Palaw Kahdohnak Ah SAC Lei 10 An Thi, PDF 1 A Nunnak A Liam
========
Taninthary ramṭhen, Palaw peng ah kahdohnak a chuak i SAC lei 10 an thi tiah Palaw PDF nih an thanh. Pawatkone khuate pawng ah phu 3 in kahdohnak a tuah mi SAC ralkap pawl an kah hna i SAC ralkap 10 hrawng an thi i ruak 1 zong an hmuh khawh tiah an langhter.
June 20 chun sml 11:40am hrawng ah Kadece khuate in SAC ralkap phukhat, Pawatkone khua, Pyidaungsu lam lei in phu 2 tiah phu 3 ṭhen in thazang 200 hrawng in a rak lut mi SAC ralkap pawl PDF phufonh nih an kah hna i June 21 zaanlei sml 7:00pm tiang kahdohnak a fak. SAC ralkap 10 hrawng an thi i ruak 1 zong an lak tiah an langhter. Kahdohnak chung ah Myeik PDF B01 le adang PDF phu pawl bawm in kahdohnak an tuah hi a si i No.1 Battalion in hriamtlai 1 ram le miphun caah a nunak a pek tiah theih a si.
Ye Peng Chuangtaung Hlei Gate Ye Bilu Phu Nih An Kah; Mon ram, Ye peng, Chaungtaung khuate ah a um mi Chaungtaung hlei ah SAC ralkap nih hmunhma an khuarnak gate cu Ye Bilu phu nih an kah tiah Ye Bilu phu nih an thanh.
June 22 zinglei ah Ye phu nih atu bantuk in Chuangtaung hlei ah hmunhma a khuar mi SAC ralkap pawl an kah hna hi a si. SAC battalion 19 kuttang ralkap pawl nih chaungtaung hlei ah gate an tuah caah Ye bilu phu nih a thli tein an kah hna tiah theih a si. SAC ralkap 8 nih hmunhma an khuarnak cuka gate kahdohnak ah SAC ralkap 4 a tlawm bik an thi kho tiah Ye bilu phu nih an ruahdamh. Crd; The Chinland Post