CDF-Hakha Min Ningcang Lo In Pumpak Miaknak Caah A Hmangmi Pawl Ralrin Peknak
=========
Chin ramkulh, Hakha khuapi hrambunh Chinland Defense Force-Hakha nih CDF-Hakha min in mah pumpak hlawknak caah tangka a haltu hna le CDF-Hakha Council nih mipi ṭhanchonak caah timhlamhnak a ngeihmi hna cu ningcang lo in mah pumpak miaknak caah a tuahmi an um lengmang caah ralrin peknak cathanh an chuah.
Atu bantuk in a tuahtu hna cu CDF-Hakha nih dantat ding in timhlamhnak a ngeih cuahmah liopi asi i, zumh sual ruang ah siseh, ṭihphan ruang ah siseh, dehhlen khawh sualmi mipi hna cu CDF-Hakha nih ngaihthiam halnak zong an tuah chih.
CDF-Hakha Council nih nihin tiang mipi hna sinah ningcang lo in minthutmi ca he bawmhhalnak le tangka khawlhnak tuahmi a um lo, tiah mipi sin ah theihternak an tuahchih. Mipi hna nih bawmhnak nan pekmi kan hmuhmi minsenthut catlap (Receipt) zong cdfcounciloffice2022@gmail.com ah kuat in a dikmi a sinak cu fehternak kan tuahkhawh.
Cucaah CDF-Hakha/CDF-Hakha Council he aa pehtlaimi rian pawl ningcang lo in a tuahtu hna cu fakpi in dantatnak kan in tuah hna lai. Atu bantuk a tuahtu pawl fakpi in datatnak kan tuahkhawh hnanak ding ah mipi hna zong nih nan kan dirpinak lai kan in nawl hna, tiah June 12, cathanh an chuahmi ah an langhter chih.
Kahdohnak Voi 500 A Chuahnak Hmun Ah SAC Ralhrang 449 An Thi, Mipi Ralkap 41 An Nunnak A Liam__NUG; National Unity Government of Myanmar (NUG) nih ralram hmun No.1 ah a chiahnak hmun hna simi Sagaing ramṭhen, Magway ramṭhen , Mandalay ramṭhen le Shan ramkulh chaklei hna ah May thla chung lawng ah kahdohnak voi 500 a chuak. Cu kahdohnak ah SAC ralhrang lei 449 an thi, tiah NUG cozah in runvennak vuanci nih cathanh a chuah.
Cu kahdohnak ah SAC ralhrang lei in hliam a pumi 681 an si. Mipi ralkap in 41 nih ram le miphun caah an nunnak a pek i, 113 nih hliamhma an tuar. SAC ralhrang sin in hriamthil phun 24 telh in hriamnam dang tam ngai zong mipi ralkap PDF nih an laak chih khawh, tiah June 12, cathanh a chuahmi ah a langhter. Kahdohnak hna cu No.1 Military Region Commander kuttang um PDF, Pah-kah-phah le EROs hna i bawm in an si, tiah cathanh a chuahmi ah a langhter chih.
Breaking News! Mese Khuapi Palik Sakhan Pakhat Mipi Ralkap Nih An Lak, SAC Ralhrang Thimi An Tam Caah Cunglei In Bomb A Thlak; Karenni ramkulh, Mese khuapi palik sakhan cu mipi vengtu ralkap hna nih luhhnawh in an kah caah palik bawi (Sakhan hmu) telh in SAC ralhrang lei a thimi an tam ngai, tiah tualchung mipi nih an chim.
June 13, zinglei suimilam 4:50 tluk ah mipi ralkap ṭangṭi phufonh nih luhhnawh in an kah caah an sakhan an laak khawh. Cu hnu ah mipi ralkap hnu lei an tolh ṭhan i, SAC ralhrang nih helicopter in an kah. Cu pinah hriamngan hna hmang in voi 30 renglo Mese khuapi chung an kah, tiah tualchung mipi nih Khit Thit ah an chim.
“Atu hi helicopter pawl in an hel cuahmah lio a si. An sakhan cu an lakpiak cang hna i, palik bawi zong a thi an ti. Hriamthil zeimawzat zong mipi ralkap nih an laak chih khawh. SAC ralhrang nih tlang cung in khuapi chung ah hriamngan voi tam ngai an kah caah mipi hna cu inn tang le khur chung ah kan i thup hna” tiah tualchung mipi pakhat nih a chim ve. Crd;Lungmili Post