Breaking News: Biaceih zung nih India Prime Minister Modi ralrin an pek!

Biaceih zung nih Ralkap thuam hruk ruang ah India Prime Minister Modi ralrin an pek!
============
India ram Uttar Pradesh (UP State) Biacaih zung nih cozah lutbik a simi Prime Minister Narendra Modi ralkap thuam (uniform) a hruknak he pehtlai in Prime Minister Zung (PMO) sin ah ralrin peknak (notice) an chuah, an pek tiah thawngzamhnak nih an thanh.

Kan hnu kum, December 2021 ah Kashmir khua a tlawn lio ah India ralkap thuam a hrukmi he pehtlai in danthat khawh a si tiah an ti. India phung (Indian Panel Code-IPC) dal 140 nak ning in Pengkomh biacaihtu (district judge) Nalin Kumar Srivastava nih Modi cu ralthuam a hruk ruang ah lungtlinloak an caah ralrin theihternak (notice) a chuah.

Atu bantukin PMO sin ah biacaih zung nih ralrin peknak a chuannak hi Pandey timi nih zuamcawhnak a tuah (file) hnu ah a cangmi a si. Hi kong he pehtlai in, March 2 ah a kongkau caih a si lai tiah theih a si.

India phung (IPC) dal 140 nak ning in, Ralkap thuam, Ti ralkap thuam le upatmi tbk. pawl hman le hruk hi dantat khawhmi sual a si. Cozah lutlai a simi Prime Minister nih a cung ah ummi le phungning in Ralkap lubik a simi (commander-in-chief) le Rampi (State) lutlai President hi a upat awk a si.

Ram mi poah nih ralkap an lut dih lai: Min Aung Hliang. Ram mi sinak a ngeimi poah nih kum 1 silole kum 3 chung ralkap an lut hrimhrim lai tiah February 2 ah Ralkap lutlai Min Aung Hliang nih a chim tiah Western News timi Kawlca thawngzamhnak nih a thanh.

Hi bantuk in rammi nih ralkap ṭuan dih ding zulhphung hi atu kum chung ah a si khawhnak in kan tuah lai i ram mi sinak a ngeimi poah nih a tlawmbik kum 1 in kum 3 tiang kan ralkap an ṭuan dih lai tiah Naypyitaw ah tuahmi meeting ah Min Aung Hlaing nih a chim.

Asinain, Ralkap lei kong a theimi nih hi bantuk in ram miphun poahpoah ralkap tuan ding timi hi an caih peng. Kawlram bantuk ram ahcun a si kho lo. Hi tluk hriam in a buaimi ram le miphun le miphun kar, biaknak le biaknak kar ah buaibainak a ummi ahhin a si kho rih lomi a si tiah an chim.

Cun, a hlei khun in tutan ah Ralkap nih anmah sin ah riantuan ding in an lak bik tawnnak hmun le ram a si mi, Sagaing khuate, Magway khuate le Chin ramkulh hmun cheukhat hna cu Kawl Ralkap ah luh cu chim lo in anmah tein sermi hriam hmang in Min Aung Hliang hruaimi ralkap cu an doh cuahmah tiah Tagaung Institute lutlai Ralkap lei thilthei nih a rak tial bal.

Cun, Western News nih cun, 2022 hi Kawlram caah hneksaknak a tam kum si kho men. Chawhleh a ṭhat lo ahcun kan mithmai bi lai, kan himnak a der ahcun kanmahtu kan ing lai caah rampi himnak ding caah a ṭha bik lam a si tiah a chim tiah an tial.

Hi bia a chimnak hi, Min Aung Hliang nih, hramhram uknak lak kum 1 tlin a thaizing ah hi bantuk in Naypyitaw ah tuahmi meeting ah ralkap ṭuan dih ding timi zulhphung tuah an i timh hi a si.

Asinain, Kawlram ahcun miphun hawih in Ralkap rak um a si, nain cucu Kawl ralkap nih Ne Win chan in hrawh a si i a tu ahcun, anmah Kawl lawngte nih nawlngeihnak tlaihmi bu pakhat bantuk a si cang. Miphun cio in hriamtlaihmi umnak Kawlram bantuk ahhin cun hramhram ralkap tuanter hi cu a fawi lai lo tiah theihngal nih an ruahdamh.

Rammi sinak a ngeimi poah nih ralkap luh dih ding timi zulh phung hi 2010 November 4 ah General Than Shwe chan ah an rak tar i, pa a si ahcun kum 18 in kum 35 kar le nu a si ahcun kum 18 in kum 27 chung ah kum 2 si lo le kum 3 tel ralkap a ṭuan lai timi zulhphung an rak tuah bal.

Thla khat chung ah ralhrang 80 leng kan thah hna tiah CNDF nih cathanh a chuah. Chin ramkulh, Falam peng chung ah January 6 in ralhrang thazang 300 hrawng le CNDF kahdohnak voi 12 a chuak tiah CNDF nih thawng a thanh.

Cu kahdohnak ahcun ralhrang 81 an thi i 60 leng nih hliamhma an put lawng si loin 60mm miakpi, 40mm miakpi le meithal kuan tampi lak khawh a si tiah theih a si. Bom tawlrelnak ngeih a si lio ah CNDF lei in hliam a pu mi 1 le kahdohnak ah aa hliam mi 8 an si i ralkap 1 nih a kan liamtak tiah CNO nih cathanh a chuah.

Kahdohnak Thawng; Kalay peng ni thlanglei, Cianh Tha khua ah hmunhma a lami ralhrang phu pawl cu February 3, zing sml 6:00am hrawngah PDF- Kalay, CDF (KKG), RKDF, CDF- Hakha le miphi hriamtlai phu hna nih kan kah hna tiah Kalay- PDF nih cathanh a chuak.

Cu kahdohnak ahcun ralhrang lei in 2 an thi i tampi an i hliam. Mipi hriamtlai phu lei in 2 hriam ngan nih a khen hna nain phan awk a um lo tiah theih a si. Cun, February 4, zing sml 10:00am hrawng ah Kalay ni thlanglei in a rak chuakmi ralhrang mawtaw 1 cu Chin Sai khua le Zaw Ka Lin khua karlak ah PDF- Kalay nih bom an puah hnawh hna caah ralhrang 3 an thi i tampi an i hliam tiah PDF- Kalay cathanhnak in kan theih. Credit: The Chinland Post