Bogyoke Aung San sin cakuat

Bogyoke Aung San sin cakuat
=====================
Maw Aung San na chuahcam tuak kan rak lawmh i na thihcam tuak kan rak ulh tawn. 1915 February 13, Natmauk i na chuah cam bantuk siloin nihin ah cun rampi nih kan lungtlap ah kan tial i kan ram hruaitu Arfi det ni tiah kan chuankhan phah.

Clement Attlee he 1947 January 27 i ramkomh in independence lak le i peknak ding kong ah hnatlaknak nan ngeih hnu Shan hruaitu 9, Kachin 5 le Chin 3 he nang hruaimi Myanmar cozah aiawh 23 nih ninga chung tonnak nan ngeih hnu ah ramli komh in ramkomh pakhat dirh usi tiah February 12, 1947 ah hnatlaknak nan rak ngei. Cucu Ramkomh Ni (Union Day) tiah kan auh i na miphun hawi Kawl pawl nih kum fatin an kan tuahpi, tukum cu avoi 74nk zong kan phancang. A sinain nang bel cu panglong cahren min nan thut dih a thla ruk nak (July 19) ah an hun in phil kha a rak si mu.
Nang cu ilung hmuih ko. Union Day ah na zuk tar in na kong chim a si. Na min chuan in hla dawh dawh an phuah. Kan ngakchiat lio hoi ahcun “February 13 Aung San chuah camtuak” tiin dahkaw sianginn bak ah ca hna ah kan rak cawn. Nangmah he tluk tein mah miphun le ram ca cio ah a thlanti a luang i rawltam a tuar i panglong cahren ah cafung pakhat tein min a thut tti mi midang pawl cu an chuah ni zong ho nih dah kan hngalh hna i an thih ni le thih ning zong ho nih kan cinken hna! Union Day ah an min chim le an kong theih a um lo.

Maw Aung San, Chungkhar pakhat dirhti ding in tlangcung mi pasal tha tha hna he miphun ca hnuhmai ruah len dih hnu phunthawh, arsa le man vialte lungtlinnak he biakam cahren min nan rak thut ni cu na um lo hnu cun mu, duh lo na buin mitthli he fonhmi chungkhar dirhni maw a lo deuh tlaihhrem ningzah ton ruang i zeiti ttha tiah hni i khuh in mipa inn chung luh ni hen kan caah a lawh deuh cang ti kan ruat.

Nang cu an in phil law law i na taksa nih zei a thei ti lo. Kannih cu kan nung pahrim in mithi bang an kan tuahto. Kan hram an kan chah kanh i kan pur tung lo nain kan rocar. An kan hau tung nain an kan phet dok dok fawn lo i kan tluk buin kan zim chim tlak lo te a birh i an mi tuahtonak nikhua nih kan ai kaw kan zim zong khawt kho thi tha hlah.

Kan miphun sinak a ning piin iput in cungkhar kan rak dirh lai tiah bia nan rak kam mi cu a tu ahcun mu annih inntek-kannih mikhual, annih bawi kannih sal, annih ramngei kannih mipem bantuk dirhmun in an kan hmuh cang.
Na pu le pa chan in ho hmanh nih nan kan tu in nan kan lak bal lo le nan penmi kan rak si bal lo kha an ihngalh ter duh lo. Kan khuachiah le rawlrel ei bal khi bang kan tualpar cia ah an kan torsai hnawh.

Cu vialte cu mitchinh kamseh in kan in. Kan thisen le thlanti he dirhmi chungkhar kehkuai lai kan siang lo. Insein kha na hun hngalh ko lai, Kha tiang kha dahkaw ralkut ah a rak tlak bal cuh. Kan hleihlak an rak khiah i kutka bauh an rak timh lioah, kanmah fawh kan si chungkhar kehkuai lai siangloin nun a rak thap tu. Asinain na tufa pawl nih cu zong cu an i cinken duh lo. Kumpi kum 70 renglo sal dirhmun hluan in fale ngakttah lai ruah ah chungkhar kan khorh-awmh.

Thennak kan hal bal lo. Asinain chungkhar ah thaw nam umlo tlukruang tein cabuai khat i rawldum ti le mehkheng purh ngam ve cu kan duh ta. Chungkhar khat pei kan si cu. A thaw a nam a kik a lum aa tluk tein tinco le temtuar tti nak nih chungkhar dawtnak a fehter lai ti kan hngalh. Asinain na tule fa pawl cu mu kan siar tang arpi ti lio i tlaih riangmang in an i thah i bak huahmah in zu he an i meh lioah kannih cu ngapih rawh ceo an kan pek. Kawngbu lum lum an i thawnh lio ah khuasik tangkhawng ah babucawng chia zunkhat ceo an kan pek i kan i hnuhdawhnak ah a ttet dih cang.

Na Fanu Suu Kyi kha a tu cu kan ram lawnglo vawlei pi nih theihmi hruaitu a si cang.Rak kan chimh piak te law ka duh. Panglong cahren nak in Panglong lungput tu a biapi deuh tiah a kan ti. Panglong lungput cu ca in nan rak hren i min nan rak thut kha rak chim te muh. Panglong cahren tlamtling in tuanchuah ding hi Panglong lungput cu a si ti hi vunrang pawl nih sianginn ah an rak cawnpiak bal rua lo ta, sianginn sang sang ah ca a cawng an ti ko tung nain. Nu cingcih lo pa mawngmawh lo tiah na thihtak hna a tuan i ngaktah tuanh le chimreltu tha ngeih lo zo a lang tiah mi nih an ti sual lai.

Cun pakhat te, rualchan ningzak mising nihchuak tiah chim ningzak zong a si ko nain…Bahan i inn na roh tak mi hna pakhat te kha vawlei pi theih tlak loin a ta Aung San Oo he i cuh hna kaw mi hmai kan khap hrim hrim lo, hun si te law ka duh. Nang cu chuah man na ngei nun man na ngei i thih man na ngei ko. Kannih bel cu kan chuamcam le kan nunchan vialte kha kan thihni ah leikak dolh bang an kan phum piak dih i cu an phum ni zong cu an ke in an hmalh hoi. Maw Aung San nun man ngei, thih man ngei pa! Credit: Salai Ngun San Aung