Bo Nakar Hruaimi Battalion 4 Nih NUG Hruainak Tang Ah PDF In Kan Um Lai Tiah Battalion 4 Komh Nih Thanh Ca An Chuah!
=========
Sagaing ramthen Yinmarbin pengkomh Bo Nakar nih a rakhruai mi hna Battalion 3, 4, 5 le 6 hna cu MNDA sinak in an chuak i Ministry of Defence-NUG (MOD) tang COC nawlpeknak tang ah kan um lai tiah Battalion 4 phu komh nih August 26 ni ah thanhca an chuah.
Hi Battalion 4 hna cu Bo Nakar nih a rakhruai mi phu Myanmar’s Royal Dragon Army (MRDA) sinak in kan chuak i NUG nawlpeknak tang ah PDF in kan um cang lai. NUG hruaimi COC tang ah a um duh mi paoh nih MNDA nih a zalh mi hriamnam nan chiah tak dih lai tah Battlion 4 in Commander cio nih lungtlinnak minsen an thut.
August 9 lio ah MRDA phu lutlai Bo Nakar nih pumpak facebook ah Live thlah in Yinmarbin pengkomh mipi hriamtlai Battalion 3,4,5 le 6 cu Defence Minister-NUG nih a hlawt tiah a rak chim. MRDA Battalion hna cu MOD-NUG cozah nih thlakhat ah sing 100 raldohnak caah kan bawmh hna an ti mi zong thlakhat ah sing 28 lawng an bawmh hna nak kong Bo Nakar nih a rakchim. Mah bia a chim ni 17 a rauh hnu ah a tubantuk in MNDA Batallion phu 4 nih NUG sin ah i fonh ding in thanh ca an chuah hi a si.
Kanbalu Ah A Ho Theihlo Hriamtlai Phu Nih Chungkhar 1 Ah A Hngilh Liomi 5 An Kahthah Hna. August 25, zinglei suimilam 2:00 tluk ah Sagaing ramṭhen Kanbalu pengkomh Ngarmyaung khuachung inn pakhat ah aa hngilh liomi, minung 5 cu aho theihlo hriamtlai phu nih an kahthah hna tiah theih asi.
Kahthah tongmi 5 hna cu U Than Win, Ma Khin San Win, U Kyaw Aye, Daw Than Ngw le Ma Kyai hna hi ansi tiah Ngarmyaung tualchungmi pakhat nih a chim. Hi kong he pehtlai in, Kanbalu pengkomh khua vengtu/ralvengtu hna nih an chim ning cun Ngarmyaung khuachung hin zaanṭim ah a ho theihlo hriamtlai phu an rak lut i chungkhar pakhat ah aa hngilh liomi 5 cu an kahthah hna inn chung thilri mansung zong an lak tiah an langhter.
SAC Ralhrang Riahcaw Phurh Mi An Kah Hna Caah Hriamnam Tampi An Lak Piak Hna. Karenni ramkulh Shadaw peng chung 2888 le May-yu tlang kar ah SAC ralhrang riahcaw phurh pah in rallam sial mi hna cu a karlak ah Mipi hriamtlai phu nih an kah hna caah hriamnam tampi an lak piak hna tiah kan theih.
“2888 le May-yu tlang kar ah SAC ralhrang kah in kan lak mi an si”tiah a thi mi ralhrang ruak le hriamnam an lak mi kong cu Karenni ralkap pakhat nih Telegram ah hmanthlak he a tar langh.
“Riahcaw phur SAC ralhrang hna cu August 23 zanlei sang ah an kah hna nak kong, ralhrang lei a thi mi zat fiang in theih an si rih lo nak kong, le hi kong he pehtlai in tuanvo ngeitu hna nih thawng an thanh than te lai”tiah Karenni ralkap pakhat nih cun a chim.
Naypitaw Pawngkam SAC Sakhaan Chuah Tak Mi Ralhrang Lei Commander Pawl Cu Min Aung Hlaing Nih A Mawhchiat Hna. Naypitaw pawngkam kahdohnak ah SAC ralkap nih an sakhaan chuahtak a hau mi dirhmun tiang an phak caah cu kong he pehtlai in Min Aung Hlaing nih an ralbawi commander pawl cu fak lak te a sik hna tiah Ayayarwaddy Times sin in theih a si.
SAC sakhaan laknak kong he pehtlai in an ralkap pawl daithlan ruang ah Naypitaw peng chung um battalion ralkap thazang a dernak, daithlan ruang ah a si ti in battalion tuanvo ngei commander ralbawi pawl cu Min Aung Hlaing nih a mawhchiat hna hi a si.
“Naypitaw peng chung ah kahdohnak a hun um tik ah tanglei ralbawi hna nih lih le hrokhrawl in report pek awk a ṭha ruam ti lo. Karenni ram le State dangdang kahdohnak ah, cunglei bawi sin report an pek tik ah an duhpoah in an tial, thawng an pek, ralram ahcun ralbawi hna nih an kuttang ralkap pawl cu duh paoh nawlpek in rian an fial hna” tiah ralkap lei thawngpe sin in theih a si.
A luancia August 10, Naypitaw SAC uknak tang ah a um mi Pyinmana peng LIB 411 kuttang Bomatantaung sakhaan cu PDF le ṭangrual mipi ralkap hna nih sakhaan an lak khawh i kahdohnak chung ah SAC ralkap tamlak te an thi. Hriamnam zong mipi ralkap nih an lak piak hna.
Mah kahdohnak kong he pehtlai in Battalion ralbawi pawl nih cunglei Military zungpi report an peknak ah PDF minung thazang tampi he an kan kah ruang ah sakhaan kan sung/an lak khawh mi a si tiah report an pek.
Sakhaan lak dih hnu ah SAC vanlawng nih vanlei in kahdohnak a tuah, Bomatantaung, Boma a cunglei, Boma a tang, Taungmyint yorma, Yeputaung, Yepulay khuate um mipi 2,000 leng nih khuachuak tak in pawngkam khua ah an zaam hna tiah theih a si. Credit: The Chin Post, Lungmili Media