Aung San Zong Nih A Kan Hlen Ve Ko Lai

Aung San Zong Nih A Kan Hlen Ve Ko Lai Part I
===================
1947 Constitution ah Tlangmi pawl section le succession (KHUAITHUEH KHUINH) kong a ṭialtu cu U Myint Thein a si. U Myint Thein cu famous four brothers tiin auhmi Kawlram minthang chungkhar unau pa 4 ah aa telmi a si. An unau 4 in England ram Cambridge University le Oxford University in Upadi (Law) degree a hmumi an si. Upa bik U Tin Tut cu Cambridge University in upadi degree a hmu. Kawlmi lakah a hmasa bik ICS (Indian Civil Services) officer a rak si. Aung San – Attlee Agreement minthut lioah a biapi in aa telmi a si (Aung San nih upadi lei in le Mirang ca/holh ah aa bochan tukmi a rak si). 1947 Panglong Conference lioah Aung San he Governor’s Executive Council member in a rak i tel ve. Reece William hruai mi FACE (Frontier Areas Committee of Enquiry) ah member a si. 1947 ah Finance Minister le a hmasa bik Foreign minister a rak si. 1947 ah Aung San le a hawile kha Kalon U Saw nih an kahthat hna (assassinated) lio ah zung a rak kai lo i, a rak luat nain 1948 kum ah a mawṭaw chung ah mi ṭha lo pawl nih bomb an thlak i a thi.

U Tin Tut a zultu cu U Kyaw Myint a si i 1921 kum ah Cambridge University in Upadi (Law) degree a rak hmu. Aung San thattu, Kalon U Saw thihdaan pek ding in biachattu biaceih bawi (Chief Magistrate) kha a rak si. A pa 3nk cu U Myint Thein a si i, 1925 ah Cambridge University in M.A (Master of Arts) le LL.B (Bachelor of Laws) degree hna la vemi a rak si. Mirang chan ah Biaceih Bawi (Chief Judge) sau nawn a rak ṭuan. 1947 Phunhrampi ṭialnak ah aa tel vetu zong a rak si. Kawlram biaceihnak cauk (rulings) tampi a ṭialtu a rak si. Kawlmi lawng si loin, Biaceihnak lei in ramdang hna zong nih theihmi le upatmi a rak si. An nau pa 4nk cu Dr. Htin Aung (Ex-Chancellor University of Rangon) cu Oxford University in Law lei in Ph. D a hmumi a rak si ve. Mah unau pa 4 hna hi Kawlram politics le upadi lei in minthang le upatmi chungkhar an rak si.

1947 ah U Myint Thein nih Phunhram ṭialnak ah “KHUETHUET KHUINH” timi ramkawmh in chuahnak nawl aa telnak kong a tanglei bantukin a ṭial: 1947 July thla a thokka hrawng ah Maj. Gen Aung San nih a office ah a ka auh i, biaceih bawi rian chuahtaak in Constitution Ṭialmi Committee ah Tlangmi kong ah hruaitu dirhmun in telpi dingin a ka chimh. Ka leh micu “Ziah, rap pei na ka chiah ko cang hi” tiah ka leh. Bochoke nih “ka pu na chim duhmi ka theihthiam ko. Kawlmi na si caah Shan, Kachin, le Karen hna ruahnak na pek hna tikah palh sual ahcun an ka mawhchiat lai timi na phanmi a si ko” a ka ti. Kei nih “Nangmah (Aung San) le keimah zong kan zapi kan um/dam lio cu a zeipaoh a va tluang ko lai nain, hmailei ah zei a cang lai kan thei lo, mi nih asiloah Tlangmi nih mawhchiat ding ka duh lo” tiah ka leh. Cu tikah Bochoke nih “Keimah zong mah cu ka phan caah Mong Pawng Saobwa le Sama Duwa Sinwa Nawng nih U Myint Thein hi kanmah Tlangcung mi pawl caah Upadi lei ruahnak petu ah kan duh tiah an ka chimh lio ah Upadi lei thiamsang, English, American, France, Australian nan duhmi kan hlaanpiak hna lai tiah ka ti hna nain, U Myint Thein hi kan duh. U Myint Thein cu kan ruahnak, kan duhmi le thil a cangmi vialte a hngaltu a si caah U Myint Thein lo cun a hohmanh kan duh lo an ka ti” tiin a ka chimh. Bochoke Aung San nih cohlang ko a ka ti i Phunhrampi ṭial liomi committee ah Tlangcung mi pawl upadi ruahnak petu (advisor) rian cu ka cohlan.

Aung San cu a buaimi a um maw tiah ka hal i Aung San nih buainak taktak cu a si lo. Panglong meeting lio ah Mong Pawng Saobwa le Sama Duwa Sinwa Nawng nih an rak ka ton hna i, Mong Pawng Saobwa nih “Kawlmi he hmunkhat te ah Kawlram ramkomh ser ṭi ding kan duh ko. Asinain, Constitution ah Kawlram in chuahṭhan khawhnak (right of succession or KHUETHUET KHUINH) aa tel lo ahcun ram komh ah tel ding a si kho lai lo” tiah a chim. Sama Duwa Sinwa Nawng zong nih “Kachin zong nih chuahṭhan khawhnak aa tel lo ahcun a si kho lo, Duwa Zawlun le a hawile nih an cohlang lai lo” tiah a chim ve. Ka khuaruah a har ngai i ziah nupi va hal lio ah mah bantuk bia cu chim phun a si ṭung lo ka ti hna tikah, chim phun cu a si lo nain, chuahṭhan khawhnak biafang (POHMAH) constitution ah a tel lo ahcun kan buai lai caah rak kan telhpiak ko” an ti. Keimah zong nih a poi lo, mah bantuk telhmi Soviet Union le Yugoslav ram hna zong an um ko tiin hna ka tlakpi hna. Rangoon ka phan i PHASAHPAHLAH EC ah ka chim tikah U Nu nih a duh lo nain ka chimhfianh i a lung a tling ṭhan. U Kyaw Ngein nih cun a duh hrimhrim lo” tiah a ka chimh.

Aung San cu zeitin tuah seh ti na ka duh tiah ka hal i Aung San nih “a si kho ahcun Shan le Kachin hna kha chuahṭhan khawhnak nawl (KHUETHUET KHUINH) telh lo ding in nawl/chimh hna” tiah a ka ti. Kei nih “keimah nih cun ka chimh ko hna lai, a si khawh chungin ka nawl hna lai. Asinain an duh lo ah tah, zeitin ka tuah lai tiah ka hal. Aung San nih “a ngah lo ahcun zei hmanh a poi lo. Mah bantuk chuahkhawhnak nawl Phunghrampi ah aa telmi Ram dang hna zong a hohmanh nih an chuakṭhan taktak hna lo asiloah cu Phunghram cu an hmang bal hna lo. Lungtling tein telhmi biafang (PAIH) a si ko. Cu lawng si loin, keimah nih ka hna a tlak ciami a si timi PHAHSAHPAHLAH nih an pom dingin ṭuanvo ka laak lai” tiah a chim. A thaizing ah Constitution ṭialtu hna sinah ka va lut i PYINE pawl kong an phanh rih lo caah a caan ka la i PYINE (state) hruaitu upa hna he KHUETHUET KHUINH asiloah ‘Right of Succession’ kong bia ka va ruah hna. Chinmi hruaitu a simi U Vun Ko Hau (Dr. Vun Ko Hau) nih “kannih Chin mi cu PYINE (state) kan duh lo. Kawlmi nih na kan pekmi paoh kan laak lai, kan lung a tling ko lai, hi kong hi PHAHSAHPAHLAH sin zong ah hiti ningin report ka pek cang” tiah a ka chim caah zeihmanh ka chim len ti lo.

Karen hruaitu Mann Bakhine nih “Kawthulei PYINE tiah auhmi Karen PYINE kan ngah lai caah kan lung a tling ko. Constitution ah a dikthlir in a herhmi paoh ṭial ko, kan cohlan ko lai” tiah a chim caah zeihmanh bia ka ruah ti hna lo. Kachin hruaitu hna nih “Shan miphun hruaitu hna he va i ruah u law anmah nih an lung a tlin ko ahcun kannih Kachin zong nih kan lung a tling ve lai” tiah an ka ti caah Kachin hruaitu hna he voi 3 lawng kan i tong hna. Hi lio hrawng ah hin Aung San a thi.

Shan hruaitu hna he voi tampi bia kan i ruah. U Chan Htun he kan suaimi phunglam kha tlawmpal te lawng an beet i a zapi ngawt in an cohlan. Asinain, KHUETHUET KHUINH timi biafang (A PAIH) cu telh lo a ngah lo, telh hrimhrim ding tiah bia hrang nawn in an chim. Hmaisuang bik in a chimtu cu Yawnghwe Mahadewi a si. Mahadewi nih faakpi in a dirhkamh mi hna cu Sawbwa hnu zul pawl si loin, Shan mipi aiawhtu hna an si caah zeitihmanh ka chim kho ti hna lo. Cu kong cu Prime minister U Nu sinah ka va chimh tikah U Nu nih “zei ti awk ṭha, annih nih Bochoke nih bia a kamhmi hna kha an i tlaih cang caah zeitihmanh nawl a ngah ti lai lo. A poi lo. Kachin zong cu ṭhiamṭhiam in pek ve ding a si cang caah Kachin PYINE kong Phunhrampi cu ṭial rih hlah, keimah nih SAMADUWA bia ka ruah ta rih lai” a ka ti.
Cu hnu ah U Nu nih SAMA DUWA cu “Kachin PYINE sernak kong in Myitkyina lawng si loin Banmaw District zong Kachin State chung ah khumh a si lai. Cu lawng si loin Kachin state Chairman cu Kachin miphun a si lai tiah Phunghrampi ah kan ṭialchih lai. Cun Kachin State zong nih KHUETHUET KHUINH kha ‘give up’ nan tuah ve lai” tiah U Nu nih a chimmi cu SAMA DUWA nih a cohlan caah, 1947 Phunghrampi i Kachin State upadi ah, KHUETHUET KHUINH hi Kachin State he aa pehtlai lai lo tiin ka ṭial chihmi a si.

Chinmi hruaitu hna nih PYINE (state) kan duh lo an ti caah 1947 Phunghram, Chin upadi ah CHIN WIDETA TAING (Chin Special Division) tiin ka rak ṭial. KHUETHUET KHUINH kong he buainak a um lo (KHUETHUET KHUINH a tel lo). A dangdang cu Shan State Phunghram he aa khat in ṭial a si. Karen PYINE upadi kong ah Karen miphun hruaitu hna nih KHUETHUET KHUINH an duhnak kong an chim bal lo i zeihmanh buainak a um lo. Cu ruangah KHUETHUET KHUINH cu Shan State ca lawnglawng ah a hung cang. Fawi tein chuak kho hna hlah seh tiah Phunghrampi ah “Hi phunghrampi a nun hnu kum 10 a tlin hlan cu hi KHUETHUET KHUINH hi hman lo ding” tiah kan ṭial chih.

Kareni (Kayah) State (cu lio ah Western Kareni tiah auh a rak si) hi Mirang chan in mah tein aa ukmi ram a si. June 21, 1875 ni ah Sir Douglas Forsyth le Kawl Siangphahrang aiawh in Kin-Woon Mengyee (Minister for Foreign Affairs) minthut hnatlaknak in a zalongmi ram (state) ah chiahmi a rak si. Mirang nih Karenni State zong tuk le laak (occupied lo) loin a zalongmi ram ah zei ruangah a chiah timi kong ah: Cu lio ah Vawlei pi level in a ṭhawng bikmi (super power a simi) le colony ram tam bik a ngei kho mi ram hna cu UK (United Kingdom or England) ram le France ram hna an si. England ram nih nitlak lei in India, Kawlram a rak laak, France ram nih nichuah lei in Vietnam, Cambodia le Lao tiang a rak laak ve. Cu tikah Kawlram he aa pehmi Thailand ram cu England ram zong nih tuk in a laak khawh ko hnga. France ram zong nih a laak khawh ko hnga. Asinain, super power a simi England le France ram hna kar ah buainak a chuah lo ding in an hrial veve ruangah Thailand ram cu midang kuttang ah colony a rak si ve lo. An siangpahrang nih nihin ni tiang an uk ko hna (Monarchy system). Thai rammi hna an rak fim an rak ṭhawn ruangah mi kuttang an rak um lomi an si lo. Cu ve bantuk in Laos ah France a um cang caah England nih a ukmi Kawlram he naih lo dingin (or ram pahnih kar ah cushion or buffer state) Independent State of Western Kareni tiah an rak chiahmi a si. Credit: Saya Pa Hmung