Timit Kuang Kahdohnak Ah Chin Ralkap 11 Nih Ram le Miphun Ca Ah Nunnak An Pek
===============
Chin ramkulh, Hakha peng Timit kuang hrawn ah SAC ralkap vanlawng nih bomb a thlak caah Chin ralkap a tlawm bik 5-6 kar an nunnak a liam, tiah theih a si. Nihin May 29 ah SAC ralkap le Chin ralkap hna cu Timit dong lei kap ah an i kap i, SAC ralkap vanlawng nih bomb voi tam ngai a thlak.
Chin ralkap a tlawm bik 5-6 kar an nunnak a liam pinah a tlawm bik 10 hliamhma an pu, tiah min langhter a duh lomi pakhat nih a chim. Chin News Agency nih a langhter ning ah cun CDF Hakha in ralkap 6 an nunnak liam i, CDF Zophei le CNA in ralkap 10 hliam an tuar. (Thawng fiang theih khawh dih a si rih lo caah fiang deuh in update ṭhan kan i zuam lai)
Nizan May 29 Timit kuang kahdohnak ah SAC vanlawng nih bomb a thlak ruangah Chin ralkap nunnak a liammi cu 11 an si, tiah theih a si. Nunnak a liammi hna hi CDF-Hakha chungtel 9 le CNA chungtel 2 an si. Nunnak a liammi hna lengah CDF-Hakha, CDF-Zophei le CNA chung in hliamhma pumi zeimawzat an um i, ralkap cheukhat cu pehtlaih khawh an si lo, tiah kan thawnglaknak nih a ṭial.
Nizan Timit kuang kahdohnak ah hin SAC ralkap 200 hrawng nih tanglei in an nam hna i, cunglei in fighter nih a bawmh fawn hna. SAC ralkap 150 hrawng cu CNA hmunpi lei panh in an kal, tiah Chindwin News nih a ṭial. Tuzing tiangah TCP nih Chin ralkap nunnak a liammi min kan hlat khawh mi cu :-
1. Salai David Van Ṭha Lian, 2. Salai Noah Zung Ceu Thang, 3. Salai Samuel(Pa Muak), 4. Salai Ṭha Lian Cung, 5. Salai Ngun Lian Ceu, 6. Salai Biak Cin Hmung, 7. Salai Richard, 8. Kyaw Oo, Midang hi kan hlat cuahmah lio a si.
Thailand ram, Kanchanburi pengkomh lampi i tlimi motor pakhat chung ah Thailand nawlngeitu hna nih Myanmar mi 17 an tlaih hna, tiah theih a si. SUV civil motor pakhat cu chekhlatnak tuah duh loin rang tuk in a tlik caah Thailand palik nih 10 km hrawng an dawi hnu ah an va tlaih. Motor thlalang vialte cu lenglei hmuh khawh lo ding in an phih dih i, motor chung ah a ummi Myanmar mi 17 hna cu an ruksai he May 27 ah Thailand palik nih an tlaih hna, tiah theih a si.
Motor khaltu Thailand pa nih Myanmar mi hna cu Thai Baht 3,000 a laak hna i, Kanchanburi pengkomh ah kalpi ding in a thlah hna, tiah theih a si. Myanmar mi pakhat cu Thailand palik nih bia an hal tikah, “Thailand ram ah kum 20 rian ka ṭuan cang i, Myanmar ram ah ka fapa ka thlah hnu ah rian ṭuan ṭhan ding in Thailand ram ka rak luh ṭhan hi a si,” tiah a leh hna.
Myanmar mi hna cu Bago, Mawlamyaing le Rakhine in a lutmi an si i, Thailand luhnak man cu a cheu an liam cang i, Thailand phak hnu ah a cheu pek ṭhan ding a si.
Thailand ramchung ah hin phungning loin a lutmi Myanmar mi hi May thla chung lawng ah 370 tluk an si cang.