Mi huaisen ka kawi NG Lian
=============
A huaisen lawng hlah, ral hmai ah a thluak a tli, a ral a tha, khua a tuak kho colh bakmi, a hawile a naule lak ah pumrua tha, mi nunsiang bakmi a si. 2021 May thla chung ah a si-A ni hi kai chinchiah kho ti lo. CDF Hakha in kan rak um lio ah a si. Hi lio ahhin CNA ralbawizik Pu Hla Htun nih, “URF timi a rak kan dirhter i, kan commander Salai Ngun Sang Aung nih, NG Lian telh in lamzawh lio i a hawile cheukhat a rak kan auh,”.
Lungtho tein le thatho ngai in Camp in kan rak i thawh ve. Hakha khuachung kan luh bak in Mission kan rak ngei i voikhat kan rak tlawth. Kan i lungsi bak ve lo i mission dang kan i suaisam. Mission kan rak kal lai ahhin, “Kuan kan i seh i, ka ram, ka miphun ca ah ka nunnak pek a herh si cun ka pek colh lai, ka mipi ka ven hna lai,” tiin biakamnak kan tuah.
Cuti cun kan hun um i, lakhruak mission (emergency) tuah ding a um. Kan commander Salai Ngun San Aung nih a kan auh, “Khah, dothnih mission kan nei. Dotkhatnak kan hlawh a tlin lo a si cun dothnihnak kan nam hna lai,” a kan ti i, a nung in a kan tlaih sual a si cun, kan kuan hna a dih i a kan kulh sual a si cun tiah mah le mah i thahnak kuan khat cio kan angki zaal ah a kan senhter.
Suimilaam 7:00PM hrawng si, ruah tlaak ai tim, thlitu a hrang. Van kan zoh dum zuai in a um ko. Kan sakhan le Hakha khuachung hi minute 30 fai kal a si. Kan hun i thawh hna, mission a dot khatnak cu kan phak bak ah a rak lan manh. Ummm… a si cun dothnihnak mission, BOC le Innwa Bank hngak uico va kah ding a si.
Minung kan tam nain meithal kan i tingzo hna lo i pali lawng ralhmai ah kan kal. Kan commander pa nih kei Pistol a ka pek, ka kawi NG, Lai Kulh le a nih hi Auto meithal an i tlaih. Thla kan vun cam, mission a dot hnihnak kan hun thawk. Kannih vanchiatnak ah kan kalnak lam ah kaphnih tang (Dalan) pa inn kan rak tan ai. Mah lio ahkhan a kan hmuh i si theu lai, Uico sin ah thawng a thanh hna i uico nih an rak kan fuh.
Ka kawi NG hi a hmaicem ah a kal. Kei le kan commander pa hi chak thlang in kan kal. Uico nih a kan fuh ve ca ah NG he an i tong. Kei le kan commander pa hi zaamnak kan kawl, chak kan zoh a sang, thlang kan zoh a thuuk. Kan ruah lo piin kan i ton ca ah NG zong thuhnak le leeknak caan hrim a nei manh ve lo. Kei le kan commander pa tu cu therh pah bu in nuhmei nu inn ah kan hei pet.
Ka kawi NG cu ralkap he hmaitonh bakin an i tong. Ai thawh i, uico pawl cu, “Yiah… ralkap nan si lo maw? Keimah nawl loin zei ca ahdah nan vahvaih. Ralkap kan biathup (password) chim uh.. tiah a hun hrocer hna. Kei le kan commander pa cu cawl lo tein kan um an bia kan ngaih. NG hi an tlaih cang ko hi teh tiah kan thin a domh in kan i domh. Cu tlawmpal lo ahcun NG nih uico pahnih cu kanmah lei ah a hun i ratpi uahmah hna.
Cu lio zong ahcun uico pahnih cu ralhmai kal an thiam lo i NG nih a hro a hro hna hnu ah voi khat veve an tang in a tlaih hna i a bengh hna. Meithal aa tlaih mi ah CNA timi aa tial. Ka meithal in an ka ngerh lai ti a ruah ca ah NG nih cun, “Hi meithal hi Thantlang kahnak ah kan laak mi a si hih,” tiah awka hraang nawn in a hun chimh hna. Uico pahnih nih, “Hoke keh, hoke keh Bugyi,” tiah therh nawn in an leh.
Cuticun, a hun i ratpi hna i a muihnak a phak bak ah NG nih a meithal zang phak…phak…phak… tiah a hmeh. A puak lo ai. Kei le kan commander pa hmaika bak a si i ti awk kan thei ti lo. Chuak sih a ka ti ah kan commander pa cu a hun chuak i uico pa a keng le a meithal par ai tawng.
A meithal zang a hmeh bak in lam ah a tlu. Meithal a hun puak cun, cunglei nih an hun lan thuat uahmah. Lungrethei in kan um lio ah inntang ah rem tein a rak bawhmi Laikulh nih Auto in a vun thuat ciammam hna i him tein kan chuak kho. Sian lo bu tein hlawm khawh lo, zitmuai manh loin nilinh, ruahsur thlihran lak ah atu cu a um ee. Crd-Salai Tluangte