BREAKING; Kan Chin ramkulh khuapi pakhat thawngpang vun theih cu dah!!

Chin Ramkulh, Matupi Ah SAC Nih Khualtlung Cazin An Check Than!!
=====================
Chin ramkulh, Matupi ah SAC ralkap nih khualtlung cazin an check than tiah theih a si. Nizaan November 6 zaan ah, Anaukkhu(အနောက်ခို) lei ah khualtlung cazin an check, an thilri zong an check dih hna, cun Laungban lei inn cheukhat zongah khualtlung cazin an check i inn pakhat cu a bauh in an bauh tiah khuami hna nih an chim.

A hlan ah, chungkhar cazin an lak dih cang ko nain, chungkhar cazin ah ai tel ko nain Matupi khuachung ah a um lomi cu, khoi ka dah an kal timi le an kalnak khua/ram ti tiang in biahalnak a kan tuah dih tiah khuami hna nih an chim tiah theih a si.

Madaya Ah SAC Ralkap Motor Bomb Puahhnawh An Tong, SAC Ralkap 9 An Thi I Motor 2 A Rawk, Mandalay ramṭhen, Madaya peng Taungkai khua le Hintakone khua kar ah nihin November 7, chunhnu ah SAC ralkap motor ruun bomb puahhnawh an tong tiah theih a si. “A thimi zong an tam i, hliamhma tuar zong an tam, a thi mi le hliamhma tuarmi hna cu motor ah an khin hna, a rawkmi motor pahnih tu cu an kaltak” tiah tualchung mi pakhat nih a chim.

“Atu tiang ah cun a dai na in, tu zaan hi SAC ralkap an hran lai phan a um ko, zeitik ah khuachung an luh lai le an buai lai timi hi theihcia a si lo caah thinphang in kan um ko” tiah tualchung mi pakhat nih a chim. Tutan SAC ralkap motor bomb puahhnawhnak a tuah tu cu Natsoe hriamtlaiphu an si tiah theih a si.

HpaAn Khuapi Cozah Zung Kiangkap Ah Bomb Puah Thawng A Thang , Kayin ramkulh, HpaAn khuapi cozah zung kiangkap ah November 6, zaan suimilam 8 hrawngah bomb puah thawng a thang tiah khuami hna nih an chim tiah theih a si. Ai hliam mi an um le um lo kong bel theih a si lo nain kum 67 nak Kayin State Day an tuahnak certual kiangkap le ramkulh zung ah bomb puah thawng tucu fiang tein kan theih ko tiah khuami hna nih an chim.

Kayin State Day an tuahnak ah SAC lutlai cheukhat an ra lai tiah thawngpang a leen caah SAC ralkap hna le amah lei tang hriamtlai phu hna nih irunvennak caah biatak tein an cawlcang. “Irunvennak (security) caah BGF, KNU/KNLA PC, DKBA zong an auh hna tiah kan theih, bomb a puahnak zong hi irunvennak an laak nak hmun ah a puak mi a si caah a hmun ah hohmanh kan kal kho lo i a cheu cu a zum lo zong an um” tiah khuami pakhat nih a chim.

Kum 67 nak Kayin State Day cu Ramkulh SAC chungtel riantuan tu hna tlangtlak nak in an tuah mi a si i minung an hlunghlai khawhnak dingah sianginn a kai mi siangakchia zong an laam ter hna tiah theih a si.

Palaw Peng Ah Rallam Sialtu SAC Ralkap Bomb Puahhnawh An Tong, 10 An Thi, Taningtharyi ramṭhen, Palaw peng ah rallam sialtu SAC ralkap hna cu nihin November 7, zinglei suimilam 6:00 hrawng ah bomb puahhnawh an ton caah minung 10 hrawng an thi tiah PDF chungtel hna sin in theih a si.

Palaw peng hrambunh battalion 285 in SAC ralkap minung thazaang 50 hrawng cu Palaw in Myait lei an kal i Minhting khua an phak ah tualchung hriamtlai phu, Myait pengkomh battalion 1 nih bomb lung 6 in an puahhnawh hna caah SAC ralkap 10 an thih i hliamhma tuar an tam hi a si. “SAC ralkap hna cu bomb puahhnawh an ton caah kaphnih kar i kahdohnak minutes 50 tluk hrawng a chuak, cu hnu ah kanmah leikap hliamhma tuarnak um lo in hnu kan tolh kho” tiah Palaw hrambunh PDF ralkap chungtel pakhat nih a chim tiah theih a si.

KIA Hmunram Mai Jayan Khua Hriamngan In Kah An Tong! Kachin ramkulh, KIA an uknak Mai Jayan Khua cu November 6 chun ah SAC ralkap nih hriamngan in voili an kah, tiah tualchungmi hna nih an chim tiah theih a si. “SAC Ralkap nih zaanlei suimilam 1 hrawng ah hriamngan voili an van kah i Mai Jayana khuachung minung umlonak inn pakhat ah a tlak caah a thimi le ai hliammi an um lo” tiah tualchungmi hna nih cun an chim.

Japan Prime Minister Nih Runvennak Ca Hman Ding Budget Chap A Timh!, Japan Prime Minister Fumio Kishida nih kan ralkap thazaang a thawn khawhnak ding ah runvennak caah kan hmanmi Budget cu a hlannak in kan chap a herh tiah a chim. Prime Minister Fumio Kishida nih cun Russia nih Ukraine a tukmi le North Korea nih Missile hneksaknak a tuah lengmangmi cungah a duhlonak kong zong a chim chih tiah theih a si.

Phunglam zeihmanh a thei lomi le mi ramdang zalennak zei hmanh ah a rel lomi ram hna nih thazaang in tlerhkhonhnak kan ton sual hlan ah kan thazaang kan thawnter i kan i timh tuah cia a herh, tiah Prime Minister nih cun a chim chap.

Chin Ramkulh, Kanpetlet Peng Chung Ah Thingkep Par Tawh Lo Dingin An Khap!! Chin Ramkulh, Kanpetlet peng chungah thingkep par le ramtang in a chuakmi pangpar dang hna kawl in zuar le cawk ti lo ding ah Kanpetlet peng mipi ukhruainak phu le pawngkam zohkhenh tu phu nih October 28 ah khapnak cathanh an chuah tiah theih a si.

Kan ram sining zoh chun in chawlet tu hna nih chawleh chawhrawlnak an tuah tikah a let tam tuk in thil man an kai ter pinah, thingkep par le ramtang in a chuakmi pangpar hna cu an hrawn i an zuar ti thawng kan theih caah atu bantukin cathanh kan chuah hi a si tiah an langhter.

Cu kan khapmi vialte nan zulh duh lo ah cun daan pek nan si lai, cun ramtang ah nan hum him nak kong he pehtlaiin thil pakhat khat a chuah ah cun nanmah ṭuanvo a si lai tiah mipi ukhruainak phu le pawngkam zohkhenh tu phu nih an langhter chih tiah theih a si.

Paletwa Peng Ah Tualchung Hriamtlaiphu Nih Mipi Facang Tuan An Bawmh Hna!! Chin ramkulh, Paletwa peng tualchung hriamtlai phu si mi CDF -Paletwa le CNA ralkap hna nih Paletwa peng chung facang hmun pakhat ah facang ah le cil an bawmh hna tiah thei a si. “Tukum cu tlanglo facang hmun ah zu an tam i facang zong a caan lio i tuan lo ah cun a tlol dih ding an si, lo ngeitu hna zong nih bawmh a kan hal caah kan nih zong mipi veng tu mipi ralkap kan si caah kan bawmh hna ” tiah ralkap pakhat nih a chim.

Tanzania Ram Ah Khualtlawng Vanlawng A Tla I Minung 19 An Thi! Tanzania ram Victoria tili cungah nizaan November 6 ah minung 43 citmi khualtlawng vanlawng a tla i minung 19 an thi, tiah Prime Minister Kassim Majaliwa nih a chim. “Tanzania Vanlawng a tlami hi Precision Air a si i vanlawngtual he meter 100 hrawng a hlatnak Bukoba khua pawng ah khua caan chiat ruang ah a tlaknak hi a si, tiah ralbawi William Mwampaghale nih a chim.

Tualchung hruaitu pakhat nih cun,” PW 494 khualtlawng vanlawng cu vanlawng riantuantu minung 4 le khualtlawngmi minung 39 an i citmi a si. Dar es Salaam vanlawngtual in Kagera ah kal ai timmi a si. Hi vanlawng a tlak hnu in tili chungah minung 26 kan chanhchuah manh hna i sizung ah kan kalpi manh hna, tiah a chim. A tubantuk in khualtlawng vanlawng tlaknak kong ah siseh, a thimi chungkhar hna caah siseh an ngeihchiatnak ka hrawmpi hna, tiah President Samia Suluhu a chim ve tiah theih a si.

ChianMyaTharSi Peng Palik Sakhan Le TatMaWaTi Palik Sakhaan Bomb Chehhnawh An Tong, Mandalay ramṭhen, ChainMyaTharSi peng palik sakhan le TatMaWaTi palik sakhan cu November 6 zaanlei ah bomb chekhnawh an tong tiah theih a si. November 6 zaanlei sangah palik sakhaan chungah bomb chehhnawh an tong i bomb puah thawng a thang tiah sakhaan kiangkap um mi hna nih an chim tiah theih a si.

“Bomb chehhnawh an ton caah an sakhaan cu an phih dih, mi chawhhlat chehnak zong an tuah, sakhaan chung bomb puah thawng a than le cangka in mizaw phurtu motor zong a lut colh ve” tiah cuka hmun kiangkap a um mi pakhat nih a chim. Kawlrawn lei ah SAC ralkap le palik dohnak an tuah tikah meithal nak in a hleiin bomb an hman deuh peng tiah theih a si.