BREAKING NEWS; Arakan ram cu a rocar dih cang lai!!

ULA/AA Nih Emergency Cathanh A Chuah!! (SAC Ralhrang Nih Ceilak Bakin Phomh A Timh Cang Ko Hih, ULA/AA Nih Cun An Fehter Cang Ko)
================
Aa tlak ning in ka vun leh lai” SAC ralhrang nih Rakhine ram hmun zakip ah a um mi an sakhan lei ah ralkap thazaang, hriamnam pawl cu ralkap tilawng, ralkap motor, ralkap helicopter telin khual tlawng phortu Vanlawng, Motor, a rang taktak mi tilawng hna in tlanglam, tilam, cung lei lam hmang in ral thazaang chapnak cu a tu thla chungah pehzulh in a tuah mi cu kan hmuh.

Cu ruangah kan mah AA lei nih SAC ralhrang pawl an ratnak tlanglam,tilam, cung lei lam pawl cu ral lei zohfelnak ningin dirter in zohfelnak kan tuah lai(An rat caan paoh ah kan i phomh lai ti duhnak). Ralhrang Kawl Ralkap nih an sungh cangmi, kan mah nih sakhan ah kan i chiah cang mi Bangaladest-Myanmar ramri mengtung (40) sakhan le Khah Mah Yah (352) tatyin sakhan leng in Paletwa telh in a dang hmunhma cheukhat hna zong Jet Fighter, hriamnam ngan in kahdohnak an tuah cuahmah lio caan a si.

Rakhine le Paletwa hmunhma chungah ral hrannak, kahdohnak fak piin a chuah bantukin hinak in Rakhine ram humzakip ah kahdohnak fak piin a chuah khawh caah kan mah lei nih a tu bantuk in Tlanglam, Tilam khualtlawn tlunkalnak cu rikhiah in zohfelnak tuah a si.

Cu caah tlanglam, tilam, tlunkal chawlehnak a tuah mi, motor cycle a ngeimi hna lei nih Rakhine mipi a cozah he aa pehtlai mi ramkhel zung, Khuaukbawi zung, Pengkulh zung hna ah thawngthanh in tlunkkal ding, le zohfelnak hna cu tangdor nun ngeih in zulhding in kan i theihter hna. Thawngthanh ta loin tlunkal tuah lo ding le thawngthanh loin tlunkalnak na tuah i pakhat khat na ton sual ah cun nan mah tein nan intuar lai i tuanvo kan i la hna lai lo, nan mah tuanvo a si,.” tiah cathanh an chuah.

Relchap, Kalaymyo Bomb Puahkehnak Kongkau Ah SAC Ralkap Nih Lunghrinh Le Tlaih A Tongmi Cin Biak Thang Cu An Thah, Sagaing ramṭhen Kalaymyo peng bomb puahnak kongkatu ah SAC ralkap nih lunghrinh le tlaih a tongmi Ko Cin Biak Thang cu SAC ralkap nih an thah tiah tualchungmi hna sin in theih a si.

September thla ni 13 ah Kalaymyo Hlaingtharya sang le Gyotungpin sang ah bomb lunghnih a puak i cu puahkehnak ah cun Kalaymyo umhmunkhur mi ralbawi Naing Win Soe le a kuttang pawl nih Ko Cin Biak Thang kum 26 cu lunghrinh in an tlaih i an thah colh hi a si tiah theih a si. A luancia september ni 12 zongah Kalaymyo peng KanPale khua mi Ko Nay Thu Htun zong PDF na si tiin an rak tlaih i thuksaphur in an hrem caah a nundamnak ding ah ruahchannak a tlawm ngai tiah theih a si.

Mizoram Planning Board Vice Chairman Pu H. Rammawi Nih Ralzam Kongkau Ah India Central Cozah Hruaitu A Ton Hna, Mizoram Planning Board Vice Chairman Pu H. Rammawi Nih Ralzam Kongkau Ah India Central Cozah Hruaitu A Ton Hna: India ram i aa dormi Myanmar ralzam; a bikin Chin ralzam hna cu Myanmar ram ah kuat ṭhan an si lai, ti bantuk biachawkvai a um lio ah, ralzam kong he pehtlai in Mizoram Cozah ah ṭuanvo ngeitu sang Planning Board Vice Chairman Pu. H. Rammawi nih Delhi khuapi Central cozah hruaitu hna a va ton hna.

Mizoram Planning Board Vice Chairman Pu H. Rammawi nih cun, “Atu i Mizoram ah a ummi Myanmar ralzam hna cu a kir ṭhan hnu ah an humhimnak ṭha te an ngeih lo i, an khuasaknak ah remdaihnak a um lo ding a si ahcun Mizoram cozah nih kan kirter hna lai lo,” tiah Ministry of External Affairs ṭuanvo ngeitu hna he tonnak an ngeih lio, September 14 ah khan a chimh hna.

Pu H. Rammawi hi Sangau khua chuak a si i, Lawngtlai East Constuency in Mizoram Legislature Assembly (MLA) ah rak thim cang mi a si. Mizoram cozah ah Cabinet minister(Agriculture) a rak ṭuan bal mi a si i, Atutan MNF cozah ahhin Planning board vice chairman rian a tlaih.

Thaketa Peng Kamarkyi Hlei Cung In Mipa Pakhat A Zuang, Yangon ramṭhen, Thaketa(သာကေတ) peng Kamarkyi(ကမာကြည်) hlei cung in mipa pakhat cu nihin September 14 zing sml 10:00 hrawng ah a zuang, tiah mi bawmchantu phu nih an chim. Bawmchantu phu cu mipa a zuannak hlei lei an va kal tikah cycle(စက်ဘီး), phanah, luchin le a dangdang thilri a chiah takmi an hmuh. Mipa hi aho a si ticu an hngal kho rih lo, tiah theih a si.

Mipa ruak cu palik nih an kawl cuahmah ko nain September 14 chun tiang ah an hmu kho rih lo, tiah Thaketa peng mi bawmchantu phu siin theih a si. A luancia August thla zarh dongh lei ah Yangon telh in kadang hmun dang ah mah tein aa thatmi hi zarhkhat chungah 7 an um, tiah theih a si.

Thinlung khuaruah umtuning kong a cawngmi Phyo Pan Nu Khin nih cun, “Mi pakhatkhat nih a lung donghnak kong bia a’n ruah i, a nunnak lak ding tiang in aa timh na hmuh ahcun nangmah lawng nih na tonmi a si lo, tiin thazaang peknak biachim a biapi,” tiah BBC he biaruahnak an ngeihnak ah mizapi theih ding in a chim.

Yangon Ah Lamzawhtu Mino 27 Cu SAC Ralkap Nih An Tlaih Hna, Yangon ramṭhen, Kyimyindaing(ကြည့်မြင်တိုင်) peng ah nizan September 13 ah Myanmar ram aiawhtu UN palai ding ah Kyaw Moe Htun siseh tiin duhnak a langhtertu mino 10 hrawng tlaih an tong tiah theih a si nain, nihin September 14 ah tlaih a tongmi dihlak 27 an si, tiah lamzawhtu phu sinin theih a si.

Tlaih a tongmi hna chung in kum tling lo hna zong an i tel pinah thawnglatu cheukhat zong ah i tel. Lamzawhnak ah aa tel lomi mi sawhsawh zong an i tel, tiah theih a si.

“Kum tling lomi hna hi lamzawhtu hna pawngkam an um lioah uniform aa hruk lomi SAC ralkap nih an tlaih hna. An tlaihmi hna chung in hliamhma pumi zong an um len, cheukhat cu SAC ralkap nih an phone an lakpiak hna. An tlaihmi hna nih ralkap cu lamzawhtu phu chungtel hna an inn an chimh hna caah an tlaih chap hna,” tiah lamzawhtu chung in a luatmi pakhat nih a chim.

Tlaih a tongmi hna chung in Confederation Of Trade Unions Myanmar(CTUM) chungtel hna zong an i tel, tiah theih a si. Yangon khuachung ah a phunphun in SAC ralkap uk duhlolanghternak an tuah i, ralkap le palik nih khua chungah hriamnam he lamzawhtu cu an kham hna i an tlaih hna.

Si-inn Ah Aa Thlopbul Cuahmah mi Le Mipi Ralkap Hna Cu PDF-Kalay Nih Bawmhnak An Pek Hna!: People Defence Force-Kalay in ṭuanvo ngeitu hna nih People Health Organization(PHO-KALAY) si-inn i aa thlopbul cuahmah mi hna le mipi ralkap hna cu a luancia September 8 ahkhan si-inn ah kalin thazaang peknak an ngeih hna hnu ah phaisa zong in an bawmhchanh hna, tiah PHO-Kalay nih an thanh. September thlachung ah PDF-Kalay bawmhnak thawng in PHO-Kalay nih X-ray zong an hman khawh cang, tiah theih a si.

Sagaing Ramṭhen, Pale Peng, Muaidung khua Pawng Kahdohnak Ah SAC Ralkap 5 An Thi!: Sagaing ramṭhen, Pale thlanglei meng 5 ah ummi Muaidung (မွေ့တုံ) khua pawng ah nizaan September 13 zaanlei sml 4 hrawng ah SAC ralkap le tualchung hriamtlai phu kar kahdohnak a chuak, tiah theih a si. Cu kahdohnak ah cun SAC ralkap 5 an thi i 30 hliam an tuar, tiah Yinmarbin(ယင်းမာပင်) pengkomh Bataillon 11 KYIATHITNAT PYOHKYIA hruaitu pakhat Ko Aok Ka nih a chim.

SAC ralkap 180 hrawng cu September 12 ahkhan Shwelaung(ရွှေလောင်း) khua ah umhmun an khuar i, Muaidung khua cu hriamngan in an kah pinah inn an khangh. An kir lei ah bomb kan puahhnawh hna caah kaphnih kar kahdohnak a chuak i SAC ralkap 5 an thih lengah 30 hliam an tuar.

A thimi le hliam a tuarmi hna cu Shwelaung khua ah cycle in voihnih an thiar hna hnu ah, Shwelaung in Pale si-inn ah ambulance in an kalpi hna, tiah Ko Aok Ka nih cun a chim. Cu kahdohnak cu Yinmarbin Bataillon 11, 12 le tualchung hriamtlai phu hna i bawm in an tuah mi a si, tiah theih a si.

Mandalay Ah Palik Pakhat Le Yephyo Peng Ah Pyusawhti Pakhat Cu PDF Nih An Thah Hna: Mandalay Kandawkyi, Kanpat lam Ayemya(အေးမြ) phura pawng ummi No. 10 palik sakhan in mangki(palik) pa cu, MDY PDF phu nih September 8 zan sml 7:30 ah an kah i, a hmun ah a thi colh, tiah theih a si.

A thimi palik Rakhinekyi(ရခိုင်ကြီး) sinah kuanruk tlum pistol zun 1, 380 min ngei kuan 12, laisen, phone 1, zal 1, zung he aa pehtlaimi catlap, hnaciat(နားကြပ်) 1, Shuse(ရှုဆေး) bawm 1, cycle 1, kutkhih cikcin tuah 2, phone No cauk le a dangdang thilri kan tlaih, tiah MDY-PDF nih cathanh an chuah.

Cu ṭhiamṭhiam in Tanintharyi ramṭhen, Yephyo peng Ciakhata Pinin(ကျခတ္တပင်အင်း) khua lam ah September 12 zinglei sml 11:00 ah USDP party chungtel Pyusawhti Thein Zaw cu hngalh lomi phu nih meithal in an kah i a thi, tiah tualchung mi pakhat nih a chim.

Thein Zaw cu Tabezun(သဗြေဇွန်း) khuami a si pinah USDP party chungtel pakhat zong a si. SAC nih nawlngeihnak an lak hnu in Pyusawhti chungtel a si i, PDF a ral ngaithlaitu a si tiah theih a si.

Monywa Economics Sianghleirun Pawng Ah PDF Nih SAC Ralkap 3 An Thah Hna: Sagaing ramṭhen, Monywa khuapi Economics sianghleirun pawng ah sentari cawngtu SAC ralkap cu, PDF Guerrilla phu nih nizan September 13 zan sml 10:00 ah an kah hna i, SAC ralkap 3 an thi, tiah theih a si. Cu kahdohnak ah cun Black Dragon Special Task Force le God of Monywa People Defense Force hna i bawm in an kah hna i, SAC ralkap bawmtu an rat caah hriamnam kan la manh lo, tiah Black Dragon phu nih cathanh an chuah.

Cu bantuk ṭhiam in Magway ramṭhen, Yesagyo peng Yelaykyun(ရေလယ်ကျွန်း) hmunram Ngaungpin khua in Wabu khua lei ah rallam a sialmi SAC ralkap 50 hrawng cu, bomb kan puahhnawh hna caah SAC ralkap 6 hliamhma fak ngai an pu, tiah MG6 Guerrilla phu nih cathanh an chuah.

Cu bomb puahnak ah cun MG6 Guerrilla, YSO NO1 Guerrilla le YLK NEW POWER PDF hna i bawm in an puahhnawh hna. PDF lei in ralkap pakhat hma a pu nain thinphan awk a um lo, tiah theih a si. MG6 Guerrilla phu in ralkap pakhat nih, “SAC ralkap 6 hliamhma an pu tiin thawng kan theih. Tilawng in Yesagyo lei kap ah hliamhma pumi hna cu an kalpi hna. A thimi an um le um lo cu fiang in kan thei lo,” tiah a chim.

Sagaing Ramṭhen, Pale Peng, Muaidung khua Pawng Kahdohnak Ah SAC Ralkap 5 An Thi!: Sagaing ramṭhen, Pale thlanglei meng 5 ah ummi Muaidung (မွေ့တုံ) khua pawng ah nizaan September 13 zaanlei sml 4 hrawng ah SAC ralkap le tualchung hriamtlai phu kar kahdohnak a chuak, tiah theih a si. Cu kahdohnak ah cun SAC ralkap 5 an thi i 30 hliam an tuar, tiah Yinmarbin(ယင်းမာပင်) pengkomh Bataillon 11 KYIATHITNAT PYOHKYIA hruaitu pakhat Ko Aok Ka nih a chim.

SAC ralkap 180 hrawng cu September 12 ahkhan Shwelaung(ရွှေလောင်း) khua ah umhmun an khuar i, Muaidung khua cu hriamngan in an kah pinah inn an khangh. An kir lei ah bomb kan puahhnawh hna caah kaphnih kar kahdohnak a chuak i SAC ralkap 5 an thih lengah 30 hliam an tuar. A thimi le hliam a tuarmi hna cu Shwelaung khua ah cycle in voihnih an thiar hna hnu ah, Shwelaung in Pale si-inn ah ambulance in an kalpi hna, tiah Ko Aok Ka nih cun a chim. Cu kahdohnak cu Yinmarbin Bataillon 11, 12 le tualchung hriamtlai phu hna i bawm in an tuah mi a si, tiah theih a si.

Kawlin Ah SAC Ralkap Le PDF Kahdohnak A Chuak I, PDF Ralkap 8 An Nunnak A Liam, Butalin Peng Zong Ah PDF 6 An Thi! Sagaing ramṭhen, Kawlin peng Inpinthar khua thlanglei Ayu(အရိုး) tlang pawng ah SAC ralkap le PDF kar kahdohnak a chuak i, kaphnih in a thimi an tam, tiah tualchung mi hna nih an chim.

Kutaungbu(ကိုးတောင်ဘို့) lei kap in a chuakmi SAC ralkap 100 hrawng cu, September 12 zanlei sml 2:00 hrawng ah Pah Kah Phah phu le PDF i bawm in an kah hna i, sml 3 chung hrawng kahdohnak a chuak, tiah theih a si. “SAC ralkap nih hriamngan he hriamhme he an kah hna. Hriamnam aa thlau tuk caah PDF lei in ralkap 8 an nunnak a liam. An ruak cu aa naihnak khuate ah an kalpi hna i, ṭha tein an vui hna,” tiah tualchung mi pakhat nih a chim.

Cu kahdohnak ah KLPDF Battalion 1 in ralkap 3, Pah Kah Phah phu in ralkap 5 an si i, an dihlak 8 an nunnak a liam. PDF ralkap 2 hliamhma an pu tiah theih a si. Nizan September 13 zinglei zong ah rallam a sialmi SAC ralkap nih khuami 2 cu an tlaih hna i, ralphaw ah an hman hna. SAC ralkap nih minung zong an put hna, hliamhma a pumi maw an si ti cu hngalh a si lo, tiah tualchung mi hna nih an chim.

Monywa Ah Mi Thilri Chuttu, Mi Thattu, Mi A Tlaihhremtu, Misual Damiah Pa Cu PDF Nih An Tlaih, Sagaing ramṭhen, Monywa peng ah sualnak phunkip a tuahtu misual phu chungtel Ngein Chan Oo cu PDF nih an tlaih, tiah theih a si. Min Aung Hlaing nih nawlngeihnak lak hnu in thongtla tampi a chuahmi hna chung ah tlaihhrem, thah nawn, firnak in sual a tuahmi hna zong tampi an i tel i, Monywa peng ah atu bantuk in misual phu chungtel pakhat zong PDF nih an tlaih.

Minung 34 thahnak ah aa telmi le tlaihhremnak voi 24 chungah aa telmi misual phu chungtel Ngein Chan Oo cu, Chindwin Attack Force in Monywa The Boys nih a luancia September 1 ah an rak tlaih i, bia an hal lioah a thinphannak in a thi. Misualpa Ngein Chan Oo nih, nawlngeihnak lak hnu in minung 13 a tlaihhrem hna i a thah hna, mi inn 11 an baoh i thil a fir. Cu pinah kum tling lo kum 14 nu a tlaihhrem i a thahnak kong cu Chindwin Attack Force nih an langhter.

Cycle an firmi 65, tangka kyats sing 650 leng le sui hi voi 23 a firnak kong zong a chim. Pistol zun 1, nam a tawimi 7, a saumi 3 zong Monywa PDF nih an tlaih. Mi thilri a chuttu, mi a tlaihhremtu, mi thattu le misual damiah an si nan hngalh hna ahcun rak kan chim u, kan fimhlawm dih hna lai, tiah Monywa pengkomh PDF nih thawngthanhnak an tuah.

Falam Peng Motor Lam Rawh Ruangah Kalay In Eidin Phormi Motor An Tap, Eidin Vialte An Thu Dih, Sagaing ramṭhen, Kalaymyo in Chin ramkulh Falam lei ah eidin a phormi motor hna cu, lam a rawh ruangah zarh hnih chung an tap i, an phorhmi eidin vialte ei awk ṭha loin an thu dih i, an rawk dih tiah theih a si.

Kalaymyo in Falam peng lei ah a kalmi thilphor motor ngan hna cu Falam in meng 130 a hlatnak hmun ah ruahsur tuk ruang ah min a cim i, lam a rawh caah zarhhnih chung a hren hna. Eidin an phorhmi kuva hnah telh in eidin tampi cu an rawk dih, tiah tualchung mi hna nih an chim.

“Eidin kan phorhmi cu SAC ralkap nih an kan check tuk lo nain, fur caan a si caah min an cim i, zarhhnih chung hna kal khawh loin a kan hren. Khua kan phanh ahcun eidin vialte an thu dih cang i, an hlonh dih hna,” tiah thilphor motor khaltu pakhat nih a chim.

Kalaymyo in Falam peng a thlanglei khua hna ah eidin thil an phortu motor hna cu ṭhal caan ah a laang in an kal tawn ko nain, fur caan ahcun lam a chiat tuk caah zarhhnih hna an rau, tiah theih a si. September 11 lio zong ah Falam le Hakha karlak lam a cimh caah khuatlawng motor hna cu kal kho loin nikhat chung a hren hna i, nizan September 13 ah an remh khawh, tiah theih a si. Crd-The Chin Post