Biatak Hi Ttanh Cio Usih. Atu Lio Hi Biatak Le Biahmab Raldohnak Asi.

Biatak hi ttanh cio usih.

Atu lio hi Biatak le Biahman raldohnak asi. Presidential Election men men asi thlu lo.
Democrat lei nih an chim mi hi lih le hrokhrol ai tel nak te te dah ti lo cu vulei mit hmuh in thil hmaan mi an si ko. Law nih a feh ter cang mi University Education nih a cawn piak ning le chanthar nunphung he ai tlaak ning in akal dih mi an si ko. Vulei cung miphun vialte kan i rem, kan i theih thiam dih khawhnak hnga ding ah ti in Diversity Culture nih kutka kaupi in a hon i cu chung ah miphun vialte hi khuasak khawh ter akan timh mi asi. Thleidannak puanzaar vialte hi Multiculturalism nih thleh piak khawh dih akan zuam piak. Minung kan duhthimnak cio, kan mah le kan i ruah ning cio hi i upatpiak cio i aho hmanh amah nih ai ruah ning pin ah i soisel i caak le i chimh hrin khawh ti lo ding in Multiculturalism nih hin a kan veen dih cio hna. Cu ruang ah hi revolution hi New World Order asiloah Color Revolution ti zong in an ti phah. Phun dang i chim ah cun a mizei poh nih Keimah iti khawh cio nak License akan peek cio dih. Hi ti i hei ruah ko ah cun a poinak a um lo ttung lo, a ttha tuk mi a lo ko i cu ruang ah chanthar fimcawnnak in degree sang ala mi poh nih cun hi New World Order hi an pom dih nak hi asi. A poinak cu hi New Order timi Multiculturalism chung muru ah hin Biatak, zumhnak a rak um ziar lo mi hi asi.

Pathian nih hin minung karlak ah nu cu nu asi ter ko i pa cu pa asi ter ko i nulepa karlak ah fian khawh lo ding in zei hmanh laklawh in a um ter mi aum lo. Nu cu nu an si ko i pa cu pa an si ko. Minung le saram lebang cu kan i hlaat chin chin. Cu bantuk in nu le pa cu SEX nih pumkhat ah akan canter khawh i cu nih cun family in society pi hi a hong um mi asi. Nu le nu, pa le pa hi SEX nih pumkhat ah a can ter kho hna lo. Zei tluk hmanh in Education, Law le Culture nih dirkamh hmanh hna seh law nulenu, palepa cu pumkhat an si kho hrim hrim lo. Fa an hring kho lo. Mah tluk i a fiang ko mi hi tuchan minung fimnak nih cun, kan mah le kan i ruah ning cio kha upatnak sang tuk a peek caah ka ngeih mi chiattha thleidannak hi ka thinlungput he ai rem lo, ai palh, pa ka rak si ko, nu ka rak si ko, ka karkalak i a um mi hi ai palh sual mi asi ti asi i cu ti i ser an si nak claim an tuah mi cu Education le Upadi le nunphung nih a co hlaan piak hna. Micheu khat lebang cu nupi le fate an ngeih hnu pi ah pa nih pasal a ngei i nu nih nusal (nupi) a ngei mi hna an tam pi cang. A ruang bik cu minung ruahnak, minung duhnak kha number pakhat nak ah ah chiah cang caah asi bik ko. Mah bantuk in Pathian nih ri le raan a rak chiah mi, a rak khiah mi lonh in vulei cung nunning system le phung le phai vialte ai thlen dih mi hi New World Order ti mi cu asi.

Nihin cu White House kam ah President Trump ttan pi nak mual pho ter asi cuahmah. An au thawng pakhat cu 1776 ti asi. Mah kong te hi langh ter ka van duh ve. 1776 American Revolution hi vulei cung system vialte a thleng dih tu asi. Cu hlan i vulei uknak phung a ttha lo mi vialte kha Democratic System in an van thlen i cuticun America timi vulei cung miphun vialte ai ruang in khua kan sak khawhnak Sanctuarry Country asi mi This is America pi cu a hung chuak. Mah ti le mah ram i khua a sa ngam lo mi chunmang zaan mang hmanh a manh ngam lo mi hna an kan cawm ken i himnak le duhdimnak nunnak zalak in an kan peek cio. Mah vulei pennak hram an rak thok ah hin an constitution hrim hrim ah Bible an rak i chirhchan i President nih Oath a chim ah “Help Me God” ti bia hrim hrim a rak i tel chih. Mah phunghrampi lonh in American society a kal cuahmah cang i mah cu hau leng i a chuak mi phung le phai vialte, kehleng pelh in kaar hlei a laam mi vialte a van rengh tthan tu ding ah Pathian nih Donald Trump hi Cyrus Siangpahrang bantuk in avan hman hi asi. Donald Trump personality hi tuchan mi hohmanh nih an co hlang kho lo ti cu theih cio mi asi. Asinain Pathian nih hi bantuk mi nung mithmai a zoh lo mi, zei hmanh a ttih lo mi, phung le phai zong a ruat lo, upadi zong pah a herh nak ah apah ngam mi hi zei ruang ah dah avan thim ti ah cun vulei cung hi sual tthawnnak nih faak tuk in a nenh chih cang caah asi. Amah bantuk mi lung khoh cho le mi mithmai azoh lo mi dah ti lo nih zei hmanh an tuah khawh ding mi a um ti lo. Cu caah atu lio i thil a cang cuahmah mi hi Pathian program, Spiritual Revolution, Spiritual War asi an ti cio nak hi asi. Chak tlaih khawh ti lo mi phung le phai vialte, fimnak vialte, upadi vialte caah last chance cawlcanhnak asi.

Atu i kan doh mi ral hi Efesa 6:12 i “minung kha si loin, vancung khua i a ummi thlarau sual á¹­hawnnak hna le uktu hna le nawl ngeitu hna le hi a muimi chan lianhngannak hna hi an si…” ati mi khi asi. Biden kan hua lo, Trumh pumpak kan ttanh bia zong asi lem lo. A muimi chan lianngannak le Thiangthlarau (Biatak) raldohnak RALPI (World War) asi caah asi. 2020 cu vulei pi ah COVID pulrai hmang in ralpi a phun phun a tho ti khawh asi. Economical War, Cultural War, Social War, Political War, a tawinak i chim ah cun Colorful War a chuak i hi vialte cung ah atu ah MEDIA nih COUP (aanaa ting) atuah mi asi. atu lio Vulei cung ah a tthawng bik mi cu MEDIA hi asi. MEDIA nih vulei pi hi aduh ning poh in aduhnak poh ah a thui khawh cang. America President tiang zong mipi Vote nih thim si ti lo in MEDIA nih a tlin ter cang caah atu hi thil vialte a can nak hi asi.

Mah hi MEDIA a tei kho tu cu Biatak (Thiangthlarau) lawnglawng asi caah Biatak a hngal mi zumtu pohpoh mual pho in thla an cam i hi chantthawnnak Ralpi an doh cio hi asi. Biatak a ttanh mi pohpoh cu thlacamnak ah kan i tel cio hrim hrim a hau mi asi.

“Nangmah ke hram ah thla ka cam tik ah lomhnak zei tluk in ka hmuh, kan kawi dua cio bantuk in kan in nawl, na ka chonh ah cun ka duh”. Credit: Salai Bawiukthang Cinzah

Leave a Reply

Your email address will not be published. Required fields are marked *