Breaking; Kan pasaltha hna sinin lunglomhnak mitthli a luang e!!

Thawngpang Tha; CDF-Mara Le MDF Lungtling Tein Min Thutnak An Ngei!!
===============
CDF Mara le MA ( Mara Army ) cu Mara mipi duh pi nak le anmah lung tling nak in Mara mipi hmai le Pathian hmai ah lung tling nak min an thut . Mara mipi cu lung lawmh nak mi thli tiang aluang . Atu cu MATC / MDF ah lung khat tein kawl Ralkap an doh ti cang . Crd-Si Cho Le

MDF tiah aa thawk hlan ah CDF Mara tiah CNA nih Tindan an pek hna. CJDC member zong an si. Mara Army timi hi AA sin ah Tidan an kai lio asi. Adang tein an um. CNA nih an cohlan hna lo caah CDF Mara lawng in an um. CNA le CJDC ah buaibainak pelte hmanh a rak um lo.

Pu Zo Peng Thantlang khua in Saiha ah a rak zam I, Pu Thang Hei (USDP, Electric Officer Pension, Mara Mirum pa) sin ah aum. Pu Thang Hei hi Lailen khua (Ttl Peng) asi. 2023 Thimhnak ah lut aduh mi asi. Anmah pahnih nih CDF Mara upa hna cu Pu Thang Hei Inn ah an um ter hna.

Pu Thang Hei cu Mirum asi caah a Inn cu 3 star Hotel nakin an ṭha deuh. CDF Mara Upa hna cu an Policy an cawnpiak hna I, Brain washes an tuah hna. Saiha um Mara Politicians, MTP, MPs, MSO, ECM Pastorte le hruaitu hna vialte he an tawn ter lengmang hna I hmai lei Mara Ramkhel chunmang cu an I ruah tawn.

Ramdang um mi Mara upa vialte he Zoom meeting cu zan fatin ti awk in an tuah lengmang. Acan ah Dr. Sa Sa zong aa tel ve tawn. Cuticun Global Mara Meeting tuah ding in agenda an chuah pi. Meeting an tuah tikah, CDF Mara le Mara Army (Chhipa hruaimi) cu an hrawk I, MDF (Maraland Defense Force) tiah an thlen. MATC timi Mara Cozah zong department 10 leng he an ser khawh. MDF cu CJDC member asi tho tho rih.

An Chunmang bik Policy cy Mara le India hi District hal ve ding asi. Ahnu ah fonh in Maraland Sate dirh kha asi. Cucu CJDC ah an langh ter lo. An Politic Vision pek ding ah MAH le SAC kha USDP Upa (2) nih cun an duh deuh hna. Ralhrang Rallokap cu Meithal in tei ci asi lo caah Political Dialogue tu in kan tawn hna lai tiah USDP upa (2) nih an ti khawh hna. Dr. Andrew Ngun Cung Lian hi an advisor asi. Cucu Dr. Sa Sa zong nih a duh ve caah dai tein a um I uithih in athih nak cu asi.

Mara Mino nih le Meithal pek in Raldoh lawng an duh tikah, Mara nupa hna nih Raldoh thlauh ding in Upa hna nih thluak an chuak. India le Kawlram Mara upa le mifim thiam vialte in tawn in, Raldoh lo ding ah meeting an tuah. Pastor te cu Palai ah an hmang hna. Lailenpi Rallokap he Raldoh lo ding in hnathlaknak an tuah khawh.

Pastorte le Upa hna nih bia an thlah mi cu Dr. Sa Sa cu zathang ca lawng ah rianṭuan mi asi. A zung ah zathang lawng rian a pek hna, An zam ah zathang vialte aa zam pi dih hna, India ah lahkhah a pek hna. Mi bawi cu ram caah thih tiang in khuaram an zam tak lo. An nih Dr. Sa Sa cu Lailenkhua a zam tak tiah an sizung hna. Capi khua ah asak mi siizung ah Zathang lawng rian a pek hna.

Mara dang rian an kan pek duh lo. India le Kawlram hi duh poah vak khawh ding in Dr. Sa Sa nih an kan hlen tiah Mara mipi le Mino cu an hlen hna. India le Kawlram um Mara miphun le Global Mara nih Phaisa tampi thawh in, AA bang in Maraland Army nganpi serh kha an chunmang asi. Ralkap thazang a ngan tikah, India le Kawlram nih hmaizah in ṭihmi Mara Miphun asi hnu ah Cabuai cung biaruahnak in Maraland State hal kha an target bik mi asi.

An chunmang tlinter awk ah NUG le CNA, Aralaimi chin Cozah le Chin Politicians hna sin ah an hna bei a sei lo, MAH le Ralhrang cu Upadi ning loin an duh mi tuah piak khawh tu asi tiah USDP (2) le Dr. Andrew NCL lamthluan in an kal. Cucaah Raldoh loin MAH nih UWSA btk in PEACE le Dialogue he I tawn hnu an duh mi State hal kha an hngak buin, Raldoh bantuk tein um kha an chunmang asi.

Ralhrang ral adoh duh mi Mara Mino hna nih an duh lo I CDF Mara an tuah. Cuticun Buainak hram cu aa thawk.
Cucaah MDF le CDF Mara buainak hi daihter duh ahcun: CJDC, CBCUSA tbk le midang sawm in sualphawt a herh lo. MDF chakhri tlaih tu upa vialte kha I din hna sehlaw, Ramdang un MDF upa hna zong I din hna sehlaw, amah tein a dai ding asi.

UK PM pawl cu lung I hmuh thiam lonak aum poah ah anmah tu an I din. Vawleipi hruaitu Dotla mi le Hruaitu ṭha vial te zong. Maraland State hmanh hal a duh mi MDF upa vialte nih buaibainak daih ter awk ah le Mara mipi zawnruah nak in nan rian in nan I dinh ngam ko lai ti zong ka zumh fawm. Dawtnak thinlung taktak he, Huatnak pelte hmanh aa tel lo.

Ram chung le Ramdang mi fimthiam hna nih Supreme Council Zotung Organization cu an dirh. Supreme tang ah CDF Zotung cu an chiah. Mumal le Policy vialte tlamtlin tein an suai dih. Cuticun buaibai nak um lo tein can zei mawzat cu an kal hna.

Can rau lo te ah CDF Zotung ralkap nih harsatnak an tawn colh. CDF vialte cu CNF / CNA hruainak ah tang kan um lai ti asi dih. CNA nih tindan pek mi lawng te an si. CDF Zotung cu Supreme Council kut tang ah aum lai ti asi tikah CDF Zotung ralkap nih an duh ti lo.

An policy asi khawh lo mi tampi lak ah Pakhat cu Raldoh lai le meithal puak lai ah Supreme nawlpek nak loin nan tuah khawh lo ti asi. Zeitintiah meithal siseh, A herh mi dang siseh Supreme nih kan in rinh mi hna nan asi ti asi.
Ramdang um mi Zotung miphun hna nih Supreme sin ah phaisa tampi an thawh ve cang.

MDF le ZRA bantukin Zotung Supreme council tang lawng ahum ding asi caah, CDF Zotung ralkap cheuh khat nih an duh ti lo. Ramchung um Zotung upa hna nih Supreme cu upadi remh uh, an ti hna tikah kan remh khawh lo an ti.
Zotung upa lungfim (5) an thimh hna i, Supreme le CDF Zotung remh awk hma an lak. Ramchung Global Zotung meeting an tuah.

Supreme hi a herh lo, hrawk siseh law, CDF Zotung lawng in zalon tein dirh siseh tiah Zotung meeting pi nih biachahnak an ngei. Meeting tuah hlan ah Supreme nih biachahnak kan cohlan lai an ti nain an lung aa merh than. Meithal an zawk cia vialte cu Supreme nih an lak than dih. Zotung upa (5) nih lak hlah uh an ti hna. Ramsi Sakhan cu meithal lak loin Supreme ralkap in an chiah hna.

Zotung upa mifim (5) hna tlantlaknak thawng in Ramsi Meithal zun 7 zong cu CDF Zotung sin ah an pek dih than hna Supreme nih. CF Zotung min in CJDC nih an cohlan hna. Supreme Council Chinland Defense Force Zotung Organization min in CJDC nih cohlan lo mi asi. Nai hrawng ZZLMS le MDF buaibai nak ah Supreme min in Zotung nih caa an chuah mi hmuh tik ah khuaruah har lo awk a tha ti lo.

CDF Zotung tiin min tha tein aum ko mi Supreme ee, Zotung Organization ee vei ee zei ee ti hi asi khawh lo mi asi.
Supreme council Zotung hi MDF le ZRA bantukin CNA le CHIN ah pumkhat sinak a duh lo tu, Zotung nawlngeihnak sang bik cu Kan mah kan si. CNA, CJDC le ICNCC NUG asi khawh lai lo a ti tu ansi. Supreme timi uknak le nawlngeih nak sangbik ti asi, Pathian nawlngeih nak caah hmang tawn mi ansi.

Supreme council nih kan chuah mi hna minung 47 an ti nain, Global Zotung meeting nih hrawk cang mi Supreme an i thawh than caah CDF Zotung phu hnih ah aa then hi asi.

Fianternak: Supreme Council cathanh ah aum mi tlangtar le logo hi CDF dang he aa khat lo. CNA thantar zong an hmang duh fawn lo. CNA le CJDC caah virus asi mi Zotung Supreme Council ansi. Hmai lei caah chin virus le hlingso asi ding mi Supreme council ansi ko lo ma? Crd-Joseph R. Thang

Pu Sai Hmung Thihnak Kong He Petlai In CDF-Lautu Nih Fianternak An Tuah ! CDF-Lautu Cu a luancia 2021 May 4 in SAC ralkap dohtu dingah rak dirh a si i, Chin hriamtlai phu hna he voi 70 leng SAC ralkap kan doh ve cang i, kan ralkap 13 zong hliamhma an pu cang, tiah cathanh an chuah.

CDF-Lautu hmunram cu Chin ramkulh a laifang ah a um i, kan hmunram chungah check gate 11 kan chiah. Khualtlawngmi hna zong checkhlatnak ṭha tein kan tuah hna, tiah an langhter. CDF-Lautu cu SAC ralkap a domi kan si caah dalan fimhlawm, dohthlennak a dodalmi, mi ngiathlainak tuahtu le SAC ralkap kuttang minung hna thah ding tiang in aa hmaithlakmi kan si lo pinah kan policy zong ah a um lo.

A ruang tampi ruangah minung 50 leng kan tlaih hna i, thih dan kan pekmi a hohmanh an um lo, dantatnak kan pek hna hnu ah kan thlah ṭhan hna, tiah an langhter. Pu Sai Hmung nih tualchung mi cu pistol zun khat in a tlerhkhawn lengmang hna. MATC/MDF ralbawi zik nih minung thahnak nawl a ka pek tiah aa hrocer i, khuami nih kan sinah report an tuah lengmang caah a pistol zun khat le kuan 7 he 2022 October 9 zanlei sml 3:00 ah kan rak tlaih.

Pu Sai Hmung cu biahalnak ṭha tein kan ngeih hnuah MATC/MDF sinin minung kahthahnak nawl an pekmi kong cu fiang tein a chim caah nihnih chung kan hren hnu October 11 zanlei sml 3:00 ah kan thlah ṭhan. Pu Sai Hmung kan thlah hnu in zarhkhat a rauh ah a ruak in an charnak kong zong kan theih. Pu Sai Hmung thihnak kong he pehtlai in CDF-Lautu nih kan thahmi a si hrimhrim lo i, kan thlah hnu in a chungkhat sahlawh rualchan he zong an i tong ko.

Pu Sai Hmung a thihnak hi MATC/MDF he pehtlaihnak a ngei, tiah an langhter. CDF-Lautu cu SAC ralkap a dohmi kan sin pinah minung pumpak, miphun ṭengngei le miphun dangdang nih sualnak an tuah ahcun a herh ning in dantatnak kan tuah hna. Dohthlennak hnahnawhnak petu paoh cu upadi ning in kan tawlrel hna lai, tiah CDF-Lautu nih cathanh An chuah.

SAC Ralkap Nih Kachin Bible Sianginn Cu Hriamngan In An Kah Caah Siangngakchia 4 Hliamhma An Pu! Shan ramkulh, Kuatkhine khua um KBC bible sianginn cu SAC ralkap nih nizan November 3 zanlei ah hriamngan in an kah caah siangngakchia 4 hliamhma an pu, tiah KIA ralkap sinin theih a si.

Zan sml 8:30 ah Kuatkhine khua um KBC khrihfa bible sianginn chungah SAC ralkap nih hriamngan lung 3 in an kah caah siangngakchia 4 hliamhma an pu. An hliamhma a fak ngai ko nain an nunnak caah thingphang a si lo, tiah an langhter.
SAC ralkap nih hriamngan an kah ruangah Ndau Awng San, Myitung Doi La, Brang San le Sut Ring Awng cu hliamhma an pu, tiah theih a si.

Zahan November 3 zan sml 10:00 hrawng ah KBC bible sianginn ah SAC ralkap nih hriamngan kah nakin siangngakchia 4 hliamhma an put hnu zong in SAC ralkap nih pehtlai in hriamngan an kah, tiah theih a si.

Kalay PDF Le SAC Ralkap Kahdohnak Ah SAC Ralkap 3 An Thi! Nizan November 3 zing sml 3:00 in Kalaymyo in Kalay thlanglei ah rallam a sialmi SAC ralkap 80 leng cu, Myogyi khua le GTI karah zing sml 6: 50 ah bomb in kan puahhnawh hna, tiah Kalay PDF nih cathanh an chuah.

Cu bomb puahhnawhnak ah SAC ralkap 3 an thi i, hliamhma pummi an tam. SAC ralkap nih pawngkam cu minutes 5 chung hrawng an kah hnuah a luancia October 31 ah an rak tlaihmi tualchung mi 3 cu, GTI sianginn in SAC ralkap 40 hrawng nih kadang hmun ah an kalpi hna. Kalaymyo um SAC ralkap nih zing sml 11:00 hrawng in hriamngan in kah an bawmh hna i, hriamngan kuan cu Thohcian khua ah a tlak caah pitar kum 71 hliamhma a pu, tiah an langhter.

Madaya Ah Rallam A Sialmi SAC Ralkap Bomb Puahhnawh An Tong I, Ralkap 3 An Thi, Hliamhma Pumi An Tam! Mandalay ramṭhen, Madaya peng ah ke in rallam a sialmi SAC ralkap cu PDF nih bomb in an puahhnawh hna caah SAC ralkap 3 an thi, ke kiak le kut kiakmi an tam, tiah Nat Soe PDF in an hruaitu Nat Soe nih a chim.

Nizan November 3 zanlei sml 2:00 ah Madaya peng Kaukselay khua le Nyaung Ngoh khua kar ah ke in hmun hnih ah rallam a sialmi SAC ralkap cu bomb puahhnawh an ton caah ralkap 3 an thi, hliamhma pumi an tam, tiah theih a si. Rallam hmun thum in sial ding in timh tuahnak an ngeih lioah an motor Htaw Lar Gyi cu bomb puahhnawh a ton caah SAC ralkap 3 an thi. Ke kiak le kut kiakmi an tam. Daung PDF le Nat Soe PDF i bawm in an puahhnawh hna, tiah theih a si.

Monywa Ah SAC Ralkap Le Pyusawhti Bomb Puahhnawh Ruangah 10 An Thi! Sagaing ramṭhen, Monywa peng Nagatwin(နဂါးတွင်း) khua ah rallam a sialmi SAC ralkap le pyusawhti cu, nizan November 3 ah bomb puahhnawh an ton caah SAC ralkap le pyusawhti 10 an thi, tiah theih a si.

SAC ralkap pawl cu zing sml 7:00 hrawngah pyusawhti an tamnak Tawpu khua in Nagatwin khua ah an lut i khuami inn le lo an khangh. Zanlei sml 5:30 ah pyusawhti 4 cu bomb thianhhlim ding in an kal lioah a voikhatnak bomb kan puahhnawh hna i a hmun ah an 4 ning in an thi, tiah Monywa Peregrine PDF in bawino Lay Paw nih a chim.

SAC ralkap 10 le pyusawhti 10 leng nih khuami an facang, chiti le thilri dangdang an fir i, zanlei sml 6:15 ah bomb in a voihnihnak kan puahhnawh ṭhan hna i SAC ralkap 6 hrawng an thi,” tiah bawino Lay Paw nih a chim. Cu kahdohnak ah Monywa Peregrine People’s Defence Force, Daung brother PDF, Generation Z People Defence Force၊ Eagle PDF, Monywa pengkomh Battalion 1, M.P.D.F le Zar Ma Ni PDF hna i bawm in an kah hna, tiah theih a si.

SAC ralkap nih Nagatwin khua inn 9 nak tlawm lo an khangh i a ciam dih. Tualchung mi 7,000 leng a himnak hmun ah an zam, tiah theih a si. Nihin November 4 zinglei ah SAC ralkap pawl cu Monywa hmunram ah rallam an sial rih ko, tiah PDF hna sinin theih a si.

A luancia November 2 zong ah Monywa khua Suanye Htet(စွမ်းရည်ထက်) datsi dawr pawngah bomb thianhhlim ding in a kalmi SAC ralkap motor 1 cu, Monywa Peregrine People’s Defence Force nih bomb in an rak puahhnawh hna caah SAC ralkap 5 an thi i, 5 hliamhma an rak pu. Crd-The Chin Post