Mindat Kahdohnak Ah SAC Ralhrang 1 Thi, 2 Hliam An Tuar, Mino Hna Hmundang Le Ramdang Chuah Lo Dingin Nawl An Chuah __CDF-Mindat
=========
Chin ramkulh, Mindat khuapi nichuah lei ah SAC ralhrang nih umhmun an khuarnak Gate cu Chin Defence Force-Mindat nih 2023, June 11 le 16 ah luhhnawh in an kah hna caah SAC ralhrang 1 a thi, tiah CDF-Mindat nih June 18 ah cathanh an chuah.
A luancia June 13 zong ah Mindat khuapi nichuah lei um SAC ralhrang Gate cu kan kah ṭhan i, ralhrang lei hliam a pimi 2 an si, tiah an langhter. SAC ralhrang nih duh paoh in Mindat peng khuate hna ah ummi sualnak ngeilo mipi hna tinh chih in an kahdoh hna lio ah mah miphun le mah ram zong venghim lo in hmundang le ram dang ah a chuakmi mino an tam ngai cang.
Cucaah kum 26 in 35 karlak mino hna cu CDF-Mindat nawlpeknak tel loin hmun dang le ram dang ah chuahnak nawl kan in pe ti hna lo, tiah CDF-Mindat nih cathanh an chuahmi ah an langhter chih.
Kalewa Peng Kahdohnak Ah Motor 3 Telh In Hriamthil Tam Ngai Mipi Ralkap Nih An Lak__NUG; Sagaing ramṭhen, Kalewa peng ah kahdohnak a chuak i, mipi ralkap nih ralhrang lei Faw-motor 3 telh in hriamthil tam ngai zong an laak khawh chih, tiah NUG cozah in runvennak vuanci nih May 17 ah cathanh a chuah.
June 16, nizan ah Kalewa khuapi in Minkin (မင်းကင်း) peng ah Faw-motor 3 he hriamthil tam ngai le eidin phurtu Khah-mah-yiah 362 in SAC ralhrang, palik le pyusawhti (an zapi thazaang 130 hrawng) cu mipi ralkap Kalay pengkomh Battalion No.9 nih an kahdoh hna, tiah an langhter.
Kahdohnak ah ralhrang lei Faw-motor 2 an khangh piak khawh hna pinah MA-11 zuun 2, G-3 zuun 2, MA-11 kuan bawm 3, G-3 kuan bawm 6, Maithal saumi zuun 1, MA-7 60 MM zuun 1, 60 MM bomb kuan pawl, RPG kuan 5, 38 Webly Wesson zuun 1, Jammer zuun 1, M-14 lamhmi bomb 2, kut cheh bomb 30 leng le hriamthil dang tam ngai zong mipi ralkap nih an laak khawh chih, tiah cathanh an chuahmi in kan theih.
Hi kahdohnak ah ralhrang lei thimi le hliam a pumi kan hlat cuahmah lio a si i, mipi ralkap lei in nunnak liammi le hliam a tuarmi um loin hnu lei an tolh ṭhan kho, tiah NUG cozah nih cathanh a chuahmi ah a langhter chih. Crd; Lungmili Post