Atu Lio Khua caan, Tih Hlah! Lau Hlah! Bawipa I Bochan Ko!

ȚIH HLAH! LAU HLAH! BAWIPA I BOCHAN KO
=========
Hakha ummi zumtu hna țih hlah u! Lau hlah u. BAWIPA i bochan ko u. Țihphannak le launak nih zeihmanh a țhatter bal lo. BAWIPA tu i bochan ko. Ralkapbu BAWIPA cu kan phaw a si. Kan himnak Lungpi a si. A kan Vengtu le Hupphengtu a si.

Bomb thawng le meithal thawng na theih tikah, lau tuk le țih tuk kha i suum. BAWIPA nih an umpi ko, an kal taak lo kha ruat deuh. Thla kan cam lengmang ko. Carson le Laura luruh nih a hngahmi khua, PATHIAN lawng a kawlmi tampi umnak khua hi, BAWIPA Mit nih a ven peng ko. Kuanvai lakin BAWIPA nih in huppheng ko hna seh.

Maw Hakha khua, țih hlah, lau hlah, na PATHIAN cu nanmah ven awkah na sinah, na cungah a um ko. BAWIPA hi tampi in i bochan law na zumhnak kha țhawnter chinchin. BAWIPA JESUH nih Vel le Daihnak in pe ko hna seh.

BAWIPA NIH BIATHLI A KA CHIMHMI; Vawikhat cu thlacamnak inn khaan i ka um lioah, BAWIPA nih biathli a ka ruah; a ka timi cu, ” Rungtlang i an vei (a par a zummi) țhawnnak khi zeihmanh a si ti lo,” a ka ti.

A sullam cu Rungtlangin Hakha a pentu an khuachia huham țhawnnak cu nan thlacamnak in nan tei cang ti nak kha a si ko. Cucaah, Rungtlang in Hakha a pentu khuachia țhawnnak huham tei a si ahcun, BAWIPA nih a mi hna caah zeidah a tuah lai, BAWIPA cu hngak ko usih.

Zankhat cu langhnak ka hmu! Puan aa aih i a sam a um lomi pastor pawl khi inn khaan pakhat chungah lungrawk ngai in an țhut lio cu ka hmuh hna! Anmah lak i a sangcem le an i bochan cempa cu a thi i, a ruak cu midang hmuh khawh lo dingin, inn chung hrawl ahkhin an zalh i, mi nih an kan theih sual lai ti kha an phaang ngaingai! Cucaah innkaa an i kharkhumh i lungrawk ngai khin an um hna. Cawbuk lei i a um tawnmi puan a aih i a sam a umlomi an Missionary pa zawng hmaichia taktak in ka hmuh.

Teinak diktak cu thlarau lei in tei hmasat hi a si. Thlarau lei in teinak kan hmuh cang ahcun taksa lei zongin kan hmuh colh lai. Kan nih kan dohmi le kan raal cu khuachia le cu țhawnnak huham nih a bawmhmi hna kha an si.

A ZAM MI LE A ZAM LO MI THLUACHUAH. Kan ram a buai ka hrawng, Covid rai a karhhlan deuhah khan, BAWIPA nih kan sin thlacamtu sinah thluachuah dotthum kan hmuhnak ding, Kan Ram harsatnak a um ruang i zaam lo tein khua le Ram a hngakmi hna le khua le ram a zaam taak mi hna thluachuah kha aa khat lai lo nak kha a rak phuan.

1. Zaam lo tein khua le Ram a hngak i PATHIAN Hmai a kawltu hna thluachuah cu a ngancem lai a ti. 2. Zaam lo tein khua le Ram a hngakmi hna thluachuah cu khua le ram chuah taakin a zaam mi hna thluachuahnakin a ngan deuh lai a ti. 3. Khua le ram chuah taakin a zaammi hna thluachuah hi a tlawm cem lai a ti.

A zaam mi le a tlilek mi kan um pah cang caah; Kahdohnak ruang ah mah inn le lo, tappi chuah takin a him lai ti ruahnak hmun poh ah puantom he kal cio kan si. Inn chuah tak cio kan vun si cang. Inn chuahtak in a zaam mi kan si ca ah a tanglei pawl hi pel loin na tuah ta a hau ko rua tiah ka ruah.

1. Na inn electric mei hmih ta philh hlah. Electric mei he aa pehtlai mi poh hmih le phawih philh hlah. (Electric mei in inn a kaang kho). 2. Innzuat satil na neih a si cun a inn ah hrenkhumh loin thlah dih hna (rawl loin an thi sual lai).

3. Na chungkhar he aa pehtlai mi cazin, na bank cauk, na licence ti bantuk pawl zong philh lo tein i ken ta dih ding (thil mansung dihlak, a zaangkhai mi mu). 4. Hnipuan fenhaih si loin eidin lei tu hi naa ken khawh chung i ken (ramtang zong ah a caambual khomi na si, tu kan dirhmun chim awk a tha lo).

5. Nikhua chit lio (Fur) a si ca ah, ruahkham (rain coast) or muka i ken tengteng ding. 6. Dah mei, meitek le nam ken philh lo ding (Ramtang hna na cambual hau sual ah). 7. Fikfa tam lio a si ca ah, fikfa sii zong naa ken a hau. Cu si lo hmanh ah fikfa khamnak khiangthawng zong mu.

8. Rirai he kan um lio a si ca ah sii-ai hi a biapi in i ken ding. 9. Power bank, phone bill zong pel lo tein i ken ding. 10. Na umnak hmun Line a ngah lo i thawng theih na duh sual ah Radio i ken ding (Line zeitik an phih lai chim kho si lo). Na nunnak ca ah lam hruaitu tha Bible ca zong ken philh bak lo ding.

Thantlang khuami hna ralzam dirhmun in van thutto a si cang. Thantlang khuapi cu van chuah tak tluahmah si ko cang. Mah nih inntung dirh lo nak hmun ah tlikzam, himnak hmun kawl cio kan si.

Hi ralzam tawkrelnak caah tiin Thantlang Placement Affairs Committe nih thialkamnak in siseh, umtu-thuttonak in siseh tawlrel cuahmah an si. Ralzam cazin zong tawl rel cuahmah a si a rauhhlan ah hi kan page in van langhter kan i zuam lai.

Ralzam hna caah ei-din, tirawl bawmhhau in kan um ko. Ramchung ramleng unau, nu le pa hna nan hnakkar van kan tenh ko uh law. Thantlang Placement Affairs Committe, Pehtlehnak – Chat box/09423935703