Atulio Kawlram Dirhmun!
==========
Kawlram cu Feb 1, 2021 in ralkap nih uknak an laak hnu in kum 2 le cheu chung tluk cozah um ngei loin kan kal cang. Ralkap nih 2008 phunghrampi ningin caan karlak uknak kan laak chung an kan ti, ni kum August thla ah khan thimnak kan tuah țhan lai an ti nain acaan ahung phanh tikah ram abuai caah thimnak kan tuah kho lo an ti i an uknak caan thla 6 tete in an vun sauh lengmang i atu thla (July 2023) cu January 2023 ah an rak sauh mi thla 6 kha adih țhan hoi cang.
Cucaah thla 6 sauh hau țhan hoi dingin an um caah phungphai tlai bantuk in an vun kan nawnnok țhan ta. July 9, 2023 ah Thailand ramdang lei vuanci (Foreign Minister in acaan dih hnik cang mi) pa le Suu Kyi an vun ton ter hna. Daihnak lam kan duh ko, Suu Kyi nih teh zeitin dah aruah ve ti pawl kha vulei mipi hmai ah ralkap nih Thai FM pa hmang in an vun kan nawnnok țhan.
Suu Kyi zong nih daihnak lam aduh ko caah hi hnu thla 6 chungah biaruahnak kan ngei țhan lai ti le ram abuai deuh rih caah thla 6 in caan karlak uknak kan vun thawn țhan tiah tu thla dih ah an thanh te lai.
Kawlram hi ralkap nih an duh paoh in nawnnok peng kan sinak cu 2008 phunghram khi kum 14 chung an sermi asi. Cun mah phunghram khi kan i palh sual ah, asilole khi phunghram nih a kan ven te khawh lo sual ah ti in NDSA – National Defense and Security Council (အမျိုးသားကာကွယ်ရေးနှင့်လုံခြုံရေးကောင်စီ = ကာလုံ) an ser chih.
Cucu minung (11) in sermi buu asi i cu chung ahcun ralkap 6 le cozah tlai liomi chungin upa 5 an si. Cu buu nih biachah mi paoh el awk țha lo dingin anmah nih an i kar khumh. Tutan zong hi 2008 phunghram ning cun caan karlak poipang uknak (Emergency Rule) kha a sauh khawh ti lo caah NDSA upadi ningin ram ahim rih lo ti in sauh a timh țhan.
Cuticun a kan nawnnok țhan lai i 2025 an kan phanh pi te lai. Cun 2008 phunghram ning in November 2025 khi thimnak (election) caan aphan te lai. Cutik ahcun Automatic in 2020 thimnak kha athi ve lai, Parliament Dissolution asi lai caah 2020 thimnak ah MP atling mi kha an caan adih ve lai. Cucu Min Aung Hlaing nih hin ai timh mi (Political Game -နိုင်ငံရေး လှည့်စားကစားနည်း) asi cem lai tiah kei ka purhdah ning a si. Cucaah Kawl ralhrang uknak hi cu zumh awk ațha lo, doh lo awk zong ațha lo i tei i hloh hrimhrim ahau mi “The Evil Empire” asi.
Hi ral hi kan doh lo ahcun Chinram an laak dih te lai i Kawl le Kala nih tilian bang an hung kan pem hnawh te lai, cun kan miphun an kan dawpdolh lai i kan ram, kan vulei cia ah vulei ngei lo, ram ngei lo kan si te lai. Hi ral hi Min Aung Hlaing uknak doh lawng asi lo, kan Chin vulei le kan biaknak Kawl khuachia nih tilian bang a fenh nak hnga lo kan thazaang dihlak le nunnak in kan ven ahau mi pumpak cio kan rian asi dih. Ka lawm. Victor Khen Sang, July 14, 2023.