Angela Merkel nih US lo ngai cun Europe himnak le tthanchonak cu a si kho ding a si lo.

Europe Politics
============
Tutan cu Europe Politics tlawmpal in van bih ta sih. President Trump hi Europe zong ah a dirkamh tu an tam pi ve. A tlangpi in orh-lei party (right-wing parties) in politicians cheukhat nih an dirkamh. Right-wing parties ti mi ahhin far-right wing ti mi category chung ah khumh mi le right-wing populist parties tiin kawh mi an um. Tchnk ah Freedom Party (Austria), Front National Party (France), Danish People’s Party (Denmark), Sweden Democrats Party, Progress Party (Norway) ti pawl hi right-wing populist parties an si hna i far-right wing an si ti ko tiah ruah mi zong an um. Phundang chim ahcun conservative parties an si hna i ram ngeitu (inn-tek) kan si ti mi le an pupa chan in an ram nunphung/biaknak pawl kha kilkawi, cozah nih mipi sin ah tax tlawm deuh i lak i pumpak chawlehthal nak ah tlawm deuh in cozah ithlak (lower tax and lower controlling private commercial activity), a tlawm khawh chung in ramdang mipem tlawm ter (restrictive immigration policies) tbk hi an au pi bik mi an si.

European right-wing parties pawl hi 2017 hnu khan an tthawng ngaingai (2016 president Trump a si hnu in European right-wing parties pawl hi an tthawng khun tiah an chim). Tutan US election buainak zong ahhin right-wing politicians cheukhat nih cun Trump an dirkamh ve ko. Norway zong hi Progessive Party an tthawng ngai ve. Olso county uk tu asi i Progressive Party politician asi mi Geir Jacobsen hna nih cun tutan US election hi fix mi asi, vote fir piaknak evidence zong tampi a um ko, vote fir piaknak ruang ah pei Biden nih a tei ko cu tiin fianghlang bak in a chim ve (VG, 27.11.20). Sinain right-wing politicians tam deuh nih Trump hi an uar ve lo i Biden tu hi an welcome deuh hoi. Phundang chim ahcun Europe politics ahcun Trump nak in Biden hi a hmunhma a kau deuh ngaingai. Pressident Trump ai dinh hnu ah EU le NATO zeidah a lawh te hnga?

President Trump nih America First a ti lio ah Biden nih America wil come back a ti ve i cucu European politicians nih lunglut ngai in an bawh ko. A tthatnak zong um dawh asi i a chiatnak zong um ve dawh asi. Trump nih America First a ti i vawlei hruaitu dirhmun in a dir tawnnak kha a rak kal tak thluahmah. Cu lio ah China nih Global First a ti ve i van tthat tiin US dirhmun ah ai peih thluahmah. Cutin Asia region le Europe region ah US dirhmun kha rolh thluahmah ai zuam. US le Europe cu kum caan saupi a ttangtti le ai bawm peng mi an si tik ah US dirhmun kha China nih van rolh taktak ding khi an duh lem lo, China nak in US nih vawlei pi a hruai kha Europe hruaitu pawl nih an duh deuh. Nain Europe hruaitu lak zong ah cun hmuhning an i dang ngai hna. US nih EU le NATO a chuah tak zong kha Europe ram mah te khuakhannak le nawlngeihnak a cak deuh i a ttha deuh lehlam tiin a ruat mi zong an um ve.

Tchnk ah Biden nih US kan rak kir tthan lai a ti tik ah France president Macron cu ai nuam lem lo. Macron nih cun, Trump nih president a ttuan lio ah EU le NATO hi US tel lo in mah tein kan cawlcangh khawh deuh nak hnga biatak tein kan izuam i kan tthawng deuh, a ti i US ah ai hngat mi dirhmun kir tthan kha a duh lo. Cu pin ah US le China kha international agenda ah tamtuk power ngeih ter lo ding le EU khuakhannak ah France nih hruaitu dirhmun (leading role) tleih kha a duh deuh. Cu lio ah Germany hruaitu Chancellor Angela Merkel nih cun EU le NATO ah US nih leading role a tleih tthan kha a duh deuh (Macron le Angela Merkel hi Trump he ai rem lo mi an si). Angela Merkel nih cun, Macron ruahnak hi cu faktuk in a kal sual mi illusion bantuk a si, US lo ngai cun Europe himnak le tthanchonak (security, stability and prosperity) cu a si kho ding a si lo, tiin a leh ve (EU ram a hip tu bik hi Germany, France le Britain an si i Britain cu a chuah cang caah Germany le France hi a tthawng bik an si). Credit: Sangukceu Zinhlawng