Alang Thluahmah Cang

Alang Thluahmah Cang
=============
Tihni le Nizan ah kan ram uknak le nawlngeihnak hi Kawl ralkap nih an lak ka duh katimi le an lak zongah ţihding a um tuklo timi le tlennak a chuak lai timi kong live ka thlah. Cu ka live tlhahmi le ka chimmi ruangah micheu(NLD le ASSK a molhpi mi hna) nih Kawl ralkap le USDP dirkamh in an ka ruah len. Cutin ruahdomh phunkip he an ka puh len nain ka dirhmun aa thleng lo. Aruang cu kei cu Chin ram le Chin miphun hi Pathian nih a kan pekmi ram zaleng le miphun zalong mi kansinak kha ka upat i mi phundang penmi le fialchom kan sinak kha “Pen SAL” ah ka ruah i cu dirhmun in luatnak le zalennak kha ka hmuitinh bik asi caah asi.

Nihin ah kan ram uknak i Kawl ralkap nih thahrum in an uknak hi ka duh ballo i a tu zong ka duh lo i hmailei zongah kaduh lailo. Curuang ahcun ka fim cawnnak pi le hmailei ka chunmang hlawtak in 2007 ah Sianghleirun pawl hruaiin ralkap uknak ka rak doh. a tu zong ka doh rih lai i zeiruangah dah ka doh lai timi kha fiang tein ka hngalh i ka dir ding hmun kha fiang tein kaa thim. Curuang ahcun ralkap nih nawlngeihnak lak kha a tha ka tinak asi. Aruang cu live ka thlah nakah ka chim len cang caah ka nolh ti lailo. A chuakding le a ra cuahmah mi cungah ka hmuhning tu ka chim lai.

Atu ah Vawlei cung ram kip le UNO nih thahrum in ralkap riantuannak kha an hun auhnawh. Ramchung ramleng in duhlonak langhter le cozah uknak kal kholo dingin cozah riantuantu nih duhlonak langhter an timh cang. Hiti ning in a kal ahcun a rauh hlanah kan ram ah thlennak pical a chuak lai. 25% in Cozah nawlngeihnak an tlaihhrem mi le an sualnak maimilhnak le i runvennak ah an tuahmi 2008 Phunghrampi hmanawk tlaklo in a um canglai. Cun hilio can ahhin Tlangcungmi nih kum 70 leng hriamnam lak in kan dothlennak pi fingrei cat dingah caantha kan ngei. Cu vialte cu hi Ralkap thahrum riantuannak hi a umlo ahcun an chuak kho lailo. 2008 Phunghram pi cu an nunter ka in a diklo thlen/remh/hrawh a hau tiah aupi asi i U Koni nih hman tlaklo mi asi, hrawh a hau tiah fianghlang tukin a chim caah a nunnak lak a tong. NLD nih Hlutdaw chungin kan remhlai anti nain zei hleilo, Tlangcung le NLD fonh nih Buthum komh ruahţinak( Hriamtlai+Cozah+Ralkap) in remhnak a phi kan kawl lai anti nain zei a hleilo. Cucahcun tutan thil a cangmi long hi a donghnak lam ummi asi caah hihi ka duh lo zongah ka duh ka tinak asi. Khatlei in Tlangcung mi nih kan dothlennak a muru kan khen khawh nakhnga caah lamthatuk asi tiah ka ruahfon caah asi.

Zei asi hmanhah tu cu an lak cang i mipi nih thim lo le khinh lo in Min Aung Hlaing nih a mah duh in cozah a ser i rian a khinh hna i kan ram Cozah sinak kalpi a timh cang. Hihi phunglut/phungning asi lo caah cozah tiah pom le kawh loding asi pinah riantuantu le cozah a nunnak hnga colhcanghnak i a ummi paoh nih nan rian cio kha tuan loin nan um ahcun kan duhmi a rauh hlanah a tling kolai. Raltha te le lungsau tein ţangcio ko hna sih. Credit: Peng Hlawnceu