah an thial than cang hna tiah thawngpang a leng mi cu a dikmi thawng a si ko tiah NLD lei hruaitu pawl nih an fekter hi a si. Mandalay ramthen Chief Minister Dr. Zaw Myint Maung cu nihin Hluttaw palai pawl umnak inn ah chungkhar he an ummi hna cu nihin ah an auh i hmundang ah an thial tiah theih a si.

Dr. Zaw Myint Maung chungkhar hna cu an umnak thing ah an chiah ko hna i, amah Dr. Zaw Myint Maung lawng in an auh tiah thawng theih a si. Dr. Zaw Myint Maung hi a ngandamnak lei a tha lo, tiah theih chap a si. Yangon ramthen Chief Minister Phyu Myint Thein cu nizan tini ah khan an auh cang. NLD party lei in chimhnak ngeihtu Dr. Myo Ngunt cu aana ting ni February 1, 2021 thawk in an tlaih cang i, nihin ni tiang pehtlaih khawh a si lo tiah chungkhar lei nih an chim. Cucaah, chungkhar lei nih an chim ning ahcun a din tawnmi sii-ai zong a ken lo caah kan lungre a theih tuk hringhran tiah media sinah an chim.

Relchap, Kawlram ummi kan unau hna lam nan zawhnak tete photos kan hmuh le lung hmuituk! Kan mipum in kan itel khawh lo hmanh ah kan thinlung le kan thlacamnak nakin kan idirpi peng hna. Abikin Yangon ummi chinmi hna biataktein rak cawlcang cio ulaw. Nanmah le nanmah hna ikhawm kho dih ulaw group in kal kho ve ulaw a ṭha tuk hnga. Tam taktak in tel khawh izuam ulaw. A caan lio bak asi. Atanṭim lawng siloin a dih dongh tiang teinak kan hmuh hlan tiang thazaang chuak in ṭaang hna usih! Lungrualtein hmailei kalṭi hna usih! Kan tei hrimhrim lai. Chinmi kan min ngei ve usih! Hmailei kan fale ca ruahchih in lungdong lo tein thinlung, thazaang le thlacam nakin kan ṭan ahcun Bawipa nih teinak a kan pek lai. Bawipa cu kan teinak asi.

Atanṭim tiang lawng asilai phaan a um. Kawlram caah U.S hi rinhchan awk a ṭha lo. Ram dang zong rinhchan awk an ṭha lo. U.N zong rinhchan awk a ṭha lo. Statement an chuahmi tiang lawng asi ko lai. Cu pinlei ah zeipipa an tuah kho lai lo. Aruang cu Ralkap nih ralṭhatein hi tluk an tuah ngamnak hi a hnulei ah dirpitu China 🇨🇳 le Russia 🇷🇺 an um caah asi. Hi thil a chuah ngamnak hi an mah ram hninh ruangah asi. Ralkap cu a lungkhong tukmi an si. 1988 le 2007 kum hmanhah thisen tamtuk a luang nain U.S siseh ram dang siseh zeihmanh an tuah kho lo. CNF/A zonghi rinhchan awk tlak in an um lo. Ralkap he ihawikom dingin le idaw dingin minthumi an si. Cucaah civil disobedience, umkheng tum le lamzawh hi teinak kan hmuh hlan tiang kalpi aherh. A kan tlaih zongah ngol lo tein kum dih tiang zong kan tuah aherh.

Cucaah ram chung um mipi nih ram dawtnak taktak thinlung le hmailei fale kong ruahnak thinlung taktak he adih tiang thazaang chuah hi aherh bik ko. Kan ibochan ko hna. Kan doh vekvek ahcun taksa in kan tuar hau ko. Chawva in kan tuar hau ko. Pawcawmnak in kan tuar hau ko. Fimnak zong kan sungh hau ko. Cun thisen le nunnak zong hi a luang i a sungh ahau kho. Ram chungmi nan biapituk! Kaam lo chuncha bangin dir caan asi. Ramdang ummi zong nih kanmah le ti khawh tawk cio in adih dongh tiang duhlonak langter hna usih! CNLD, USDP, NLD, CNP, Hakha, Falam tibantuk iti caan asilo. Lungrual hi kan thazaang hrampi asi. Thlacam hi kan teinak hriamnaam asi. Kan kawlram caah thazaang chuah hna usih! Thlacam in Bawipa sin ah Mitthli he ṭap hna usih! Bawipa kut ah a ummi asi. Credit: James Van Nei Lian