Avoi 76nak UN Bupi Tonnak Ah, Asia Mino Aiawh in Mai Thin Yu Mon nih Biachimnak A Ngei!

Avoi 76nk UN Bupi Tonnak Nih A Tawlrelmi U.N. Food Systems Summit (UNFSS) Ah Asia Mino Aiawh in Mai Thin Yu Mon nih Biachimnak A Ngei
================
Avoi 76nk United General Assembly (UNGA) ah Secretary General nih a tawlrel mi the U.N. Food Systems Summit (UNFSS) ah CHRO i Indigenous Peoples Development Program ah Director a tuanmi Mai Tin Yu Mon nih Asia Indigenous aiawh in biachimnak cu 23 September 2021 ah a ngei.

Hi Summit hi a tlangtar cu ‘vawleicung ah a chuakmi khuati thlennak nih a chuahpi mi khuasak tintuk lei zuamcawnnak’ le cu ‘khuasak tintuk harnak nih abik in mino zeitluk in harnak a pek’ timi kong a si. Vawleicung khuati thlennak nih mipi (abik in lothlo le cintlak pawcawmnak) harnak a pek chin lengmang tikah a bik in tlangcung mi pawl hi a tuar bik an si tiah UN Food Security lei tuanvo ngeitu nih ripawt an chuah mi ah an langhter.

Asia Indigenous mino aiawh in biachimnak a ngeitu Mai Thin Yu Mon nih, “nihin tiang ah UN chungtel cozah tam dueh nih UN cathanh (UN Declaration on the Rights of Indigenous Peoples Rights) cung ah upatnak, tuanvo laknak le tlamtlinternak a um rih lo.

Vawleicung UN ram chung ah a ummi tlangcung (Indigenous) nih kan ngeih mi kan vawlei, kan ram/leitang thil chuak (thingkung ramkung) le ti kong ah kanmah te in tawlrelnak tlamtling in kan ngei kho lo. Ram a ngeitu nih kan ram le vawlei kong tawlrelnak nawl covo kan ngeih lo mi nih kan pawcawmnak le kan himnak caah zuamcawh a kan pek. Cu nih mino le ngakchia caah ngandamnak, fimcawnnak le thanchonak tamtuk a khenkham. Hihi tlangcung mi kan covo cathanh hi UN nih a tlamtlin zokzok herh,” tiah a chim.

UN Secretary – General tawlrelnak in tuahmi U.N. Food Systems Summit cu General Secretary zung nih UN ram chung in Food Systems Champion in mino 60 an thim hna. Cu 60 chung in mino 5 cu vawleicung hram huap in Vice – Chairman ah an thim hna.

Mai Thin Yu Mon hi New York ram ah pumpak in biachim ding a si nain Covid-19 rai ruang ah le nihin ram sining nih a pek lo caah Online in biachimnak a ngei.

Tutan U.N. Food Systems Summit ah vawleicung mino aiawh in biachimtu minung 7 an thimmi hna chung ah CHRO in Mai Thin Yu Mon hi Asia Indigenous aiawh in an thim ve i biachimhnak a ngeih hi a si. Credit: The Chinland Post