America mi million 75 nih an thimmi kha minung million 50 hmanh thimtu a ngei lomi tu kha LIH bak in an teiter i an tlinter ko

Minung nunnâk ah hin, LIH NIH BIATAK A TEI CÂN, a um tawn. Adam sualah a tluk i Pathian he an i țhennâk zong kha Adam nunnâk ah LIH nih BIATAK a tei caah a si. Genesisi ti cu Hramthawknâk tinâk a si. Dal khatnâk hi Van le Vulei hramthawknâk a si. Dal hnihnâk hi minung hramthawknâk a si. Dal thumnâk hi minung nunnâk ah sualnâk nih hmunhma lâk hram a thawknâk a si.mZeitiset in dah minung nunnâk ah sualnâk nih hmunhma lak hram ai thawk timi cu Hramthawknâk (Genesis) dal thum câng khat in cang sarih ah fiang tein țial a si. Eden dûm laifang i a chia le a țha hngalhnâk thingthei ei kha thihnâk (i țhennâk) a si tiah Pathian nih a chimmi kha BIATAK a si. Hra. 2:17. Hlengtu nih, “Nan thi hrim hrim lai lo” tiah a chimmi kha LIH a si. Hra. Hra. 3:4

Asinain hlengtu nih khan nan thi hrim hrim lai lo tiah lih fangfak a chim hnu ah nan ei ah cun nan mit nih khua a hmuh lai i a chia le a țha kha hngal in Pathian bantuk nan si lai. …tiah bia tak pahnih a hun chap.
A sullam cu nan thi hrim hrim lai lo tiah lih a chimmi kha Evih nih a zumh khawh nâkhnga mit khua hmuh le chia tha hngalh i Pathian bantuk si timi biatak in a hun khuh. Mit khua hmuh le chia țha hngalh i Pathian bantuk si kha biatak a sinâk cu câng sarih le câng kul le hnih ah kan hmuh. “An mit nih khua a hun hmu i. ….” 3:7 “Zohhmanh u mipa cu chia le țha hngal dingin Kanmah bantuk a si cang” 3:22

Hlengtu nih a rak chimmi kha biatak a rak si ti kha a fiang. Mit khua hmuh duh le a chia le a tha hngal in Pathian bantuk si duh ah theitlai cu a hun ei tikah nan thi hrim hrim lai lo timi LIH kha a hun lang i thlarau lei in an thi ai. “Thih” timi sullam cu “Țhen” tinâk a si bangin sermi minung le Sertu Pathian cu felfai teiin an i țhen ai. Cucu minung nunnâk i sualnâk nih hmunhma lâk hram a thawknâk cu a si. Adam nunnâk ah LIH nih BIATAK a tei ti cu za ah za in a fiangmi biatak cu a si. Sehtan or Khuachia rian ngan bik cu HLEN a si tiah Baibal nih a fehter. 2 Kor. 11:3. 1Tim. 2:14. Bia. 12:9. rak rel te.

Tahchunhnâk in kan fianter ah cun tichung nga khi sio ah cangcel țoktarh hmangin ti lêng ah chuak lak in kan hnuhmi khi kan hlen caah a si. Sio kha lang kho loin cangcel in kan tuam or kan khuh caah a si. Hlengtu nih nan thi hrim hrim lai lo tiah lih a chimmi sio kha lang kho lo dingin mit khua hmuh le chia țha hngal i Pathian bantuk sinâk biatak cangcel in a khuh caah Eden Dûm in chuaklak in hlengtu nih Adam le Evih a rak hnuh khawh kha a si. Nihin tiang in minung nunnâk ah hin LIH nih BIATAK hi a tei cân a um leng mang ko.Hmailei zongah um lengmang dawh a si rih ko.

Tutan America Predident thimnâk zong ah LIH nih BIATAK cu a tei i America mi million 75 nih an thimmi kha minung million 50 hmanh thimtu a ngei lomi tu kha LIH bak in an teiter i an tlinter ko. Cucu hlennâk ruangah a si ti hi hlengtu a simi anmah Democrat mi lila zong nih an chia țha hngalhnâk ah cun an cohlân hrim hrim ko lai. Baibal țhiamthiam hi a dik zungzal ko.

“Asinain phaisa nih zeizong vialte a leh” (But money answers everything) Phungchimtu.10:19 Democrat mirum rual nih an phaisa bawm kha an hawn i an fonhmi phaisa tom tom nih biaceihtu an ka vialte a phih i million 50 hmanh vote a hmu lomi kha million 75 a hmumi teinâk ah an hman khawh ko. Zeicatiah a palh kho lomi Baibal nih pei ” phaisa nih zeizong vialte a leh or a phi a pek khawh tiah a rak ti cu. Lainawng mi zong lainawng lomi bangin thiam a cohtu le lainawng lomi zong lainawng bangin thiamlo a coter tawntu hi phaisa in ziknawh ruangah a si tawn ti hi a hmunmi bia tak a si.

A dik lomi vote an hmuhmi zong zoh duh lo in biaceihtu hna mit a cawttertu le a dik lomi vote mit in a hmutu tehte bia zong ngai duh loin biaceihtu hna an hna a chehtertu hi phaisa a si. Hi Baibal bia “Phaisa nih zeizong vialte a leh” timi hi tutan America thimnâk ah hin a dik ning a fiang chin chin. Asinain Hramthawknâk dal thum câng riat ah “Cu ni zânlei ah dûm chung i Jehovah Pathian ai chawh thawng kha an theih.” timi hi ruah awk a tlak tak tak.
Lih hmangin hlen an si ni bak ah, ei lo ding thei an ei ni bak ah, sual i an tluk ni bak ah, thlarau lei in an thih ni bak ah, Dawtu Pathian cu a rak cawlcâng i a umnâk Van kaltâk in Sehtan nih lih in a hlenmi minung kha a rak kawl hna.

An sual ngaihthiamnâk ah Tufa thisen kha luanter in anmah tein an i țhitmi theipi hnah kha a thisen a luangmi Țufa phaw lila in a thlen piak hna. Hram. 3:21. Bia.13:8 (vawlei ka ah thahmi Tufa). Tutan Amecica thimnâk ah LIH in BIATAK teiter a simi zong ah hin Biatak Pathian hi cawlcâng loin a um te hnga maw!! Zei tik ah dah a cawlcangh te lai timi tu cu Amah Pathian nih a khiahmi cân tu ah si te ko seh. LIH nih BIATAK a tei cân hi um hmanhsehlaw a cân a tlin tik ah cun BIATAK țhiam țhiam nih a hmunmi teinâk cu a co tawn ti hi minung kan tuanbia ah a hmunmi biatak a si. Credit: Rev. Dr. Rualuk