Breaking News; AA Ralkap Le Ralhrang Pawl An I Kah Than!

Maung Taw Ah SAC Ralhrang Le AA Karlak Ah Kahdohnak A Chuak!
===========
Rakhine ramkulh Maung Taw peng chaklei Myi Taih khua pawngah SAC ralhrang le AA karlak ah kahdohnak a chuak i, kaphnih an tuar veve tiah anmahlei thawngzamhnak pakhat DMG nih a langhter.

Febuary 4 zanlei sang sml 2:00 ah SAC ralhrang ခမရ ၃၅၂ nih Myi Taih khua pawngah a ummi AA umnak sakhan cu ruahlo tukin an luh caah AA leikap nih an rak kah hmasa hna i, minute 46 chung an i kap tiah theih a si. “Kan umnak hmunah ruahlo piin an rak luh caah kannih lei gate hngaktu nih an kah hmasa hna i, cuticun minute 46 chung kahdohnak a chuak.

Kahdohnak a chuah lio ahcun kanmah leikap ah gate hngaktu pakhat nunnak a liam. SAC ralhrang leikap zongah a thimi an um kho tiah” Rakhine Ralkap biachimnak nawlngeitu U Khine Tuh Khah nih DMG ah a chim. SAC ralhrang nih AA umnak ah atu bantukin luhhnawhnak an tuahmi hi daihnak a umnak hmun Rakhine ramchung ah buainak chuak dingin a tuah hramhrammi a si tiah U Khine Tuh Khah nih a ruahnak a chim.

“Kahdohnak hi pehzulh a si lai, a si lai lo timi cu SAC ralhrang ralkap cawlcanghnak ah aa hngatmi a si. Anmah leikap nih pehzulh in kahdohnak an tuah i, thazaang an i chap ahcun kahdohnak a chuak than lai” tiah U Khine Tuh Khah nih a chim.

SAC ralhrang le AA karlak ah kum 2020 Nov thla zarhkhatnak thawkin kahdohnak an ngol veve i, SAC ralhrang nih Rakhine ramkulh chungah AA nawlngeihnak cu phihkham dingin aa zuam cuahmah hi a si.

A Fak Taktakmi Zawtnak Chiahru HIV Hrik Thar VB Cu Netherlands Ram Ah An Hmu! A fak taktakmi le i chawnh a fawi tukmi zawtnak chiahru HIV he aa pehtalimi hrik thar VB cu Outpost Researcher pawl nih Netherlands ram ah a ummi HIV zawtnak ngeitu minung 109 sinah an hmuh cang tiah vawlei cung thawngzamhnak kip nih an tial.

VB zawtnak hrik thar a ngeitu hna hi zawtnak dang hrik thar chawnh nakin an thisen chungah virus level 3.5 in 5.5 tiangin a tam deuh pinah midang nakin an thazaang zong a der deuh ngaingai tiah Agent France-Press nih a langhter.
HIV virus hi pehzulh in aa theng lengang i, chawnh a tongmi hna sinah phun dang deuh lengmang in hmuh a si tikah phun tamtukin a karh ngaingai nain VB zawtnak hrik thar hi phun (500) lengkai tiangin a tam tiah AFP nih an langhter.

Hi virus thar caah hin thinphang thlalau in um ding cu a si lo tiah Oxford i zawtnak i chawnh lei he pehtali in dothlatnak tuahtu mi thiam taktakmi Chris Wymant nih virus kong he pehtlai in AFP sinah a chim. VB hrik thar zawtnak hmuhmi hi “virus hna hi a hlei in an thazaang a zawr chin lengmang dingah pehzulh in an i thleng than lengmang rih lai tiah zeitik hmanhah kan ruah ding cu a si lo timi hi ralrinnak a kan pek tiah” Wymant nih a chim chih.

Matupi Khuapi In A Rak Tummi SAC Ralhrang Ralkap Motor Rual Cu Zarh Hnih Tiangah Mindat Khuapi Chung An Lut Kho Rih Lo! Matupi khuapi in January 24 ah khan a rak tummi nawlngeihnak latu SAC ralhrang ralkap motor rual cu CDF-Mindat nih meng 28 nak zawnah Febuary 5 zinglei sml 11:00 siseh zanlei sml 2:00 ah vawihnih bak an kah hna tiah Mindat peng chung mipi hruaitu nih cathanh an chuah.

Cucaah Mindat khuapi chungah a ummi 274 Battalion nih hriamngam phuntling he bawmh in an kah lengmang nain Mindat CDF leikap ah hliam tuartu umloin an i zukphiak kho. SAC ralhrang ralkap hna cu meng 16 nak zawnah an riak lai tiah theih a si.

A liamcia January thla ah khan Pakukku in kuanfang nih a pemh khawh lomi motor pahnih (2) le a dang motor (80) tluk cu Matupi khuapi ah a ummi SAC ralhrang ralkap hna cu eidin thilri an chanh hna i, an rak kirlei ahcun atu bantukin kahdoh an ton hi a si. Febuary 2-4 karlar kahdohnak ah hin nawlngeihnak latu SAC ralhrang ralkap (10) tluk an thih pinah Mindat CDF nih meithal zuun khat an chuh khawh. Credit: The Federal Times