Atu lio Min Aung Hlaing le a ralkap sining!

Atu lio Min Aung Hlaing le a ralkap sining!
=========
Atu lio Min Aung Hlaing le a ralkap sining! An phih an khar, an kham kho lo. An tlaih an hrem, an phur kho lo. An hal an fir, an chut kho lo. Sual an tuah mi maimilh an timh, Sual an tuah mi khuhchilh an zaal, Sual tuah lo bang an i um ter.

Chungthu leng naal phung tlum loin, leng zong thut viar, Vawlei cul in misual ralhrang an si a lang! A taw pemmi ti thawl bangin, an naule nih an tlik tak hna. Nawlpek hmanh ah a phung men lawng tuan zaal an rel. Vawlei pi nih hnu chittak in a um tikcun, Min Aung Hlaing hi khang chung um mi sa a lo cang.

Hriam bochan in an i puar ter, a chunglei cun an pur thluahmah. Lungrual tein, a lamkip in, kan doh ahcun ral teinak cu kan ta a si. Kan tei hrimhrim lai!

Kan ram le kan hmun cia ah kan tonmi namnehnak hi a fak khun ko. Bawipa thawh ah mahle inn cio ah i dup buin kan rak hman. Pentecost ni zong ralhrang uknak le hremnak ruangah kan hmang kho lo. Hringtu nule pa upat pek ni zong ah ther le phang in kan um.

Ngakchia inn cung kai ni ah ngakchia pakhat te hmanh lam cungah zalong ten a chuak langh kho ti lo. Chungkhar zarh, Pathian sin thazaang lak ţi zarh hmanh ah chungkhar kan tling ti lo. Kan thlavai a kiang i ngaihnak mitthli a luang.

Cu lio ah, ralhrang ralkap pawl cu an biaknak puai tuahnak le tlamtlinhnak caah lamkip le sangkip ah mi an check hna. Mi an ngiar. Biaknak puai pakhat ca hmanh ah kan miphun zalonnak an kan phihkhar. Biaknak hrambunh buaibainak cu a tha lo. Nain, kan ram le kan hmun cia ah kan biaknak phung hmanh zalong ten kan hman khawh lo cu lung a fak ko.

Ni khat khat cu zalong ten kan biaknak phung, kan nunphung, kan zatlang nun hna hmang caan kan phan hrimhrim lai!
Bawipa nih kan umpi ko seh. Ralhrang ukhruainak cu kan doh i kan tei hrim a herh!

Breaking News: Ralhrang Min Aung Hlaing Le Soe Win Umnak Fiangtein A Theitu Nih Biathil A Phuan Cang. Naypyidaw in nichuahlei tlanghram i hmunhma khi mi sawhsawh in naih khawh lomi, ralhrang bawi hna an umnak a si. Cuka hmun cu Naypyidaw Zeyathiri peng chungah a ummi a si. Hi hmun ahhin ralhrang bawizik zungpi cu a um.

Cu zungpi kiangkap ah cun hramhram in nawlngeihnak latu General Min Aung Hlaing le a chungkhar an um. An umnak in nitlaklei ah tidal (Dam) le nichuahlei ah tlangthluan hna an um.

Min Aung Hlaing umnak inn pawngah Mytel VIP Tower pakhat a um fawn. Cuka hmun cu Military Zone ah an chiahmi a si. Nawlngeihnak lak hnuah Mytel company in a chuakmi Engineer pakhat nih cun Min Aung Hlaing umnak cu “NPW0291, VIP Site server for General’s House” tiah chinchiah a si tiah a chim.

Satellite hmanthlak zoh tikah Mytel VIP Tower pawngah inn nganpi pakhat le a hme deuhmi inn pakhat hmuh khawh a si. Innkulh chungah cun ti lionak le tennis tuknak zong an um. Inn hnulei ah tidal ngan nawn pakhat a um fawn. Min Aung Hlaing umnak innkulh cu Ekah 30 hrawng a kau. Cuka hmun i a phan balmi ralkap pathum (a hnuah CDM a tuahmi) zong nih cu inn cu Min Aung Hlaing umnak a si tiah an chim.

Min Aung Hlaing umnak inn pawngah inn dang pakhat a um i cucu ralhrang bawizik changtu Soe Win umnak a si. Soe Win umnak innkulh cu Min Aung Hlaing umnak nakin lethnih in a bi/hme.

Min Aung Hlaing umnak inn an sakning hi khuaruahhar phundang ngai a si tiah nawlngeihnak lakmi duh loin CDM a tuahmi ralbawi pakhat le ralkap hlathlaitu bawi hlun pakhat nih an chim ve. Cun tukum March thla in CDM a tuahmi ralbawi Bogyi Zin Yaw nih Min Aung Hlaing umnak inn cu a tha bik le a him bik in sak a si tiah a chim fawn.

Bogyi Zin Yaw nih cun “A chunglei sining cu ka thei lo, asinain runvennak cu tha taktak in an tuah. Luhnak kutka tiang ka phaknak a ruang cu cuka inn a kalmi mawtaw ah ka um ve caah a si. Runvennak latu hna cu an pawngah an um peng. Min Aung Hlaing inn cawngtu ah battalion cheu, Soe Win inn cawngtu ah battalion cheu tiin an um” tiah a chim. CDM ralbawi Bogyi Zin Yaw hi 2016 lioah khan Min Aung Hlaing umnak inn luhnak kutka tiang a rak phanmi a si.

Ralhrang bawi rual umnak hmun kalnak lam ah cun Bohmu rank nih hruaimi check-gate pathum an um pinah lamkam ah cun security camera tampi an bunh tiah theih a si. Min Aung Hlaing le Soe Win umnak hmun cu ralhrang 60 hrawng le ui-fim rual nih an cawngh peng tiah Bogyi Zin Yaw nih cun a chim.

Ralhrang hna nih cun Min Aung Hlaing umnak cu Innpi 1 nak ti le Soe Win umnak cu Innpi 2 nak tiin an auh i len duh le chawhvah duh i an chungkhar in leng an chuah dah ti lo an ei-din dingmi vialte cu tuanvo pekmi hna nih zarhkhat voikhat an rak pek/chiah lengmang ti a si.

Min Aung Hlaing umnak innkulh hna cu RPG kham kho dingin concrete an hnuai i a chungah thilpheng an hnuaichih, cun rawnghring an thuh fawn. Cun inn tangah vawlei tang lam (Tunnel) an tuah tiah theih a si fawn. Min Aung Hlaing te chungkhar umnak le zung a kainak cu meng cheu lawng aa hlat.

Min Aung Hlaing cu atu a umnak inn pinah ahhin Naypyidaw chungah inn pakhat, Rangoon ah inn pakhat le Pin Oo Lwin ah inn zeimawzat a ngei rih tiah theih a si.

Min Aung Hlaing cu ralbawi sinak in aa din (pensen a la) cang ding a si nain nawlngeihnak a lak hnuah ralbawizik tuancaan cu rikhiah ngei loin an tuah cang tiah theih a si. Nawlngeihnak a lakmi cu bawi sinak le chawva ah a rit tuk cang ruangah a si tiah ralhrang hna ih an chimceih a tam ngai.

Mytel tower 12,000 bunhnak nawl a hmutu Pinnacle Asia company kha Min Aung Hlaing fanu Daw Khin Thiri Thet Mon ngeihmi a si tiah Justice for Myanmar nih an langhter. Min Aung Hlaing fapa Aung Pyih Sone le Khin Thiri Thet Mon nih hin company tampi an ngei, cu vialte cu rampi tangka an eihmuarmi in an tuahmi a si tiah Justice for Myanmar nih an chim.

Anmah cu vantawng in an rum ko nain Min Aung Hlaing nih cun ralhrang chungkhar hna le ram mipi hna cu khuasak tintuk le din-ei ah semrel tein um u tiah kan hnulei a chim bal.

Min Aung Hlaing biachimmi a ngai i a hnuah CDM a tuahmi ralbawi pakhat nih cun “Kuva a eimi ralkap pakaht nih nikhat ah 200 man a ei ahcun thlakhat ah thongruk a dih tinak a si. Kuva ei loin chungkhar caah arti hna cawk ah a tha deuh lo maw ti tiangin a chim” tiah Myanmar Now nih bia an halnak ah a chimchih.

MOSCOW, RUSSIA – JUNE 23: head of Myanmar’s coup regime, Gen. Min Aung Hlaing speaks during the 9th Moscow Conference on International Security in Moscow, Russia on June 23, 2021. (Photo by Sefa Karacan/Anadolu Agency via Getty Images)

Min Aung Hlaing nih aa citmi Helicopter cung Sofa thutnak pakhat khi ralkap sawhsawh in an nun chung i an ngeih khawh lo dingmi, a tawngh hmanh an tawngh khawh lo dingmi a si tiah CDM a tuahmi ralkap Kaung Htet Aung nih a chim. A chimning ah cun “Anih le kannih cu van le vawlei bantukin kan i thlau” ti a si.

Nawlngeih lak hnu in Min Aung Hlaing le a kuttang ralhrang bawi rual hna cu ramkip nih dantat phihkharnak an tuah hna. US cozah nih cun Min Aung Hlaing lawng si loin a fapa Aung Pyih Sone le a fanu Khin Thiri Thet Mon, cun a ngeihmi company hna tianjin dantat phihkharnak a tuah hna.

US nih phihkharnak a tuahmi Min Aung Hlaing chungkhar ngeihmi company hna cu A le M Company, Sky One Construction Company, The Yangon Restaurant, Yangon Gallery Art Showroom, Everfit Company (Pyi lam City Mall Center ah a ummi GymFitness) le Seventh Sense Film Production and Entertaiment Company hna an si. Source: Myanmar Now