SAC Ralbawi Pahnih Nih Aung San Suu Kyi Cu Thonginn Ah An Va Ton
========
Uknak a latu SAC ralbawi pahnih Lieutenant General Ya Pyi le a pension cang mi Lieutenant General Khin Oo hna nih Aung San Suu Kyi cu a tlaknak Naypyidaw thonginn ah May 27 ni le June 4 ah khan an rak ton, tiah The Irrawaddy nih a ṭial.
SAC ralbawi pahnih nih cun Aung San Suu Kyi cu atu lio ramchung thilcang kong an va chimh pin ah PDF pawl cawlcanghnak donghter ding in an chimhruah, tiah theih a si. Aung San Suu Kyi nih Lieutenant General Ya Pyi le Khon Oo cu zeibantuk bialehnak hmanh a pe hna lo, tiah theih a si.
Rihkhawdar SAC ralkap sakhan in ralkap pahnih CNDF sin ah an zaam; Chin Ramkulh, Falam peng, Rihkhawdar ralkap sakhan chung in SAC ralkap pahnih cu CNDF ralkap sin ah an zaam, tiah 2023 June 10 ah cathanh an chuah.
Atu a zaam mi SAC ralkap pahnih hna hi June 6 ahkhan CNDF ralkap check gate ah MA1 zuun khat, kuanbawm 4, kuan 330 le MG1 kut cheh bomb pakhat hna he an tlaih mi hna a si.
Atu bantuk in a zaam mi SAC ralkap pahnih hna hi, Chungkhar he zalong tein an i chawnh khawh lo ruang ah le zalong tein an um khawh lo ruang ah a zaam mi an si, tiah theih a si.
Cun, atu a zaam mi hna hi Rihkhawdar SAC ralkap sakhan in duty an tuah lio June 4 ahkhan a zaam mi an si.
Atu a zaam mi SAC ralkap hna umnak Rihkhawdar sakhan ahhin ralkap thazaang minung 55 an um i minung 10 leeng cu mipi ralkap sin ah an zaam tiah theih a si.
Lentecelh Thawngpang Bultan: 1. Zarhtezan zanṭim(Jun 11) ah UEFA Champions League Final cu Istanbul khuapi, minung 75,000 tlumnak Ataturk Olympic Stadium ah English Champion Manchester City le Italian club Inter Milan nih an chuih i, goal khat in Man City nih an tei hna. Goal suttu hi Spanish laikal Rodri a si.
2. Atutan hi City nih ULC hrai an thlir hmasa bik a si i, EPL le FA cup zong an laak caah ‘Treble Champion’ tiah auh an si. English club lakah kumkhat chung i hrai 3 a thlir kho mi pahnihnak an si. 1998-99 kum ah khan Manchester United cu treble champion an rak si cang.
3. Pep Gaurdiola nih hin City a zohkhenh hnu ah players cawknak ah £1.074 billion a dih. Man City a luh kum 7 hnu ah City nih an duh bik mi UCL hrai cu a laakpi khawh hna.
4. Man City cu treble champion an si caah an hmaikal, EPL goal tam bik a suttu le golden boot a cotu Erling Haaland cu sui pumpululh(Ballon D’or) co kho ding in zumh a si i, World Cup teitu Messi he cuaithlai cem an si lai tiah zumh a si.
5. Tuzing(June 11) ah UFC 289 cu British Columbia, Canada ah ngeih a si i, Main Event ah Nu Bantamweight champion Amanda Nunes nih amah zuamcawhtu Irene Aldana cu round 5 an i phomh hnu ah Judges biakhiahnak in a tei. Amanda Nunes nih teinak a hmuh hnu ah UFC in kaa din cang lai, tiah a chim.
6. UFC 289 Co-main event ah Lightweight champion hlun Charles Olivera le pehtlai tein voi 8 khengte teitu a ngei ti lo mi Beneil Dariush cu an i phomh i, round 1 dongh lai ah Charles nih TKO(Technical Knockout) in a tei.
7. Hmaithla(July 10) ah UFC 290 a um ṭhan lai i, Main event ah Featherweight champion Alexander Volkanovski le Interim Featherweight champion Yair Rodriguez an i phomh lai. Cred; The Chin Post