Arakan Army (AA) Nih Ponnagyun Peng A Ningpi In An Laak Cang. Rakhine ramkulh, Ponnagyun khuapi SAC ralkap Khah-Mah-Yah 550 Battalion sakhan cu Arakan Army (AA) nih an laak khawh i Ponnagyun peng zong a ningpi in an laak cangnak kong Rakhine ralkap AA nih phungning tein an thanh.
Nizan March 4 ah Ponnagyun khuapi chung ah a taang mi sakhan pakhat Khah-Mah-Yah 550 sakhan cu SAC ralkap nih an sungh lo nakhnga vanlawng le tilawng in kahdohnak an tuah nain Rakhine ralkap AA nih a ningpi in an laak khawh ṭhiam, Ponnagyun khuapi zong a ningpi in an laak khawh cang, tiah theih a si.
Ponnagyun khuapi an sungh hnu ah SAC ralkap nih Rathedaung – Ponnagyun motor lampi cung um Setipyin hlei cu zanlei suimilam 4:57 in 5:17 tiang raltuknak vanlawng pahnih in voi 12 kahdohnak an tuah, tiah theih a si.
AA nih Chinram Paletwa, Pauktaw, Kyauktaw, Mrauk-U, Minbya, Myaypone tiin khuapi 6 an laak hnu ah nizan March 4 ah Ponnagyun khuapi an laak chap caah a zate ah khuapi 7 an laak cang.Crd:TCP
Relchap: Chin ramkulh, Chin hriamtlai phu hna karlak ah ramkhel lei ruahnak aa dan ruang ah Matupi peng hrambunh CDF-Matupi cu Chinland Council (CC) le Interim Chin National Council (ICNCC) hna ah i tel ding in an ruahning aa dan ruang ah Brigade (2) ah an dir, tiah theih a si.
2024, February 23 in 25 tiang Matupi peng chung zungkip le mizapi hriamtlai phu hna Battalion kip in Commander hna nih Chinland Defense Force – Matupi i, a voi 2nak tonpumhnak an tuah hnu ah CDF-Matupi cu Brigade 1 le 2 ah an i ṭhan hi a si.
“Ramkhel ah ICNCC le Chinland Council (CC) an dir i CDF-Matupi Brigade-2 cu Chinland Council (CC) a cohlang mi phu an si. Brigade-1 cu Chinland Council (CC) ah tel a duh rih lomi dirhmun an si. Cucaah Brigade-1 le 2 ah kan tuah. Chinland Council (CC) a lungtling mi phu cu Committee i tel ding ah an zapi in luh an ngah” tiah CDF-Matupi chimphuannak nawlngeitu Salai Nine John nih a chim.
CDF-Matupi Brigade-1 ah Battalion-1 le Battalion-5 hna an i tel i, Brigade-2 ah Battalion-2, Battalion-3, Battalion-4 le atu tonpumhnak an ngeihmi ah an cothlan tharmi Battalion-6 hna an i tel, tiah theih a si.