Apui tling chin lengmang mi dothlennak lei ah!

Apui tling chin lengmang mi dothlennak lei ah
=======
Dothlennak arak tuahmi miphun tampi vawli tuanbia ah hmuh an si. Colonization pennak in zalennak caah ram tampi an rak cawlcang. Facist le Nazi hna kuttanf in zalennak caah dothlennak a rak tuahmi ram le miphun tampi an rak um. Dothlennak pohpoh hi zoh tik ah aho hmanh puitling tak in ralkap aiser in athawkmi an um bal theng lo. Mipi nih thil adik lo tiah an hmuh cangmi, tuah aherh tiah an ruah cangmi kong ah, an banh khawhmi hriam i lak i, ningcang tein dodalnak an vun thawkmi khin a cak chin lengmang mi dothlennak lei ah an rak panh ko hna.

Chin ram ah colonization pennak arak luhka ah khan Chin pupa hna nih fei le nam le puahcehin an rak doh hna. Kawlram chung zong ah leithuang mi hna kha Saya San nih arak hruai hna i fei le nam bak in mirang pennak kha an rak doh. Zei dah hmuh khawh asi? An hriamnak ai thlau tuk hringhran ko. Hriamnam izat hnu lawng ah kan do lai ti awk arak tha ve ti lo teh.

Nain, Kawlram chung dothlennak ah mi tampi nih Aung San le ralkap sawmthum hi theih asi i, Leithuang mi hna nih an khua cio in an rak dohnak tbtk hi ahram arak bunhmi asi kha kan philh tawn. Hmasa ahcun, tatpi ah an bahmi vainam le hreitlung in ral an dohnak khan apui tling deuhmi dothlennak lei ah an rak panh cio.

Chin miphun raldohnak puitlinnak ding caah cun, Chin miphun then tete i DF vialte hi Battalion min bunh in kan i thlen thluahmah aherh ko lai. Thazaang ai funh deuh kan herh, ningcang deuh zong kan herh. Mu le mal nei deuhmi le phung le phai, ithithruainak tha deuhmi tang lei ah panh deuh lengmang kan herh ko. Cu ti cun apui tling deuhmi dothlennak lei cu panh kan herh ti kha kan lung ah kan i chiah ahau. Lung thawh in acawlcang mi sirhmun in ralkapbu taktak dirhmun ah dothlennak cu a panh ziahmah poh ah thiltha asi ko lai.

Ramdang in phaisa thawhnak, fund kawlbak tbtk vialte zong hi cu ve bantuk in puitling deuh in a kal a herh peng ko lai. Cu lo ahcun, pingpang suk afawi. Peng le tlang cio le khua cio tbtk in fund tampipi a chuak lung lawm ngai asi. Nain, cu pawl thazaang hi ai funtom hlan chung poh, a tlitlawtmi aum peng lai.

Pui tling chin ding caah Chin miphun dihlak funtom in riantuan tti khawhnak lam sial aherh. Kachin nih Wunphawng an ti, miphun pi funtomnak hi ral doh abiapi tluk in an rak chiah i zeimawzat an i funtom. Kawlram tlangcung miphun ah an i funtom bik rih ko. Shan miphun then hna hi phaisa hmuhnak tampi an rak nei nain, an thazaang veizat in ai then tik ah, miphun tlawm deuh tukmi Rakhine hmanh raltuk nak thazaang ah an tluk ti hna lo. An i funtom kho lo tuknak nih an thazaang a zut ter dih. Karen zong biaknak nih an thencheu mi hna hmavual cu nihin tiang pehtawnh awk tha ti lomi dirhmun an phan.

Apui tlingmi dothlennak caah cun, chikhat ral sungh khi abiapi cem lo. Khua khat sungh le khuakhat kanghuh khin a dih lo – Kan lung cu a fak tuk ta! Kan mithli hna cu dothlennak caah kuanfang tu ah cang seh. Miphun pi huap in hmai nawrnak, miphun pi in awkkhat chuah i, miphun ralkap pi nih left right left right tiah kan i cer khawh tik cu, raldohnak tampi um theng lo hmanh in ralhna cu an zam lai.

Kan miphun pi aa rual ah khin Vancung mi Michael le ralkap bu nih ralkap a kan chap khawh! Jehovah khuazing hrim nih van khin azoh sawh lai lo! Dawtnak le rualremnak a um i kan miphun pahnih thum i lungrual thlacamnak lai ah khin a kan dirpi hrim lai! Ral hna cu dar le khuang thawng hmanh in an tian dih lai — kan lungte ai rual ko ahcun.
Inn hlun pakhat khi atha deuh in sak khawh ding caah, zeimawzat hrawh aherh tawn. Lam thing tampi hlawnh awk veizat hlawnh khawh ve kan herh.

Apui tlingmi dothlennak caah miphun dawtnak kong thangphawhnak awakening of patriotism timi kan karhter chin lengmang aherh. Kan dothlennak mei alh hi, a alh chin lengmang herh ko. Dothlennak hla le bia, miphun dawtnak hla le cabia tbtk tampi kan tial cio, kan ceih cio aherh. Apui tling deuh ding caah ruahnak phunphub chuahnak, bia phunphub i ruahnak a um hrim awk asi.

Abu in khua ruah ttinak tbtk le i zohkhenhnak le ikilvennak tbtk tampi kan ttang chin lengmang aherh ko. Chin pakhat ka sive ko atimi nih mah le umnak thutnak hmun cio in daidep um awk a tha ti lo. Cawlcangh cio i, mah le ti khawh tawk tuanvo liangcung ah i khinh cio kan herh ko tiin. Credit: Salai Biak