Breaking News; Bungtla Electric Sehzung Bomb in an Puah

Bungtla Electric Sehzung Bomb in an Puah
———-
Matupi peng SAC ralhrang nih an hman bikmi Bungtla Electric sehzung cu nihin chun ah CDF nih bomb in an puah, tiah thawng kan theih. Bungtla Electric sehzung hi January 2006 ah an rak sermi a si i, Matupi hrambunh SAC ralhrang bu no. 140 nih abikin an hmanmi a si.

Khuami pakhat nih, “Nihin chun ah khan bomb in an puah hnawh. Matupi ralkap pawl zong bomb puahnak hmun lei ah an kal. Cun, District zung tang ah hmun a khuarmi ralkap nih a langtlang in bomb zong an kah len,” tiah a chim.

Rakhine ramkulh le Chin ramkulh runvennak ttuanvo a latu SAC ralhrang bu Western Command Center hi Rakhine ramkulh, Ann khua ah a ummi Bungtla Electric sehzung le Ann peng ah a ummi Electric sehzung pakhat hi anmah nih an hman bikmi an si.

CNF le PDF-Gangaw nih SAC Ralhrang Motor Bomb in an Puah, 30 Hrawng an Thi. October 1, zinglei sml. 10:00 hrawng ah Gangaw-Kalay motor lampi ah CNF le PDF-Gangaw i bawm in SAC ralhrang motor bomb an puah hnawh i ralhrang 30 hrawng an thi, tiah PDF-Gangaw nih nihin ah thawngpang an chuah.

“PDF-Gangaw, CNF le kiangkap mipi ralkap pawl i bawm in SAC ralhrang motor bomb kan puah hnawh i minung 30 hrawng non ah an i chuah. A dang hliam a pumi an tampi,” tiah PDF-Gangaw nih cathanh an chuah.

“SAC ralhrang pawl bomb puah hnawh an ton hnu ah miakpi in an rak kah len hna nain hliamhpu um loin himnak hmun ah kan phan kho,” tiah thawngthanhnak ah an langhter chih. SAC ralhrang motor bomb an puah hnawh lio ah kiangkap i mipi ralkap pawl nih CNF le PDF-Gangaw cu an bawmh ve hna.

Peter Thian Bawm Sang Telh in Minung 3 Kalay Thonginn ah an Kalpi Hna. Hakha SAC ralhrang nih an rak tlaihmi hna CDM palik pahnih le Peter Thian Bawm Sang cu nihin zaanlei sml 3:45 hrawng ah Helicopter in Kalay thonginn ah an kuat hna, tiah chungkhar sin in thawngpang kan theih.

Peter Thian Bawm Sang hi aluancia March 8 ah khan Laipawnglung ah an ra tlaih i pohma 505 (a) in taza an rak cuai hnu ah kum 3 thongthlak ding in bia an rak chiahpiakmi a si. Peter Thain Bawm Sang hi District biaceih zung ah biaceihnak tuahpiak nolh ding in chungkhar nih an hal (appeal/အယူခံ) i, biaceih nolh ding in nicaan zong an khiah cang ko nain nihin ah Kalay lei ah an kalpi diam hi a si.

”Ta Sang cu kum 3 thongthlak ding in bia an chah ciami a si. Mah kha District biaceih zung ah biaceih nolh ding in kan luh lio a si i, October 8 khi biaceih zung kal ding a kan timi a si. Asianin, tu zaanlei ah khan Helicopter in Kalay lei ah an kalpi an ti,” tiah Peter Thian Bawm Sang chungkhar nih The Chin Journal ah an chim.

Kalay an kalpi hlan deuh ah chungkhar nih palik sakhaan le Rungtlang (266) sakhaan zong ah an vung kal nain luhnak nawl an rak pe hna lo. “Kan theih bak in palik sakhaan ah kan kal ko nain kan tong manh ti lo. 266 ah an kalpi cang an ti i, kan va zulh. Kan phanh cun luh a ngah lo an ti.

Asinain, kan hngah rih. Gate ah COVID-19 an check dih hnu, an kalpi lio ah a lang in kan hmuh i kan kut lawng kan zah ta manh,” tiah a chim chap. Peter Thian Bawm Sang hi Yangon ah a ummi a si i, sianginn a dih hnu ah Hakha ah rian a ttuanmi a si. SAC nih ram uknak an chuh hnu, kan Laitlang chung tlaih a tong hmasami hna lak ah aa telmi a si. Credit: The Chin Journal