America Le South Korea Fonh Ralkap Trainning Tuah Ti Lo Dingah North Korea Nih Ralrinnak A Peek Hna. March 4, 2024 ah thok in America le South Korea fonh ralkap training tuah ṭinak cu, phihkhar dingah North Korea defence ministry nih nawlnak a tuah tiah theih a si.
America le South Korea fonh ralkap training tuah ṭinak hi phihkhar asi lo ahcun a donghnak ah buainak fakpi chuah tertu a si te lai, tiah North Korea Ruling Workers’ Party i Rodong Sinman nih a langhter.
United States le South Korea cu Korean ram Vawlei fonghlei (peninsula) hmun pakhat ah ni 11 chung rau dingin Freedom Shield training an tuahṭi tiah theih a si. Nikum 2023, ah US le South Korea fonh ralkap training tuah lio ah North Korea nih short-range missile zeimawzat a rak kah bal cang. Lungmili Post
Relchap: Chin ramkulh, Chin hriamtlai phu hna karlak ah ramkhel lei ruahnak aa dan ruang ah Matupi peng hrambunh CDF-Matupi cu Chinland Council (CC) le Interim Chin National Council (ICNCC) hna ah i tel ding in an ruahning aa dan ruang ah Brigade (2) ah an dir, tiah theih a si.
2024, February 23 in 25 tiang Matupi peng chung zungkip le mizapi hriamtlai phu hna Battalion kip in Commander hna nih Chinland Defense Force – Matupi i, a voi 2nak tonpumhnak an tuah hnu ah CDF-Matupi cu Brigade 1 le 2 ah an i ṭhan hi a si.
“Ramkhel ah ICNCC le Chinland Council (CC) an dir i CDF-Matupi Brigade-2 cu Chinland Council (CC) a cohlang mi phu an si. Brigade-1 cu Chinland Council (CC) ah tel a duh rih lomi dirhmun an si. Cucaah Brigade-1 le 2 ah kan tuah. Chinland Council (CC) a lungtling mi phu cu Committee i tel ding ah an zapi in luh an ngah” tiah CDF-Matupi chimphuannak nawlngeitu Salai Nine John nih a chim.
CDF-Matupi Brigade-1 ah Battalion-1 le Battalion-5 hna an i tel i, Brigade-2 ah Battalion-2, Battalion-3, Battalion-4 le atu tonpumhnak an ngeihmi ah an cothlan tharmi Battalion-6 hna an i tel, tiah theih a si.