Paletwa Peng Cu Pengkomh Pakhat In Kan Ser Cang — IKACC
====================
Chin ramkulh, Paletwa peng cu mah tein aa ukmi pengkomh pakhat in kan ser i, pengkomh ukhruainak phu cu Paletwa ukhruainak pengkomh Council in rian kan ṭuan lai, tiah Interim Khumi Affairs Consultative Council(IKACC) nih nihin May 10 ah cathanh an chuah.
CDF-Paletwa le IKACC nih a luancia March 22 in 24 tiang a voikhatnak Coference meeitng an rak tuahmi ah atu bantukin biachahnak an rak tuah, tiah theih a si. Cun, dohthlennak caan chung ah Chin ramkulh chung um peng dang hna he pehtlaih rianṭuannak ah fawi zaang deuh ding in pengkhat, pengkomh khat in rian an ṭuan cang lai, tiah an langhter.
R.I.P: Taungsalone Kahdohnak Ah KNDF Thiamhlei Commando Pakhat Telh In Pathum An Nunnak Liam! Shan ramkulh thlanglei Pinlaung peng, Taungsalone khua kahdohnak ah KNDF Battalion 8 in thiamhlei ralkap pakhat le Battalion 11 in ralkap pahnih nih ram le miphun ca ah an nunnak an pek, tiah theih a si.Thiamhlei ralkap Tatsu(တပ်စု) hruaitu pa hi May 8 ah a nunnak a liam i a dang ralkap pahnih hi May 3 kahdohnak ah an nunnak a liam, tiah KNDF-BO8 nih cathanh an chuah. Pinlaung peng le Pekhon peng ramri ah SAC ralkap le PDF cu February thla dongh in kahdohnak an thawk i May thla tiang pehtlai in an i kap, tiah theih a si.
April thla chung Shan-Karenni ramri Pekhon le Pinlaung peng kahdohnak voi 50 chung ah SAC ralkap 70 an thi i, hriamngan zun 7, meithal zun 52 le zen-kuan tam ngai kan lak, tiah KNDF nih cathanh an chuah. February thla in kahdohnak a chuah ruangah Taungmeythin, Lonepin, Pinpone, Nanneng le Taungsalone khuami 10,000 tluk cu ralhrial in an zam, tiah theih a si.
Hakha Ah Lai Baibal Thiang Uk 2,000 Leng A Phan Cang; Chin ramkulh, Hakha ah Lai Baibal Thiang cauk uk 2,000 leng cu CACC ah a phan cang, tiah theih a si. Lai Baibal Thiang cauk hi Korea ram ah uk 20,000 kan namter. Cu chungah uk 2084 hi Hakha a phan. Lam le sul harnak ruangah a dang hi a phan kho rih lo. A rauh hlan ah a phan colh ko lai, tiah CACC caantling rianṭuantu pakhat nih The Chin Post ah a chim.
Nihin May 10 zinglei ah thlacamnak le lawmhnak bia kan chim hnu ah Lai Baibal Thiang cauk cu zuar hram kan thawk. Korea ah uk 20,000 kan nam i uk 5,000 hrawng hi ramdang ah a kal ding a si. A taangmi hi ramchung ca ah a si, tiah a chim.
Lai Baibal Thiang cauk hi phun 3 in nam a sinain phun 2 lawng Hakha a phan kho rih, tiah theih a si. Zipper a nganmi hi ukkhat ah Kyats 31,000 le Zipper a hmemi hi ukkhat ah 26,000 in CACC Cauk Dawr ah an zuar, tiah theih a si. Lai Baibal Thiang Cauk cu nihin May 10 zinglei lawng in CACC nih zuar hram an thawk nain nikhat chung lawng ah uk 300-400 kar an zuar manh, tiah theih a si. Credite; The Chin Post
Kahdohnak Ruang Ah Hakha Khuapi Ah Aa Dormi Mipi 2,500 Leng An Phan; Chin ramkulh chung ah kahdohnak faak deuh in a chuah hnu in Hakha khuapi ah aa dormi mipi hna cu 2,546 tiang an phan cang, tiah IDP(Hakha) in ṭuanvo ngeitu pakhat nih a chim.
A luancia thla 2 lio khan ralhrialmi an karh ngaingai. Atam deuh cu Sagaing ramṭhen, Kalaymyo le Gangaw, Hakha karlak um khuate hi an si. Atu zong Hakha-Kalay karlak khuate hna cu SAC ralhrang nih rallam an sial lengmang caah tualchungmi hna nih khua chuahtak in ral an hrial i, Chin Christian University (CCU) Hakha ah ralhrial chungkhar 34, milu in 111 an um cang.
Cupin ah “Hakha IDP camp ah umlem lo in khuapi chung ah aa dormi chungkhar 673, milu in 2546 an si cang i, cu hna zong cu kan si khawh chung in kan zohkhenh hna. Kahdohnak pehtlaiin a chuah ahcun mahnak hin ralhrialmi an karh rih khomen, chimkhawh a si lo” tiah IDP(Hakha) in ṭuanvo ngeitu pakhat nih a chim.
CCU camp ah hmunkip in aa rak i dormi hna nih an herhbaumi cu ṭuanvo ngeitu hna nih kan sikhawh chung in kan bawmhchanh hna, an herhbaunak dihlak in kan bawmhchanh khawh dih hna lo hmanh ah zatuak in 75% cu kan bawmhchanh khawh ko hna lai, ti ah ruah channak kan ngei. Khuapi chung ah inn hlang in aa dormi hna le Biaknak lei inn ah caan karlak aa dormi hna nih an herhbeumi tu cu bawmhchanhnak ah kan thazaang a tlawm deuh rih.
Facang, chiti, cite tinbantuk a bik in an herhmi a dang dang hna zong bawmhchanh kho ding in kan i zuam rih lai, tiah IDP(Hakha) in ṭuanvo ngeitu pakhat nih a chim chih.
Hakha khuapi ah inn hlang in khua a sami ralhrial mipi hna zong anmah le umnak he naihniam mi biaknak lei upa hna le an umnak sangmi hna nih bawmhnak pek in an si khawh chung an zohkhengh hna, tiah theih a si. Credite; Lungmili Post