Bomb Thawng Le Meithal Thawng Lakah Ar An Hung Khuang!

BOMB THAWNG LE MEITHAL THAWNG LAKAH AR AN HUNG KHUANG!
=============
Hakha: Nizan Sept 20. 2021, 11:30 PM hrawng cu Bomh thawng le meithal thawngin a khat țhan. Chikhat te thawngpang a hun dai deuh i dide ngaiin ka țhut ko lio ahcun, zeithawng pang thei lo bang, Ar an hung khuang lulhmalh hna!

Zan tam ngai kah thawng a thang cang i mahlak ahcun, Ar khuan thawng zong ka thei bal lo. Ar an hun khuan hnu zawng cun puah thawng voitampi a um rih. Ralram i a ummi nih an chim tawnmi cu, biatak te i kan i kah ahcun Ui le Ar zawng nih an țih i an awn au ngam lo an ti tawn!

Sihmanhselaw nizan cu Bomb thawng le Meithal thawng kar lakah Ar an hun khuan thawng ka theih tikah phundang pi khin ka chunglei ah hnangamnak le lawmhnak ka ngei. Cutluk tluk i Bomh puak thawng a thangmi le Meithal thawng a thangmi lak i ngamh taktak i Lai Ar kawng pawl an hun khuan lulhmalh mi hi a sawhsawh a si bal lai lo tiah ka ruah. Tei Khuan a si kho ko lo maw? Zeitin nan ruah ve?

BAWIPA kan PATHIAN nih, Ar khawng hna hmangin, Hakha khuami hna țih hlah u, nan thinphang hlah u a kan tinak a si ko hnga lo maw? Sermi thil vialte PATHIAN Lamkaltu an si țung?

THANTLANG KHUA MI HNA SIN BIACAH. Dawtmi, Thantlang khuami vialte hna mithli he Thantlang khua nan chuah taak ko lai. Sihmanhselaw nan lungdong hrimhrim hlah u.

Thantlang khua hi BAWIPA nih a philh hrimhrim lai lo. Nan va um chungnak cio khan, BAWIPA Hmaikawl buin, thlacam cio u law, BAWIPA nih khua a ven i a himnak hnga le teinak he tuanah kir a si țhannak hnga, rawlulh pah lengmangin thla rak cam cio tuah u.

Hibantuk caan hi BAWIPA he i tonnak caanțha ngai a si i, PATHIAN Vel le Zaangfahnak hmuh a ol ngai caan zong a si. Zu le zuk hmuam te hna, kan ziaza țhalo le lungput țhalo te hna kan i țhinhnak caah caan țha ngai zong a si.
Thantlang khua caah a biapi cemin ka ruah mi cu, THIANG THLARAU nan rak lawmhter lonak um sual aikun, Thantlang khua PATHIAN rianțuantu vialte le khua aiawhtu vialte nih a hleiin lungțhumin sual rak phuan hna u.

Kannih zong nih rawlulh pah lengmangin thlacam kan thok ve cang. Chinmi/Laimi vialte hna kan khuapi hna le kan khua cio a himnak hnga, rawlulh lengmang in le kan sual phuangin thlacam ko hna usih. Tuah khawhmi kan ngei ko rih hna hih! Ahohmanh nan lungrawk in nan lungdong hrimhrim hlah u.

Zeizong vialte a tuah khotu, Zaangfahnak le Velngeihnak in a khat mi, a donglomi Dawtnak in a kan dawtu BAWIPA pei kan PATHIAN a si cu! Cutin kha tin, cuti kha ti tikah si selaw, tiin ruahnak chuah len caan a si ti lo, kan duh, duhlo a si ti lo, kan thinlung dihlak, kan sining dihlakin, kan PATHIAN au ko hna usih.

Cuticun pei, zeizong vialte a tuah khotu BAWIPA a țhawnnak cu a lang lai i BAWIPA zong nih Mințhatnak le Sunparnak zong a co ve lai. BAWIPA hi zuumin i bochan ko u, an caan a dih cangmi nih teinak hmuh phung a si lo. BAWIPA nih a kan halmi cu sining dihlak, Thinlung dihlak in kan hei auh te khi a si ko.

Rimnampa ruangah nan lungrawk in nan lungdong hrimhrim hlah u. Thlacam awk na theih lo tikah, BAWIPA sinah lawmhnak biatu chim diam ko u. Rimnampa a sungh caan a phak cang caah vantawngin sualnak tuah onh a si hih! Vanawngin a sualmi an dir kho bal lo. Amen. BAWIPA JESUH Vel cu nan dihlak cungah um ko seh. Daihnak nan cungah um ko seh. Lamkaltu, Tluang Lian (Martar)