Atu kan dohmi ral hi uknak thalo a si caah atlang piin Pastors hna le CDF hna nih kan dohmi ral hi aa khat veve!

Pastor vs + – = CDF (Capital le Kiangkap)
============
Thlennak Lam Pahnih (Transformational strategies) Bricolage le Revolution. 1. Bricoleur cu hruaitu a si nain atu lio le hmailei muisam cuanternak caah hnulei kha heh chet tiah dothlatnak a tuahmi asiloah hnulei kong ruat in atu le hmailei sersiam a timhtu a si.

2. Revolutionary leader cu a luancia kong kha fak tuk in a tuak tuk ti lo. Atu lio thil sining zoh in hmailei caah atu nak in a tha deuhmi kawl le sersiam le tuan a hmaithlakmi a si. (An i dannak a tampi nain an i khah lonak zong a um thiamthiam.)

Atu kan dohmi ral hi uknak thalo (vawlei cung uknak vialte lak ah a chia bikmi uknak) a si caah atlang piin Pastors hna le CDF hna nih kan dohmi ral hi aa khat veve. Asinain strategy kan zulhmi lam hi dannak tete zong a um kho.
Chinram sersiamnak caah siseh, ralkap uknak thalo doh hrawhnak caah then awk an tha maw ti ahcun then awk an tha veve lo nain an zulhmi le an kal pi mi lam aa khat maw ti ahcun aa khat hmanh ah an hmanmi sining aa khat lo men lai.

Kan dohmi ral aa khat chung poahpoah cu aa then kho ding kan si lai lo. Aa bawmmi kan si a herh zungzal lai ti cu ahopoah nih fianmi le theihmi a si cang caah peh a hau ti lo. Kan dohmi ral aa khat ko caah kan hmurka le kan cafung ah siseh, kan zanmang hmanh ah kan i manh chih cangmi federal timi muisam cuanter ngaingai a hau. Federal timi cu hnatlaknak a si ko. Lar biafang kan hmang ahcun – power sharing (resources, activities, decisions, et…), regional based, tribal or ethnic based in dirh le ser an i tel dih.

Kan nawlngeihnak le kan tuanvo tete kha aa dan, aa hrawmnak zong a um ve. Sihmanhsehlaw kaphnih karlak nawlngeihnak le tuanvo thennak le fonhnak zawn te ah ralkap chiahru aa lawmhnak a si ahcun kan kaphnih tein biaruah than le a tha bik lam kawl than zong a biapi ngaingai.

Pastors hna nih CDF riantuannak a thazaang a dernak le a thencheu tertu kan si ahcun cucu a poi ngaingai men lai. Hnulei ah cu tin kha tin a rak si bal i hmailei zong ah cu tin kha tin kan duh caah a si ti zong chim awk cu a um len ve lai. Tinhmi ngeih ciammam in cu bantuk a chuah sual ahcun Pastors kan palh deuh ti ding a si ko. A tha deuh lai tiah tuaktan lairelmi a si nain chiatnak lei a va si sual ahcun phundang. Asinain thatnak lam lei ah kir zau hau hnga.

Khatlei ah pastors chung lila zong ah revolutionary leaders an um kho thiamthiam ve ti hi philh awk a tha ve lo. Revolutionary leaders siseh, chungtel si hna seh, caan, pum, nunnak a pemi hna an si caah an caah bawmtu si ding hi a biapi ngaingai.

Theihthiam lonak a um ahcun i chon bia than hna u sihlaw Pastors hna tu nih CDF kha cu tin thu uh dir uh, kanmah nih bawmhmi nan si, kanmah duh ning in kal uh ti phun le kan duh lonak ning in kal ahcun ti bantuk cu a lam a si deuh lai lo dah! Cu bantuk lungput a ngeimi zong cu an tlom ngaingai ve ko lai.

Asinain zeibantuk lungput dah kan ngeih timi cu “Meeting auh ning, biachim ning,” ti bantuk khan ahopoah theih khawh dih kan si ko. Teinak caah Federal ram kal ning tein mah le buu le hmunhma ning tein Chinram cu a kal cuahmah hi Federal muisam a cuang ngaingai. CDF-Hakha, CDF-Senthang, CDF-Zotung, CDF-Thangtlang, CDF-Zophei, CDF-Mara, CDF-Matu etc….adangdang dihlak …. teinak Flag!

Pastors zong nan caah biaceih Bawi a tuantu/ tuan a duhtu si lo in nan hnu lei in an dirkamhtu le Bawipa Sin ah thla an campiaktu hna si khawh kan i zuam zungzal ve lai. (keimah pumpak hmuhnak le ruahnak ka tialmi a si). Credit: Saya Thawng Za Pum