Falam Le Hakha Ah Tlangrai A Tlung, Mizaw An Tam!
===========
Chin ramkulh, Falam peng ah tlangrai zawtnak a tlung i sii-inn ah mizaw um an tam ngai, tiah theih a si. July thla dongh hrawng ah khan Falam khuachung ah tlangrai in a zawmi an tam ngai. An hrawm a faak i an khuh, an tha um lo i rawl zong an duh lo. A bik in ngakchia le upa hi an zaw khun hna. Falam khua chung ummi zong sii-inn ah an um i khuate lei in a rami zong an tampi, tiah Falam ummi pakhat nih The Chin Post ah a chim.
“July thla dongh hrawng khan Falam khuapi Tlanglo sang a ummi sang chung mi hna zong faak ngai in tlangrai in an rak zaw i Falam sii-inn ah a ummi zong an um hna. Mino cu kan ṭhawng deuh ko nain ngakchia le upa cu an celh hrim hna lo. Atu zong sii-inn a ummi an um pah rih ko lai,” tiah Tlanglo sang ummi pakhat nih The Chin Post ah a chim.
Falam peng khuate pakhat in dam lo ruangah Falam sii-inn a panhmi nu pakhat zong siibawi te in x-ray(ဓာတ်မှန်) an thlakter i a result a chuakmi cu siibawi te nih an fian lo caah Mandalay sii-inn ah kal dingin an chimh hna nain tangka ngeih lo ruangah Mandalay a kal kho ding an si lo caah Hakha sii-inn an panh, tiah theih a si.
Hakha khuapi zong ah July thla in tlangrai in a zawmi an tam ngai cang. Mizaw pakhat nih a chim ningah, tutan an zawt ning cu 2020 lio covid rai bantuk in an hrawm a faak an tha a um lo, an lung a mit i rawl an duh lo, tiah theih a si.
Matupi Peng Ah Thingkung Nih Inn A Nenh Caah Pa 1 Nunnak A Liam! Chin ramkulh, Matupi peng, Haltu khua ah ruahpi le thli a faak ngai caah thingkung kiakmi nih mipi inn an nenh chih i pa 1 nunnak a liam, tiah theih a si.
“2023, August 7 zing suimilam 2:00 tluk ah thingkung kiakmi nih inn a nenh caah U Lawng Hon (kum 52) a nunnak a liam. A nupi zong hliamhma faak ngai a tuar caah Matupi sii-inn ah thlopbul lio a si. An fa nu kum 8 ngakchia le an fapa le 2 inn ah an tantak hna” tiah tualchungmi pakhat nih a chim.
Kalay Thonginn Ah CNDF Ralkap 1 Nunnak A Liam; SAC Nih A Ruak Tlunpi An Siang Lo! Sagaing ramṭhen, Kalaymyo thonginn ah SAC ralhrang nih thong an thlakmi Salai Van Biak Him cu nizan August 6 zing ah Kalaymyo sii-inn pi ah a nunnak a liam, tiah kan theih. 2022 kum i thonginn chung kahdohnak lio ah a nunnak liammi Van Ding he 2021 kum lio ahkhan SAC ralhrang nih an tlaihkhih hna, tiah theih a si.
CNDF in chimpuannak nawlngei tu Salai Cung Ngai nih “Salai Van Biak Him hi lung zawtnak a ngei ti ah kan theih. Nizan zing suimilam 10:00 hrawng ah Kalay sii-inn pi an phak pi i suimilam cheu hrawng a rauh hnu ah a nunnak a liam. Mi theih dingin aa dawhnak men ah a thih lai te ah sii-inn an kalpi hi a si.
Thonginn chung ah ṭhate in thlopbulnak caan zong an pe lai lo. Cun a ruak zong a chuahnak khua Falam ah tlunpi an sian lo caah Kalaymyo ah an vui” tiah a chim. CNO/CNDF chungtel 14 hna cu SAC ralhrang nih an tlaih hna i thong an thlak hna. Cu chung ah minung 2 an nunnak a liam cang, tiah theih chih a si.