BREAKING!! Kan khualipi Hakha thil a cang mi!!

Mei Rat Lo Ruang ah Hakha Khuami Hna Harnak Tam Chin
=====================
Hakha khua ah zarh hnih chung hrawng pehtlai in electric mei a rat lo caah chumhkhinnak, Internet Wifi hmannak le phone hmannak lei ah harnak an hun tong ngaingai hna.

Hakha khuami pakhat nih, “Mei a mih tik ah kan hman tawnmi Internet Wifi zong a thi dih cang. A man a fak chinchinmi Mobile Data tu hi semrel in hman a si ko. Phone battery rawnnak kong zong ah harnak kan tong ngaingai hna,” tiah The Chin Journal ah a chim.

Meiseh (Generator) a ngeimi hna inn ah phone battery rawn cio a si nain azungzal in mi inn ah battery rawn zong cu hmai khah an si lo, tiah khuami pakhat nih a chim ve.

“Phone battery cu meiseh a ngeimi hna inn ah vung kal i rawn cio a si ko. Asinain, atulio datsi man a fah tuk tik ah mi inn ah va battery va rawn lengmang zong hi hmaikhah bak an si lo. Achel ah cun kanmah tein datsi hi kan cawk pah tawn ve,” tiah a chim.

Abikin, rawlchumhnak ah meihol hman a si i zaan mei vannak caah phazawngdan hman an si. An man zong vantawng in an kai colh ve hna.

“Meihol hi tun khat ah thong 10 hrawng in kan rak cawkmi a si. Atu ah cun tun khat ah thong 20 in cawk a hau. Achel ah cun cawk awk hmanh a um lo. Cun, phazawngdan hi ahlan thong khat a simi kha atu cu 1500 ah a kai cang,” tiah a chim chap.

Hakha-Gangaw lam, Nipi khua pawng lei ah Electric tung a kiakmi a um i, atu tiang Electric zung lei nih an remh kho rih lo. Zeitik an remh khawh lai timi zong fiang in theih a si lo. Crd-The Chin Journal

Kalay Ah SAC Ralkap Motor Bomb Puahhnawh An Tong, Motor Pakhat A Rawk, Sagaing ramthen, Kalaymyo peng ah SAC ralkap motor ruun cu tualchung hriamtlai pah-kah-phah nih bomb puahhnawh in kan doh hna tiah Heroes of Kalay nih cathanh an chuah.

October 30 zinglei suimilam 10:30 hrawng ah Kalaymyo motor lampi ni chuah lei in ni tlak lei ah a kami SAC ralkap motor 3 cu PDF Kalay pah-kah-phah phu nih Kyutungpin sang Sin khua lampial ah bomb puahhnawh in kan doh hna hi a si tiah thanhmi ah cun an langhter.

SAC ralkap motor bomb puahhnawh in kahdoh an ton caah a hnubik ah a kalmi ralkap motor pakhat cu bomb hliamh a tong i, lamkam ah a dir, a cung cuangmi SAC ralkap tamdeuh cu hliamh an tong tiah Heroes of Kalay nih cun an thanh.

Momauk Peng, Lungjabuam Kahdohnak Ah SAC Ralkap 81 An Thi, Kachin ramkulh, Momauk peng Lungjabuam(လုံဂျာဘွမ်) tlang ah SAC ralkap le KIA, PDF phufonh kar ah kahdohnak fakngai in a chuak i, SAC ralkap lei in a tlawmbik minung 81 an thi tiah KIA nih fehternak he an chim.

Kachin ramṭhen, Momauk peng chung Lung Ja Bum Tlang kahdohnak ah SAC ralkap (81) an thi tiah theih a si.
Tho[Oct] 29 i KIA, PDF phukomh ralkap hna le SAC ralhrang rual hna i kahdohnak ah SAC ralhrang lei in minung (81) an thi. SAC lei a thimi an tam ruangah hriamngan le Vanlawng zong SAC nih a hman caah hriamngan tlaknak in nu pakhat hliam a tuar tiah theih a si.

October 29, kahdohnak ah a thimi le aa hliam mi an tamtuk caah, raltuknak vanlawng hmang in bomb thlaknak le hriamngan hmannak SAC ralkap lei nih an tuah caah tualchung mi pakhat nih hliamhma a tuar tiah theih a si.
October 29, zinglei ah SAC ralkap raltuknak vanlawng nih Lungjabuam(လုံဂျာဘွမ်) tlang cu pehtlai in kahdohnak a tuah, hriamngan hmang in chun ni tlak kahdohnak a tuah caah kaphnih kar ah fakngai in kahdohnak a chuah hi a si tiah theih a si.

Yesakyo Peng Ah SAC Ralkap Nih Nikhat Chung Ah Inn 230 Leng An Khangh Piak Hna, Magway ramthen, Yesagyo peng khua li ah SAC ralkap hna nih nikhat chung ah tualchung mi umnak inn 230 leng an khangh piak hna tiah Yesakyo peng tualchung hriamthlai phu pah-kah-phah in tuanvo ngei tu ralkap Wai Kyi nih a chim.

SAC ralkap hna nih cun nizaan October 29, zinglei in khuachung mipi umnak inn khangh hram an thawk i, Maymahlan khua inn 53, Saitae khua inn 42, Tanpiachaung khua inn 75 le Khansattaw khua inn 63 tiin inn 233 an khangh tiah a chim.

“Zingka tein inn khangh ah an i thawh, khuachung inn an khangh ah hin kahdohnak a um rih lo, Saitae le Tanpiachaung khua an khangh i an chuah lei ah kahdohnak a chuak, cu hnuah khuadang zong an khangh than” tiah PDF Wai Kyi nih a chim. Khuachung inn khangtu SAC ralkap hi minung thazaang 80 leng hrawng an si, Yesagyo peng hrambunh khah-lah-yiah 256, khah-lah-yiah 257, khah-lah-yiah 258 in a rak ra mi ralkap an si tiah theih a si.

India, Mizoram Ah “Matauk Mihtaw Moe Kha Ye” Flim Hmuhsaknak An Tuah, Rupee Sing Khat Le Cheu Leng An Hmuh, India, Mizoram ramkulh Aizawl ah director Ko Pauk nih a thlakmi “Matauk Mihtaw Moe Kha Ye”( မသောက်မိသောမိုးခါးရေ) flim hmuhsaknak cu October 29 ah an tuah i a zohtu minung 500 hrawng an si caah tickets man le phaisa hlut mi in hmuhmi dihlak hi Rupee 171,000 a si tiah theih a si.

Flim hmuhsaknak a tlamtlin khawhnak ding ca tawlrelnak ah rupee 51,100 a dih i, a taangmi rupee 119,900( Myanmar phaisa in sing 30ks hrawng) cu “Matauk Mihtaw Moe Kha Ye”( မသောက်မိသောမိုးခါးရေ) flim tawlreltu phu sin ah an ap lai tiah theih a si.

Chin Ramkulh, Rihkhuadar Ah Minutes 4 Hrawng SAC Ralkap Helicopter A Tum, India-Myanmar ramri Rihkhuadar no.1 sang ah a um mi SAC ralkap sakhan ah nihin October 30, zinglei suimilam 11:30 ah SAC ralkap helicopter pakhat a tum tiah theih a si.

Cu helicopter cu a tum minutes 4 hrawng a rauh hnu ah Falam lei ah a zuang than tiah tualchung mi hna nih an chim.
A luancia nithum lio ah no.2 sang tlangbo um SAC ralkap hna cu khuachung an tum lio lampi ah bomb an i lamhsual caah minung 4 nih hliamhma an tuar i sizung ah an kalpi hna tiah theih a si.

Chungkhar Pakhat Nih PDF Ca Ah Lungvar Mansung An Pek Hna, SAC ralkap a do cuahmah i Sagaing ramṭhen ah hram a bunhmi 96 Soldiers-PDF sinah chungkhar pakhat nih lungvar mansung an pekchanh hna, tiah theih a si. Chungkhar pakhat nih lungvar (hring) bor 3 cu dohthlennak ca ah hman dingin an ngeih chunmi te an kan pek, tiah 96 Soldiers-PDF in ṭuanvo ngeitu pakhat nih a chim.

Lungvar (hring) an kan pekmi cungah lunglawmhnak tampi kan ngei. A rauh hlan ah kan zuar lai i dohthlennak ca ah kan hman cang lai. Dohthlennak tangka kawlnak caah mee lehhmah kan zuar cang lai, tiah 96 Soldiers-PDF in ṭuanvo ngeitu nih cun a chim. Nawlngeihnak latu SAC ralkap a doh chuahmahtu Sagaing le Magway ramṭhen PDF hna sinah tualchung mi nih an ngeihchun an sui le ngun an pek pah tawn hna, tiah theih a si. Crd-The Chin Post