Hakha ah SAC Ralhrang nih meithal an kah
================
Nihin May 11 zanlei suimilam 1:30 hrawng in Hakha rungtlang um SAC ralkap nih hriamngan voi tam ngai an kah, tiah theih a si.
SAC Ralkap Jet Fighter Nih Khuapi Ah Bomb A Thlak Ṭhan! Senthang peng Khuapi khua ah SAC ralkap Jet Fighter nih nihin May 11 zinglei ah bomb a thlak ṭhan, tiah theih a si.
Tuzinglei suimilam 12:05 ah SAC ralkap Jet Fighter nih Khuapi khua le CDF-Senthang Headquater ah bomb a thlak ṭhan. Cu ruangah Hakha-Matupi lam a him rih lo caah caan karlak chung kan kham, tiah CDF-senthang nih cathanh an chuah.
“Nihin May 11 zinglei suimilam 2:00 hrawng ah SAC ralkap Fighter nih CDF-senthang Headquarter ah bomb a thlak ṭhan ruangah sakhan cu a rawk dih. Minung tu cu aa hliammi an um lo,” tiah min langhter a duh lomi pakhat nih The Chin Post ah a chim. Fighter nih Khuapi khua ah a voihnihnak bomb a thlak ṭhan ruangah khua kiangkap a ummi khuami hna cu a himnak hmun ah rahrial in an zam hna, tiah theih a si.
Kawthaung In Thailand Ram A Lutmi Myanmar Rammi 24 Tlaih An Tong; Myanmar ram, Kawthaung ramri in Thailand ram ah tilawng in a kalmi Myanmar rammi 24 kan tlaih hna, tiah Thailand ralkap nih cathanh an chuah.
May 9 zanlei sang ah Myanmar rammi 14 cu an tlaih hna i, Thailand luhnak ding ah minung pakhat nih Thailand Baht 30,000 an liam. Annih hi Thailand ram Phuket le Malaysia ah rianṭuan dingin a kalmi an si. Tilawng khaltu pa cu a zam manh, tiah theih a si.
Cu bantuk ṭhiam in May 7 lio zong ah Thailand ram Yanaung pengkomh, Kawthaung in Thailand ram ah a lutmi Myanmar rammi 10 cu Thailand nawlngeitu nih an tlaih hna, tiah theih a si. Tlaih a tongmi Myanmar rammi 24 cu palik sakhan ah kan chiah hna i upadi ning in bia an ceihpiak hna lai, tiah Thailand ralkap nih cun an langhter.
Paletwa Peng Cu Pengkomh Pakhat In Kan Ser Cang — IKACC; Chin ramkulh, Paletwa peng cu mah tein aa ukmi pengkomh pakhat in kan ser i, pengkomh ukhruainak phu cu Paletwa ukhruainak pengkomh Council in rian kan ṭuan lai, tiah Interim Khumi Affairs Consultative Council(IKACC) nih nihin May 10 ah cathanh an chuah.
CDF-Paletwa le IKACC nih a luancia March 22 in 24 tiang a voikhatnak Coference meeitng an rak tuahmi ah atu bantukin biachahnak an rak tuah, tiah theih a si. Cun, dohthlennak caan chung ah Chin ramkulh chung um peng dang hna he pehtlaih rianṭuannak ah fawi zaang deuh ding in pengkhat, pengkomh khat in rian an ṭuan cang lai, tiah an langhter.
Taungsalone Kahdohnak Ah KNDF Thiamhlei Commando Pakhat Telh In Pathum An Nunnak Liam! Shan ramkulh thlanglei Pinlaung peng, Taungsalone khua kahdohnak ah KNDF Battalion 8 in thiamhlei ralkap pakhat le Battalion 11 in ralkap pahnih nih ram le miphun ca ah an nunnak an pek, tiah theih a si.
Thiamhlei ralkap Tatsu(တပ်စု) hruaitu pa hi May 8 ah a nunnak a liam i a dang ralkap pahnih hi May 3 kahdohnak ah an nunnak a liam, tiah KNDF-BO8 nih cathanh an chuah. Pinlaung peng le Pekhon peng ramri ah SAC ralkap le PDF cu February thla dongh in kahdohnak an thawk i May thla tiang pehtlai in an i kap, tiah theih a si. April thla chung Shan-Karenni ramri Pekhon le Pinlaung peng kahdohnak voi 50 chung ah SAC ralkap 70 an thi i, hriamngan zun 7, meithal zun 52 le zen-kuan tam ngai kan lak, tiah KNDF nih cathanh an chuah. February thla in kahdohnak a chuah ruangah Taungmeythin, Lonepin, Pinpone, Nanneng le Taungsalone khuami 10,000 tluk cu ralhrial in an zam, tiah theih a si. Credite; The Chin Post