Atulio ahcun thazaang ṭhabik le hriamnaam ṭhabik nan si

CDM a tuahmi vialte kan upat tuk hna. Atulio ahcun thazaang ṭhabik le hriamnaam ṭhabik nan si. Hakha le Than Tlang zung vialte khaar dih kho ulaw zeitlukindah hmual a ngeih hnga. Hakha, Than Tlang nulepa hna CDM ah itel cio dih ulaw. Kan Ram le Miphun nih kan iherh tuk hna. Next generation nan fale nih kan iherh tuk hna. Nan biapituk! Tutan kan tei ahcun kan luat thai kho lai. Kawlram luatnak cazin ah na min iṭial ve seh! Bawipa nih nan temhinnak an theih piak ko hna. Nan lungdong hlah uh! Kan idirpi hna. Kan iṭanpi hna. Thla kan icampiak lengmang hna.

Sa kap bak usih! Ram chung, ram leng in khaanhawt cuahmah lio ah “pawṭaam, tihal, thadih, zawtfah, tlaihkhih, taksa intuar le lungdongh” ruangah sakah loin kan kir taak sual lai ka phaang. Ni tampi tuahkhawhnak ding in thazaang chuah hi a biapitukmi asi. Teinak kongah caan nih tampi bia a chim. Hmailei ah khaanhawt hau ti lo dingin ahrampi in phur dih a herh. Tutan ah kan tlolh ahcun hmailei ah a ra ṭhan ṭhiamṭhiam lai. Sa kah bak ahau. Kan si khawh tawkin cawlcaangh abiapituk. Lungrualtein le lungsautein kan kal ahcun teinak kan hmuh ko lai. Khirh zumtu hna lungdonglo tein Bawipa sin ah bawmhhal in thlacam chin hna usih. Min Aung Hlai a thin haktertu le a nemtertu Bawipa asi. Ralkap kut in a kan chuah khotu Bawipa asi.

Kawlram ummi kan unau hna lam nan zawhnak tete photos kan hmuh le lung hmuituk! Kan mipum in kan itel khawh lo hmanh ah kan thinlung le kan thlacamnak nakin kan idirpi peng hna. Abikin Yangon ummi chinmi hna biataktein rak cawlcang cio ulaw. Nanmah le nanmah hna ikhawm kho dih ulaw group in kal kho ve ulaw a ṭha tuk hnga. Tam taktak in tel khawh izuam ulaw. A caan lio bak asi. Atanṭim lawng siloin a dih dongh tiang teinak kan hmuh hlan tiang thazaang chuak in ṭaang hna usih! Lungrualtein hmailei kalṭi hna usih! Kan tei hrimhrim lai. Chinmi kan min ngei ve usih! Hmailei kan fale ca ruahchih in lungdong lo tein thinlung, thazaang le thlacam nakin kan ṭan ahcun Bawipa nih teinak a kan pek lai. Bawipa cu kan teinak asi. Credit: James Van Nei Lian