Mipi Ralkap CDF Motor Lehsualnak A Chuak
=========
Chin ramkulh, Thantlang peng hmun pakhat ah CDF motor fami lehsualnak a chuak, tiah theih a si. “June 1, chun suimilam 1:30 hrawng ah aa leh sual hi a si. A kir lei a si caah aa citmi an umlo i, a khaltu lawng a si, a khaltu nunnak zong a him, nihin ah a motor zong an chuah khawh cang” tiah tualchungmi pakhat nih Lungmili Post ah a chim.
NLD Cozah Chawlehnak Ah Khuakhang Lairel Tu 2 Naak Vuanci Sat Aung Cu Thonginn In A Chuak Cang; Hramhram in uknak a latu SAC ralhrang nih rampi biathli thuhnawhnak lei he aa pehtlaimi phungphai in kum 3 chung thong an thlakmi NLD cozah in tangka lei ah khuakhan lairel tu pahnihnak vuanci (Vice Minister of Planning and Finance) U Sat Aung Cu nihin June 2 ah Yamethin thonginn in a chuak, tiah theih a si.
U Sat Aung cu SAC ralhrang nih zawnruahnak in an chuahmi si loin thongthlak ding in nawl an chuahmi kum a thlin cang caah a rak chuak khawh hi a si, tiah Yamethin thonginn a pehtlaitu hna sin in theih a si.
SAC ralhrang nih uknak a laak hnu ah NLD cozah chawlehnak ah ruahnak petu Sean Turnell zong an rak tlaih i, SAC nih a computer chung ah ramkhel kong he aa pehtlaimi chawlehnak pawl hmun a si tiin rampi biathli thuhnawhnak lei he aa pehtlaimi phungphai in taza an cuai ve.
Tazacuai a tongmi hna cu Daw Aung San Suu Kyi, NLD cozah chungtel tangka lei ah khuakhan lairel tu (Minister of Planning and Finance) vuanci a rak simi U Kyaw Win, U Soe Win, pahnihnak vuanci U Sat Aung le Sean Turnell hna an rak si i an 5 ning in SAC ralhrang nih thong kum 3 cio a thlak hna hi a si.
Atu ahcu Daw Aung San Suu Kyi pakhat lawng thonginn chung ah a taang cang i anmah he sualphawt ṭii in an tlaihkhihmi hna minung 4 tu cu an luat cang, tiah People’s Spring nih a langhter.
Hakha Le Thantlang Kar Kahdohnak Ah SAC Ralhrang 27 An Thi; Chin Ralkap Nih Hriamnam Cheukhat An Lak; Hakha le Thanglang kar ah SAC ralhrang le Chin ralkap tangti phu kahdohnak chung ah ralhrang lei in 27 an thih pin ah hriamnam cheukhat zong Chin ralkap tangti phu nih an lak piak hna.
“May 26 in SAC ralhrang 150 tluk phu hnih ah rallam sial mi hna le Chin ralkap tangti phu kar kahdohnak fak ngai a chuak i a tuni tiang ah SAC ralhrang 27 an thi” tiah CNA chimphuannak nawlngei tu Salai Htet Ni nih People’s Spring Media Interview ah a chim.
“Ni riat tluk kahdohnak chungah Chin ralkap tangti phu nih a si khawh chungin Sniper le Drone zong kan hman, atu ni tiangah kan mah lei in minung 12 an nunnak a liam. Ralhrang 27 an thi cang. Ralhrang rallamsial phu khat cu khoi dik an phak cang, an kir maw si kan hngal rih hna lo. Kan mah lei nih meithal zun 2 le kuan zong kan lak piak hna. A tu ni tiang kahdohnak a chuak rih.
SAC ralhrang hna nih Thantlang khua chung ah thazaang chap in le Thangtlang peng chung humhak dingin an i timh tuah mi a si, ni kum zongah a tubantuk in an rak i zuam nain a karlak ah kan rak kham hna caah an tlamtling kho lo”tiah a cunglei upa nih a chimchap. Hi kahdohnak cu Chin ralkap tangti phu a si mi CNA, CDF-Hakha, CDF-Thantlang, CDF-Lautu le CDF-Zohphei hna an i bawm tiah kan theih. Credite;Lungmili Post