Ahopaoh Nan Hmuhning Cio Chimnak Nawl Nan Ngei Dih!

Ahopaoh Nan Hmuhning Cio Chimnak Nawl Nan Ngei Dih!
============
CNA, CDF, PDF, CNDF le YDF nih ral an doh tikah mipi nih zakhat ah zakhat in thazang kan pek hna i thla kan campiak hna. Cheukhat cu rawl zong ei kho lo zaan zong it kho loin a rak tang tuk lawmmam mi an rak ummi an tampi ve tawn, an um khawh lo tuk le an ruahtuknak ah a phunphun in anmah khuakhan in an rak khaang ve tawn.

Cutideuh in CNA le CDF hi um hna sehlaw, lungtum hrilh hnawh kho hna sehlaw, cuka zawn tlangpang a remnak ahcun rak bawh kho hna sehlaw, Mizoram MAP meithal khi hlang kho hna sehlaw, tiin an lungduh le siaherh bia kha an chim cio tawn.

Cubantuk cu chim phung asi i thlauhrai zong a si lo. CNA le CDF ruahnak nangmah nih na pek hna ahaulo, nangnak fim le thiltheih lawngte an si, tiin ti awk a si lem lo. Cun hihi pumpak zalawnnak asi ko caah an siaherh bia cu an chim cio ding kha asi ko. Asinain CNA le CDF caah chim lo dingmi thil biapi hna a chim asi le cucu ti bak ding le chim bak lo ding kha asi hnga.

Cuka hmun in an rak bawh hna, camp an chuaktak dih cang, cuka leiah an kal lio ti bantuk hna cu chimchim rai asi hnga lo. Cu si lem lomi cuka ah rak bawh kho hna sehlaw a thattuk lai, Varhlei chat hna sehlaw a tha lai, Hakha phakter hrimhrim hna lo ah a tha lai, thihsi dinter viar hna sehlaw a tha lai, asiloah kan ralkap pawl hi san an tlai lo tuk tizong cu a phung viar asi ko.

Minung pakhat nih zalawng tein amah thinlung ummi kha chimnak nawl ngeih dih kan si, atha lei he a chia lei he ahohmanh nih chimnak nawl kan ngeih dih kanmah pumpak zalawnnak bak asi. Amah belte kan ralkap le kan mipi caah a himlomi biachim belte cu hrial bak ding asi.

Thawngpang Thar (Update kan vun tuah than). Nizaan Lungpi khuaah ralhrang motors 6 le tanks 2 a hungkaimi le CNA i kahnak cu Ralhrang hi 80 hrawng lawng an sinain an hriamnam that le rakdoh thiam he an thawn ngai caah an tolh tak hna i Rialtii khua an phan kho i inn zong an khangh len.

Thil fiang ngaimi cu ralhrang hmaikal motors 6 le tanks 2 hi special commando pawl an si lai timi cu a fiangtuk. An hnu lei in a thaizing in a vun zul tawntu motor 40 tluk khi cu ralkap sawh an si lai i hriam ngam pipi a vun phurh chihmi an si lai zumh asi. Camp a lak ding in kahnak caah miakpi ti bantuk le zenkuan he ralkap 500 hrawng si dawh an si.

Hmaisuang motor 6 le tank 2 khi a biapi taktakmi biakhiaktu ding phun in tei herh an si cang. Zaan an riahnak zongah namte lawng hmanh in minung 200 tluk nih a thli in luhhnawh hauphun an si cang, an biapi tuk. Tu i an i kah ning zoh ahcun kham khawh dawh an si te lo kho, Hakha hi hnu ni 3 tluk ahcun a hung phan kho an si, Hakha phak ahcun apoi tuk cang kho.

Israeli ralkap 20,000 nih Six Day War lio ah Egypt ralkap 100,000 cu lampi aan rak phih kanh khawh hna, Israeli ralkap hi hriamnam that le raltuk an thiam ruang asi lo, hi ral kan sungh ahcun Arab sal ah kum thong in kan tla lai i Israel ram hi a tlau dih lai, timi an theih caah an nunnak pek bakin an rak tuk hna i Egypt a rak i chuah sual cikcek.

Hi ral hi kan miphun hneksaknak bantuk an si, kan tei hrimhrim a herh. Kan tei hrimhrim ko lai Pathian kan leiah a tang lai i. Hakha an hung phaknak dingah laam caan saupi ai duh rih, Hakha an phak i an lak, Victoria Camp an lak khawh sual te hmanh ah CNA le Chin miphun cu zeitik hmanh ah a kan tei kho taktak lai lo tiin.

Cun UN le raminnpa policy zong hi a rauhlan ah ai thleng lai i ralkap caah a donghnak biaceih (NUG hriamnam in bawmh) nak an tuah te lai hi a naih ngai cang lai. Zei asi hmanh ah hi ral hi sungh a ngah lo kan tei hrimhrim lai, a lamkip cio in tang ko hna usih. Credit: Chelsea Bawi

Pengtlang lungfahnak bia cu isum hraam hna usih! Kawl Rallokap rapchiahmi si! Gangaw in Halkha direct in rak kai khawh si komi Kalay-Falam lei in an rak i kuaih/helmi hi a sawhsawh si lo. Atu bantuk Pengtlang buai te ding an theih cia i rapchiahmi si.

Cucu kan theih ko buin i foih/awhter hlah usih. Kan tuanbia a um ko khah. College pek an kan duh lo caah Halkha le Falam a rak kan cuhter. Cu tactic cu— College caah hmun rem an hmuhmi ahkhan direct kal ko ding kha khuakip le pengkip ah an vak i ‘nan duh maw’ tiah an va hal cio hna tikah ‘nan icuh’ an ti le Khaikam/Kalay ah an chiah deih ko khah.

Laimi pengtlang i buai kan fawining an theih tuk. Min Aung Hlaing khuachia ruahnak petu zongah Laimi cu kan vai itel hoi caah an thiam chinchin cang lai. Hmailei zongah tampi kan ton te lai. Kan hnu Mara kan unau pa thihnak kongah zong pengtlang in a thlirmi an um khah. Zeitluk in dah MAH uico pawl an i nuamh lai.

CNO/CNDF zong hi an hruaitu pawl — Salai Van Thawng Thang (TTR) le Salai Timmy tbk—hi mino an si i Chin miphun ramkhel (nationalism) kongah lungput pipuam taktak a ngeimi an si ko. Pengtlan politics nih a khuhchilh hrimhrim hna lailo. Zumhtlak hruaitu tha an neih ko caah hmailei ah miphun funtomnak a tha bik a chuak te ko lai tiah ka zumh peng ko.

CNF, CDF le CNDF upa pawl cu CJDC timi an ser i cu tangah rian an tuanti ko hna. Atu kong zongah an upa pawl a herhning in an iceih ko i cucu za-ah-za in ihngatchan ko hna usih. Bawipa nih a tha bik in a khanpi ko hna lai.
Chinmi caah lungrualnak ser hi a har bikmi a si. Asinain a herh bikmi a si caah izuam ko hna usih! Credit; Salai Ceu Bik Thawng