Breaking News: Chelsea FC Fan Caah Thawngpang Chia Taktak A Si Ko!

Breaking News: Chelsea FC Fan Caah Thawngpang Chia Taktak A Si Ko!
==========
Chelsea FC cu a neitu Roman Abramovitsj nih mi a pek cang hna. Anih hi 2003 in Chelsea a rak cawk le vawleicung a nganbik club cazin ah a phanhter khawh. Russia + Israel hrin a si. Putin he naihniam ngaimi a rak si caah UK nih tutan i Ukraine kong ah a sual an kawl ve i tthawl tiang an i tim cuahmah.

Cun a siipuazi zong hrawh ding a duhmi an tampi. Mah a si caah Chelsea cu The Chelsea FC Foundation sinah a pek. Hmailei ah Chelsea hi amah ta si lai maw ti a fiang rih lo, a ruang cu UK parlament ah Chelsea neitu a si ti awk si lo tiah a aupitu sn um. Thaizing hi Liverpool he final an kai la. By- Hlawnching Bawimang Lian

Russia nih Ukraine a Luh Hnawh Zingka ah Khupbil in Thla a Cammi Ukraine Khrihfa pawl. February 24 zingka, Ukraine ram Kharkiv khuami pawl cu Russia bomb thawngpang nih ihkhun cung in a hlauh hna. Cu lio ah cun innleng (Town Square) ah khupbil in Pathian sin ah thla a cammi mibu fate zong an um ve.

Live in thawngpang a chim liomi CNN Journalist Clarissa Ward nih thla a cammi pawl cu a hmuh hna tik ah a chim liomi thawngpang a ngol i, “Hikahin khupbil in thla an cam hna. Mi lung a tawng tuk hringhran,” tiah a chim.
Ukraine rammi 90% hrawng hi Khrihfa an si hna.

Russia nih atu bantuk in aruang um loin a hun luh hnawh tik ah Ukraine biaknak lei upate nih Psalm 31 rel in Pathian sin bawmh hal thlacam cio ding in rammi pawl an forhfial. Ukrainian Bible Society zong nih, “Kan ram nih kan tonmi nganfahnak hi kan tuarpi ve hram u. Pathian sin thlacamnak in kan bawm cio u,” tiah Twitter ah thlacam bawmh halnak an ttial.

Ukraine ralkap nih “Russia ralkap 2800 hrawng an kan thah cang hna! Raltuknak mawtaw 516, raltuknak vanlawng 10 le raltuknak helicopter 7 kan hrawh piak cang ee”, an ti. Russia cu an i ngaichih pah cang rua dah ka ti. Cei ve ko hna seh!

Ramchung Mi Luhhnawh Hmangtu Russia Ralkap Tank (500) Tluk Cu Kan Hrawhpiak Khawh Tiah Ukraine Nih Cathanh Chuah!
Ukraine ramchung ah Russia i luhhnawh kahdohnak nikhat chung Febuary 25, anmah ram zanlei sml 3:00 tiangah Russia ralkap 2800 lengkai an thi kho i, Russia ralkap hmanmi tank 500 lengkai zong kan hrawhpiak kho tiah Ukraine ramchung runvennak minister lutlaibik changtu nih cathanh a chuah.

Kum 2022 Febuary 24 thawkin Febuary 25 anmah ramchung zanlei sml 3:00 tiangah ke ralkap, vanlawng ralkap hmangin luhhnawh in kahdohnak tuahtu Russia ralkap 2800 lengkai an thi kho cang i, kuanfang khamnak motor 516, tank 80, raltuknak vanlawng 10, helikopter 7, tiin kan hrawhpiak khawh cang tiah cathanh an chuah hi a si.

Atu caan karlak ah runvennak vuanci changtu nih Russia ralkap a thimi zat le an seh thilri a rawkmi zat lawng cathanh an chuahmi a si i, Ukraine leikap ah Febuary 24 nikhat lawngah a thimi 137 le hliam tuartu 316 zat lawng cathanh an chuah rih.

Ukraine ramchung ah luhhnawh in kahdohnak ah an hmanmi vanlawng le helikopter an kah thlakpiak hna tikah vanlawng cheukhat cu minung umnak inn cungah an tlak ruangah inn zong mei nih a kaangnak kong zong Ukraine ramchung mei thattu phu nih cathanh an chuah ve. Luhhnawhnak le kahdohnak tuahtu Russia ralkap a thimi an tam bangin tlaihmi zong an um i, an tlaihmi hna cu Ukraine nih an hrenh chung rih hna tiah theih a si.

Russia leikap nih vawlei in siseh vanlawng hmangin siseh pehzulh in kahdohnak a tuahmi cungah Ukraine ralkap hna nih hmailei caah ral an do i, raltha taktakin an kahdoh caah Ukraine ralkap cungah upatnak kan pek hna tiah runvennak vuanci nih cathanh a chuah.

Zeiruangah Russia Nih Ukraine A Tuk Ngam? Biahmaithi; Democrats President an si ah, Republican president an si ah, US ral ngan bik, Russia nih an ngiat bikmi cu zei bantuk ramdang, foreign policy dah a kalpi? US President hi zeibantuk lungput a ngeimi dah a si? mi derthawm a si maw? mi lung hak dah a si? A chimning bantuk in a tuah taktak mi a si maw? timi hi a tlangpi in an ngiat bikmi a si.

Democrats President Derthawhnak; Democrats President an chuah caan paoh US hi ramdang kongah an derthawn, an nem i, ramdang nih US an upatnak a zor deuh, An chim bantuk in an tuah lo tik ah US a huatu Russia, China le Muslim ram pawl nih an raltha. Mah lio caan cu caan tha la riangmang in, an duhmi thil an tuah tawn. Mah cu chan tuanbia zoh in theih khawh a si. Tutan Ukraine raltuk a tonnak hi Democrats in President a chuakmi hna, Bill Clinton, Obama le Biden an derthawn ruangah a chuakmi theipar an si kan tiah cun kan palh thlu lai lo.

Bill Clinton Nih Ukraine Nuclear Russia Ah A Upter Hna. Soviet Union a thenhmal lio ah Bill Clinton cu US president a rak si. Ukraine ram nih Soviet Union sin in Nuclear hriamnam tampi an co caah US le Russia chim lo ah nuclear hriamnam tam bik ngeimi ram ah a chuah colh. Nuclear hriamnam 5000 renglo an ngei ti a si. (Japan ram Hiroshima khua bom an thlakmi nak let 10 an ngei ti a si. Ref: New York Times)

President Bill Clinton nih Ukraine cozah nih Nuclear hriamnam an ngeih dingmi a rak duh lo. Mah policy cu Republican pawl nih an rak soisel ngaimi a si. Asinain Democrats party Congressman pawl nih Bill Clinton cu an rak dirkamh caah Ukraine cu nuclear hriamnam ngei kho lo ding in Russia he deal an rak tuahter hna.

Ukraine, Russia, US le United Kingdom Hnathlaknak; 1992 ah President Bill Clinton forhfialnak in Ukraine nih Russia he Lisbon Protocol Agreement” timi minsen an thut. Ukraine Parliament chungtel cheukhat nih nuclear hriamnam vialte Russia kut I up dih ding cu an rak duh lo. Ukraine kan himnak a hnursuan te lai tiah an rak chim cang. Asinain Russia President Putin le President Bill Clinton nih Ukraine cu faak tuk in an rak hnek hna.

1994 ah United Kingdom le USA nih Ukraine ram humhimnak tuanvo vialte kan laak laak ve lai timi biakamnak in Ukraine cozah nih an nuclear hriamnam vialte cu Russia kut ah an rak up dihnak a si. (Mah hnatlaknak ah hin Ukraine himnak caah a herh ahcun raltuk piak ding, hriamnam thazang, phaisa thazang, ralkap training le a dangdang bawmhnak tampi a tel ti a si.)

Mah hnatlaknak an tuahmi cu Budapest Memorandum on Security Assurances” ti zongah auhmi a si. Mah hnatlaknak minsen an thutmi cu Russia caah teinak le hlawhtlinnak mangtara a rak si. Ukraine nih hin mah lio ah Nuclear hriamnam zeimawzet rak I chiah kho sehlaw atu bantuk Russia nih duh poah in a luh hnawh ngam hrimhrim lai lo ti a si.

A Biakam A Fek Lomi Obama; Obama President an thim I, kum 2009 lio zongah Ukraine ram himnak laak dingmi hnatlanak “Budapest Memorandum on Security Assurances” cu President Obama nih pehzulh in fehternak a tuah. Asinain 2014 kum ah Ukraine ram, Crimea ramthen cu Russia ralkap nih an luhhnawh I, an beuh. Asinain Obama nih Ukraine ram humhimnak cu a ven lo pin ah, Russia cu hriamnam in zeihmanh lehrulhhnak a tuah duh lo.

Sipuazi in dantatnak lawng a tuah caah Russia President Putin cu an zeihmanh a poi lo. 2009 “Buddpest Memorandum on Security Assuranes” timi Ukraine he hnatlaknak an tuahmi vialte cu Presdient Obama nih pakhat hmanh a zul duh ti lo. Ukraine ven ding timi zong a veng duh ti lo. Russia cozah phaisa freezing tuah le khualtlawnnak phih kharnak (travel restrictions) lawng a tuah kawhmi a si.

Obama le Biden Policy Nih Putin A Thawnter; Obama President a si lio le, Joe Biden Vice President a si lio ah in Keystone XL pipeline timi hi an rak doh zungzal I, an rak phih khar zungzal mi a si. Thli le Solar in energy kan chuah lai an ti caah phungle lam tampi an rak ser. Natural gas a thar kawl le cawh lo ding le cawh ciami zong cawh ti lo ding timi phung an chuah. Mah policy kha President Biden nih a pehzulh than. Mah ruangah coal-fired power plants riantuanmi, natural gas riantuanmi minung 40000 renglo rian ngei lo ah an i chuah colh. Rili kam i a chuakmi natural gas, lungmeihol le oil vialte cu chuah ti loin ngol a si.

Mah ruangah US sipuazi tampi thanchonak tampi a hrawh hlei ah mah policy nih cun Europe ram le ramdang tampi nih US ram ah Natural gas le lungmeihol caw ti loin Russia ram ah natural gas le lungmeihol an cawk cang. Europe ram nih an herhmi natural gas 40% cu Russia ram ah an cawk cang caah Europe ram tampi cu Russia ram ah an I hngatchan cang. Mah nih cun Russia rampi cu a thawnter. Europe ram tampi nih Russia natural gas an hman cang caah Russia cu duh paoh in an dir-onh ngam ti lo, a rengh ngam ti lo. Sanction zong an tuah ngam ti lo.

President Biden Nih Taliban Tapung A Tei Lo Ruangah; President Biden nih Afghanistan cozah himnak a pek khawh lo pin ah an himnak pek zong a duh hna lo. Taliban tapung nih zarh hnih chungah Afghan cozah an thlak. President Biden nih US ralkap zong ningcang tein Afghanistan in a chuahpi kho hna lo, Taliban tapung nih ui le ar dawi in an dawi hna tik ah Russia President Putin nih US President Biden le US ralkap an derthawmnak a hmuh tik ah upatnak le tihzahnak a ngei kho ti lo. A ngamh tuk cang hna. Mah vialte cu President Putin nih caantha laak riangmang in Ukraine hi a nam colhmi a si lai tiah an zumh bikmi cu a si.

Biafunnak; Ukraine nih tutan an tonmi nganfahnak hi hi Democrats President a rak simi hna, Bill Clinton, Obama le Joe Biden nih ramdang kongah an rak i palhmi Policy ruangah a chuakmi theipar an tonmi a si. Biden policy nih Taiwan zong a hnursuan khawhmi a si. US aha thio ahcun ramdang cu an cumpi cang’ timi hi si dawh ngai a si. US cozah nih ramdang kong hi an thlakmi policy an i palh ahcun ramdang faak tuk in a kan hnursuan timi hi tutan Ukraine kong in fiang tein kan hmuh khawhmi a si. Minung tam deuh nih an hngalh khawhnak hnga share cio te ulaw. Credit: Salai Lairamthang