An nih AA le KNLA lei minung pa 4,5 an thih ah khan SAC ralhrang Sakhan an ti tung!!

CNF/A a țanh bak mi pakhat ka si nain!!
===========================
CNA upa pawl ruahnak cheu ding ah nai tlak lo nan ka ti ko lai nain a si kho ti lo. Kai tuar ti lo. Raltuk strategy (ningcang) nan thlen lo ahcun Kawl ralkap nih CNA an phil peng ko hna lai. Kawl ralkap nih CNA an phil mi hna hmanthlak hi Fifty Two timi an page ah an tar pah lengmang i, ruak pahra nak tampi an tar cang.

Nain CNA nih cun mah zat kan thah cang hna an ti lengmang nain Ralkap ruak pakhat te zong ni hin tiang ah an tar kho rih lo. Falam le Hakha kar kahnak zong ah cu zat motor kan hrawh, cu zat kan thah hna an ti peng nain ruh pel pakhat hnih photo dah lo a dang ral ruak taktak an lak khawh mi um bal lo. Nain kan mah lei thi mi ruak tu cu Ralhrang sin in siseh, kan mah mipi ralkap sin in siseh, an photo tam tuk te kan hmuh cang hna.

Hi ruang ah hin ka lung fak tuk ve. CNA strategy a rannak in thlen a hau cang. CNA strategy hi zapi nih cun nan thei lai lo. Nain kei cu ka theih. An strategy biu-ha cu CNA ralkap pa nga ruk te te in umter a si. Tahchunhnak ah Kawl ralkap an ra ti tikah maw, an bawh hna ti ah maw, an va pel hna i an va kah hna titik maw, zei tik hmanh ah minung 10 cung in an chia bal hna lo. Cucaah cover piak tu zong nei lo in an um peng.

AA Army kan zoh hna a si ahcun Kawl ralkap minung 50 an si ahcun AA 100 paoh nih an but hnawh colh hna i cawl kho loin, lu hmanh cau ngam loin an tuah hna. Nain CNA cu minung 100 in voi khat taktak zong hmun khat ah hmun hma an la bal lo. Tahchunhnak ah Falam le Hakha kar i kahnak hna ah khan CNA cu a zaa leng an si ve ko nain minung pa sarih riat tete in an țhek dih hna i, Kawl ralkap nih le a tom tom in hmun khat an rat tikah an zam manh lo ahcun an pa sarih riat ning nawn in an thah colh lengmang nak hna kha a si. A dang pa sarih riat bu le a hlat nak pi ah an um caah an i bawm kho lo.

Minung pali nga tete lawng in an țhek tik hna ah an thla kam, an thla duk i, Ralkap 30 le 40 hrawng an hmuh hna hmanh ah a therh hna i, a hnu deuh ummi nih an zuk phiak tawn hna caah a hmai deuh um mi hna cu zam manh lo in an thi țheu. Cover kah piak tu zong an nei huaha bal lo. Cun khur cawh i, bawh ti bantuk hi hmun tam deuh ahcun a um lo caah an pawng kam ah RPG kuan a tlak ahcun an thih lo hmanh ah lo phiar an zam colh nak hi a si.

Cucaah a si khawh ahcun CNA zong hi minung a zaa zaa in hmun khat ah pum khawm hna u law, khur cawh zong fel u law, ralkap 20 hrawng i a hung kai mi bang hna kha cu a hlawm in nan hlawm colh ko hna lai. An mei thal le kuan chuh mi hmanh kha a tha hnem tuk. AA le KNLA bang hna khi cu Kawl ralkap kuan le meithal an chuh mi hmanh hman cawk lo nawn a si cang.

Kawl nih သာလွန် အင်အား an ti i, kan ral pawl nakin minung tam deuh in rak dir onh peng ding an si. PUBG ai celh mi bang nih cun nan theih tuk lai. Zei tluk kah ka thiam ko ti zong ah minung pakhat lawng hna kan si i, enemy pa thum hrawng nih an van i cover piak i, a hmai, a sir lei hna an van kan phomh ahcun kan thi colh ko.

A leng raltuk zong ah hin minung tam deuh in hmun khat ralhruang ser ter hi a bia pi tuk. Ral zong a that ter deuh. Mi ral chia tete hmanh a zaa zaa in hmun khat ah țan van lak ter hna ahcun an ral tha. A sang sang i vuak, chungkhat le chungkhat i vuak hmanh ah mi tam deuh nih a tlawm deuh mi cu tei deuh peng a si ko.

A tu CNA strategy cu pioh cia guerrilla Warfare phun kan hmang ti a si nain a tu bantuk caan ahcun a ngah lo. level san ter deuh a hau. Sang le Sang i vuak ah sang khat lei in minung 100 ra hna seh, kan nih lei in minung 200 kan um ko nain 10 tete lawng in thlah hna usih law a ho sang nih dah a tei lai. Ruat ko u caa. Cucaah Ralhrang motor pakhat hnih men i a kal ko mi hna cu, lam chak, lam tlang lei he hmanh a zaa zaa in, neih tein khur cawh hnu ah bawh hna u law a motot he minung hi hlawm khawh dih ding pei a si ko cu.

CNA zong kungkaa motor pawl in Kawl ralkap umnak gate lei ah khin va kal u law, Ralhrang le bang nih cun lam chak zong in an in bawh hna lai lo. Lam lai bak in an in bawh ko hna lai. Van lawng zong an hmang lai lo. A ngan bik RPG lawng an hman lai. Cun an auto mei thal a va si ko lai.

CNA zong nih mah pawl tham cu nan i neih ve ko caah Lam pi zulh in motor pakhat pahnih a ra nulh malh ko mi zong minung pahnih thum te lawng hna bawh ter cu, a si kho lo. Mei thal voi khat hnih nan puah i nan leek tak colh hna ko cu teh. Cun a kar lak ah Cover piak tu zong an um ti lo ruang ah i zuuk manh loin a thimi kan pasal tha an tam tuk cang. A thimi kan pasaltha pawl hi mi raltha deuh lawng te an si hna.

Voi khat hnih puah i pil colh an duh lo ruangah ralhrang pakhat tal ka thah lo ahcun an ti ruangah an i chang peng i, a hnu lei le a sir lei in cover piak tu zong an i daih ti lo tik ah a donghnak ah an thih hi a si. …. AA te hna, KNLA te hna tham pali nga kan thi an timi ah khan Ralhrang camp pei an ting cu. Hriam tam tuk te an chuh hna. Tam tuk te an thah hna..

Cucaah zei tik hmanh ah kan pasaltha pawl hi pa nga ruk tete lawng in ral va ramh (chim) ter hna hlah uh tiah kan nawl duh hna. A tlawm bik 50 bu in hnu hmai le sir lei vialte veng bu tein ral va ramh ding le bawh ding in kan forhfial duh hna. Nan bawh nak hna ah khur kahcham cawh zong fel deuh u law, RPG le hriam ngan kuan a tla mi chung zong in nan him deuh lai.

A tlak zong ah zam colh lo ding in kan nawl hna…. Kan theih tawk ah AA hna cu Ralhrang camp kam bak ah kahcham khur pawl an vai i cawh i, a chung ah an um caah Ralkap vanlawng le helicopter zong nih a chei hna lo i a donghnak ahcun ralhrang camp an lak lengmang ko. Kan lak ti sawh si loin an nih cu hriam an chuh mi hna hmanthlak le ral ruak vialte zong a tu le a tu an phozar ko khih.

Vietnam zong kha khur cawh an fel tuk ruang ah US vanlawng hmanh nih a chei hna lo…. Kan Laitlang le bang ah hin cun khur cawh fel ahcun Rungtlang le University hrawng i miakpi an kahmi țungtak hna khi cu hriktida hmanh a thak lai lo. Kan ralkap hi ka dawt tuk ve hna caah cover piak tu neih lo ruang i a thimi pawl kong ka ruah ah kai hngilh khawh lo ruang ah ka van tial ve nak a si. Crd-Jacob Paul

Relchap, Paletwa Ah SAC Ralkap Nih Tualchung Mi 2 An Tlaih Hna , Chin ramkulh, Paletwa khuapi ah SAC ralkap nih khualtlawng cazin kongkau he pehtlaiin October 13 ah mino 2 cu an tlaih hna tiah tualchung mi nih an chim.

Tlaihkhih a tongmi hna cu kum 20 luan mino an si i, an pahnih in pa-yan rianṭuanmi an si tiah theih a si. Tlaih a tongmi pahnih chung in pakhat cu October 13 zaan ah khualtlung cazin an checklio ah an tlaih i, pakhat cu a thaizing zinglei ah an tlaih tiah tualchung mi nih an chim.

An pahnih in Paletwa khuachung Rakhine sang tiah auhmi(Rakhine miphun tampi an umnak) Paloauktaung(ပလုတ်တောင်) sang ah an tlaih hna. A tutiang ah tlaihkhih a tongmi hna an konglam thawng theihmi a um rihlo tiah tualchung mi pakhat nih a chim.

Mingaladon SAC Vanlawng Tual Chung 107mm Hriamngan In Kan Kah Tiah Dohthlengtu Phu Nih An Fehter, Yangon ramṭhen, Mingaladon SAC vanlawng sakhan chung ah 107 mm hriamngan lung 3 in October 14, zaanlei ah kan kahdoh hna tiah dohthlengtu phu nih an chim.

“October 14, zaan suimilam 7:50 renglo deuh ah 107mm lung 3 in Mingaladon vanlawng sakhan chung kan kahdoh” tiah dohtglennak tuahtu phu chungtel ralkap pakhat nih an chim. “A si, vanlawng tualchung an kah ti cu a fiang, vanlawng an i rawk le rawk lo cu kan thei lo” tiah vanlawng tualchungum mi pakhat nih a chim.

Monywa Ah SAC Ralkap Motor Pakhat Kutcheh Bomb Puahhnawh An Tong, 3 An Thi, Sagaing ramṭhen, Monywa ah SAC ralkap motor pakhat cu kutcheh bomb hmang in kan kahdoh hna caah minung 3 an thi tiah Myanmar’s Royal Dragon Army(MRDA) phu nih an chim tiah theih a si.

SAC ralkap motor cu Monywa khua tar zohkhenhnak hmun pawng a dir lio, October 14, zaan suimilam 5:41 ah tualchung hriamtlai phu hna nih kutcheh bomb hmang in an doh hna caah SAC ralkap 3 an thih hi a si i hliamhma tuar zong an tam tiah theih a si.

Cu kahdohnak cu MRDA battalion 6 ṭat-khuai 1 Monywa, Nway Oo Tetsa pah-kah-phah, Nation People Defence, Monywa Generation phufonh nih an tuah mi a si tiah MRDA nih an thanhmi ah an langhter.

Mizoram Ramkulh Ah Rupee Sing Thongthum Leng Man Bing Raang An Tlaih, Mizoram ramkulh, India-Myanmar ramri, Camphai peng ah rupee sing thongthum man leng bing raang cu Mizoram palik phu nih October 14 zinglei ah an tlaih tiah theih a si.

Camphai ah ummi Lalawmpuia cu October 14, zinglei ah taxi a khalh lio Camphai khuathar Tuipui tiva pawngah Mizoram palik nih kan tlaih tiah Mizoram palik phu nih an thanh. Mizoram palik nih an tlaihmi bing rang cu sapiat bawm 500 chung ah an khumh mi a ai i, rupee sing 3418 man a si tiah Mizoram palik nih an chim.

Yephyu Ah SAC Ralkap Gate Pakhat Kahdoh An Tong, 4 An Thi, Tanintharyi ramṭhen, Yephyu peng Ye-Htawai motor lampi cung um Kalingaung(ကလိန်အောင်) hleidonh um SAC ralkap check gate cu nihin October 14 ah kahdoh an tong tiah theih a si.

October 14, zinglei suimilam 3:30 hrawngah hriamtlai phu pakhat nih SAC ralkap check gate cu hriamngan le hriamhme hmang in an kahdoh hna tiah tualchung mi pakhat nih a chim. SAC ralkap check gate kahdoh an ton caah ralkap 4 an thi, hliamhma tuar zong an um tiah kan theih. Hliamhma tuarmi hna cu dei hnu ah sizung ah an kalpi hna tiah tualchung mi hna nih an chim. SAC ralkap kahdoh an tonnak kong ah mi zei phu nih an kahdoh hna timi cathanh chuah in langhtermi a um rih lo.

KNDF Battalion 1 Le SAC Ralkap Kar Thlakhat Chung Kahdohnak Ah SAC Ralkap 15 Hrawng An Thi, Kaya ramkulh ah KNDF battalion 1 le SAC ralkap kar thlakhat chung ikahdohnak ah SAC ralkap 15 nak tlawmlo an thi tiah KNDF battalion 1 nih an chim. Kahdohnak chung ah SAC ralkap lei a thimi hna kong he pehtlai in KNDF battalion 1 in chim phuannak nawl ngeitu pakhat nih “ral hmaisa kalmi hna nih thawngpang a kan pek ning tein kan fehtermi an si ko” tiah a chim.

SAC ralkap hna cu KNDF battalion 1, battalion 4, battalion 18, battalion 19, battalion 7, KA le tualchung hriamtlai phufonh an ṭang i, kaphnih kar i kahdohnak voi 6 nak tlawmlo a cang. Cu kahdohnak ah cun battalion 1 in ralkap 2 an nunnak a liam tiah KNDF battalion 1 nih cathanh an chuah.

Monywa-Mandalay Lampi Ah SAC Mawtaw Bomb Puahhnawh An Tong, 15 An Thi, Sagaing ramṭhen Monywa peng lampi pakhat ah SAC mawtaw pathum cu October 13 zing suimilam 9 hrawngah bomb puahhnawh an tong i SAC ralkap 15 nak tlawm lo an thi tiah theih a si. Thazaang 100 hrawng nih zulhmi SAC ralkap mawtaw pathum cu Mao (မအူ) khua le Myin khua (မင်းရွာ) kar ah padeta bomb an puahhnawh hna hi a si tiah Monywa Fighter Group in ṭuanvo ngeitu pakhat nih a chim.

A hlankan in thawng kan theih caah timhcia tein kan bawh hna i bomb kan puah hnawh hna, a thi mi an tam pinah kut ke bulmi zong an tam, anmah lei zong nih hriamngan le hriamhme he an kan kah. Kan nih lei cu hriamngan cu chim lo kutser meithal lawng kan ngeih caah kah ngam loin kan zaam tiah a chim chap. Cu kahdohnak cu The Brightness Monywa, Monywa Fighter Group le Peace Taker Task Force hna i bawm in an tuahmi si tiah theih a si.

Butalin Peng Ah PDF Chungtel 2 An Thah Hna, Sagaing ramṭhen Butalin peng Kadoe (ကတိုး) khuami PDF chungtel 2 cu SAC ralkap nih October ni 11 ah an rak tlaih mi hna cu October ni 13 ah tualchungmi nih an ruak in an hmuh hna tiah theih a si.

Thah a tongmi PDF chungtel 2 hna cu kum 33 a si mi Kyaw Myint U le Zaw Myin Khaing, kum 26 hna an si. October ni 11 ah an rak tlaih hna i October ni 13 ah Kyaung khua (ကျောင်းရွာ) ah kan hmuh hna hi a si tiah tualchungmi pakhat nih a chim. Atu bantukin PDF chungtel a tlai i a thattu hna hi Kotaw (ကူတော်စခန်:) palik sakhan in a rak chuakmi an si. Butalin peng ah hin October ni 1 in 13 tiang ah SAC ralkap nih a tlawmbik tualchungmi 3 an thah cang hna tiah theih a si.

Kalaymyo Le Hmualpi Kar Kahdohnak Kong He Pehtlaiin CDM Siyin Nih Cathanh An Chuah, CDM Siyin nih Kalaymyo le Hmualpi kar kahdohnak a chuahmi kongah October 14 ni ah cathanh an chuah tiah theih a si. A cathanh cu a tanglei bantukin a si;

Taingen in Kalaymyo lei ah a kalmi SAC ralkap nih tualchung mi hna cu ralphaw caah tlaih in an kalpi hna, cu SAC ralkap motor ruun hna cu Kalaymyo le Hmualpi khuacuanhnak ah a hosi theihlomi hriamtlai phu nih an rak kahdoh hna tiah theih a si. Cu kahdohnak ruang ah ralphaw caah tlaih a tong mi sualnak ngeilo tualchung mi hna cu hliamhma an tuar tiah theih a si.

Cucaah kanmah CDM Siyin hmunhma chung ah tualchung hriamtlai phu hna sinah a hlankan in theihternak tuah lo in hmailei ah kahdohnak tuah tilo ding in le, a tubantuk theihternak tuah hmasa lo in kahdohnak tuah hi mizapi ralkap phu khat le phu khat kar ah theihthiam lonak a chuah ter khomi a si.

Hmailei ah a tubantuk thil a can sual a si ahcun zei bantuk phu nan si hmanh ah theihthiampiak nan si ti lai lo, cun a tubantukin sualnak ngeilo tualchung mi hna ralphaw ah an hman hna i an kalpi hna ti theih ko buin raltuknak tuah hi fak piin kan doh tiah cathanh ahcun an langhter.

Loikaw Thonginn Ah Ramkhel Lei Thongtla Pakhat A Nunnak A Liam, Karenni ramkulh, Loikaw thonginn ah hren a tongmi ramkhel lei thongtla pakhat cu October 13 ah a nunnak a liam tiah Progressive Karenni People Force(PKPF) nih cathanh an chuah. Cuap le TB zawtnak a rak ngeicia mi kum 21 tluk ramkhel lei thongtla Maung Nge cu a umnak thonginn chung ah sii ṭha tein ai thlop khawh lo caah a nunnak a liam hi a si tiah chungkhar he neihniam in a ummi hna sin in theih a si.

A chungkhar nih a nunnak liammi an fapa Maung Nge ruak lak ding in an i zuam ko na in, SAC ralkap nih an pek duh hna lo caah an la kho lo tiah chungkhar he naihniam in ummi nih an chim. Maung Nge cu 2021, Loikaw check gate ah phone checkpiak a rak tong i PDF he pehtlaihnak na ngei an ti caah SAC ralkap nih an rak tlaih mi a si.

Cu hnuah Phungrelnak caang poh-mah 52 in taza an cuai hnu ah kum 5 chung thong thlak ding in biakhiahnak an tuahpiak mi a si tiah theih a si. Karenni ah SAC ralkap kut in tlaih a tong i ralphaw caah hmanmi le thonginn chung ah a nunnak a liammi hi minung 7 tiang an phan cang tiah PKPF nih an langhter.

Kyunhla Ah Caw Cawngtu Mino 2 Thah An Tong, Sagaing ramṭhen, Kyunhla peng ah Caw a cawngmi mino 2 cu PDF nan si tiah an puh hna caah SAC ralkap le pyusawhṭi phufonh nih an tlaih hna hnuah an thah hna tiah tualchung mi nih October 14 ah an chim.

Kyunhla(ကျွန်းလှ) peng Hngiatpyayṭaw(ငှက်ပျောတော) khua pawng Leikuang ah Caw a cawngmi mino 2 cu minung thazaang 30 hrawng si mi SAC ralkap le pyusawhṭi phufonh nih October 12 ah khan an tlaih hna i an rak thah hna. An ruak cu Kyaukai(ကျောက်အိုင်) khua ah an hlonhtak hna tiah tualchung mi pakhat nih a chim.

“PDF nih bomb an hmanh an ti caah an tlaih hna, motor cung ah an hrem hna hnu ah an thah beh hna, an hmai hi lakawk tlaklo in hremnak hma an tuar. An hnu lei tukbakhur zawn in mei thal an kah hna caah an nunnak a liam hi a si” tiah ruak chartu nih an kan chim.

Thah a tongmi hna cu Hngiatpyayṭaw(ငှက်ပျောတော) khua mi Ko Kyaw Htet(kum 20) le Indai khua mi Ko Aung Htoo(kum 25) an si, PDF chungtel an si lo Caw cawngtu an si tiah tualchung mi nih an chim. Mino 2 tlaihkhih an rak tonlio ah kum 7 ngakchia pakhat zong tlaihchih a rak tong na in, SAC ralkap nih an thlah ṭhan tiah an chim chap.

AAPP nih October 13 tiang an thanhmi cazin ning ah SAC ralkap nih hranhram uknak an lak hnu ah SAC ralkap kut in thah a tongmi le nunnak liammi mipi dihlak hi 2350 tiang an phan tiah an langhter.

Mandalay Lamzawhnak Tuahlio Ah Hruaitu Pakhat Sayamah Kum 8 Thong Thlak Ding In Biakhiahnak An Tuahpiak, Mandalay ah SAC ralkap uknak duhlo lamzawhnak tuahlio ah hruaitu pakhat si mi sianginn ca chimtu sayamah Daw Thet Su Hlaing cu phungrelnak caang poh-mah 505(a) in kum 3 thong thlak ding an chap tiah theih a si.

Sayamah Daw Thet Su Hlaing cu a luancia August thlachung ah kum 5 chung thongthlak ding in biakhiahnak an rak tuahpiak cang. Cucaah tutan an chapmi he cun kum 8 chung thong a tla lai. SAC ralkap nih hranhram uknak an lak thla 9 hnu October thladih ah sayamah Daw Thet Su Hlaing telh in fimcawnnak lei rianṭuantu General Strike Committee chungtel cheukhat cu Mandalay ah SAC ralkap nih an rak tlaih hna tiah theih a si.

North Korea Nih Nuclear Hriamnam A Phur Khotu Missile Hneksaknak A Tuah, North Korea hruaitu Kim Jong Un nih nuclear hriamnam a phur khotu missile hneksaknak a tuahpi hna tiah October 13 ni ah Korea Central News Agency (KCNA) nih a langhter tiah theih a si.

Tutan hneksaknak kan tuahmi hi kan ral caah fianghlang ngaiin ralrin peknak kan tuah mi a si tiin Kum Jong Un nih cun a chim. “Rampi pakhat a biapi mi raltuknak kan doh i kan kham khawhnak dingah nuclear hriamnam kongkau riantuannak hi biatak tein kan kauh ter i kan cawlcangh a herh” tiah Kim Jong Un nih cun a chim chap. North Korea nih hin a voikhatnak bik missile hneksaknak a rak tuah hi 2021 kum, September thla ah a rak si tiah theih a si.

Yinmarbin Peng Ah Riahcaw Lak Ding In A Kalmi SAC Ralkap Cu Bomb Puahhnawh An Ton Caah Ralkap 15 Hrawng An Thi, Sagaing ramṭhen, Yinmarbin peng Banbuai(ဘန့်ဘွေး) khua in riahcaw lak dingah a kalmi SAC ralkap motor le ke in rallam a sialmi ralkap cu, bomb puahhnawh an ton caah SAC ralkap 15 hrawng an thi, tiah theih a si.

Banbuai khua ah umhmun khuarmi SAC ralkap hna cu nizan October 13 zanlei sml 3:15 ah riahcaw lak ding in motor pakhat le ke in an kal lioah Local People’s Defense Force(LPDF) le Naga Brother phu hna i bawm in bomb lung 15 in kan puahhnawh hna caah SAC ralkap 15 hrawng an thih hi a si, tiah LPDF nih cathanh an chuah. Cun Sagaing ramṭhen Kantalu(ကံတလူ) Toll gate le Pekatu(ပဲကတိုး) khua karah motor in ralvengtu SAC rakap cu bomb puahhnawh an tong ve, tiah theih a si.

Magway Ramṭhen Zitaw Khua Cu SAC Ralkap Nih An Khangh Caah Inn 11 A Ciam, Meheh 30 Leng Zong An Khangh Chih, Magway ramṭhen, Yesagyo peng Zitaw khua cu, SAC ralkap nih nizan October 13 ah an khangh caah inn 11 a ciamh pinah meheh 30 leng zong mei in an khangh hna, tiah PDF sinin theih a si. Nizan October 13 zanlei sml 3:30 hrawng ah Myaing peng le Yesagyo peng ai tlaihnak Zitaw khua ah SAC ralkap pawl cu an lut i, inn an khangh caah inn 11 a ciam. Khuami an meheh 30 leng zong an khanghpiak dih hna, tiah theih a si.

“Myaing peng le Yesagyo peng ramri Zitaw khua cu, uico ralkap nih an khangh caah inn 8 a ciam dih. Khattelei lawng a kaangmi hi inn 3 a si. An khangh ko nain inn 1 cu a kaang lo. Khuami meheh 30 leng zong an thi,” tiah Seven Star YS phu in chimphuannak nawlngeitu Hna Khan Hmuai(နှုတ်ခမ်းမွှေး) nih a chim.

Monywa Peng In Palik Pahnih Cu Meithal He CDM An Tuah Caah PDF Nih Lawmman Tangka Kyats Sing 100 An Pek Hna, Sagaing ramṭhen, Monywa peng palik Battalion 28 in palik Aung Ko Ko le Moe Lin Aung cu, meithal he CDM an tuah caah lawmman tangka kyats sing 100 kan pek hna, tiah People’s Defense Army(PDA) in ṭuanvo ngeitu pakhat nih a chim. A luancia September 28 lioah Monywa peng palik Battalion 28 in palik Aung Ko Ko le Moe Lin Aung cu PDA sinah an meithal he CDM an tuah hi a si.

Aung Ko Ko nih, “Kan inn cu ralkap nih an kan khanghpiak caah ka nu le ka pa cu umnak inn an ngei ti lo. Cu pinah CDM tuah kai timhnak a sau tuk cang, meithal le kuan he CDM tuah lo cu ka duh lo caah tuan deuh in CDM ka tuah lonak hi a si. Midang kan hawile zong zam a duhmi an tam ngai,” tiah a chim.

PDA in ṭuanvo ngeitu pakhat nih, CDM tuahtu palik pahnih cu, minung pakhat ah kyats sing 50 veve kan pek hna. A dang a taangmi palik le ralkap zong CDM tuah an tuah ahcun kan cohlan peng hna, tiah a chim.

Mon Ramkulh, KyaikHteYoe Pura Hmun Kahdohnak Kongah USDP Party Nih Cathanh An Chuah, Mon ramkulh, KyaikHteYoe pura ah umhmun a khuar mi SAC ralkap hna cu a luancia mi October 12 ni ah mipi hriamtlaiphu lei nih an rak kah i kaphnih kar kahdohnak faak a rak chuak mi kong he pehtlaiin USDP party nih anmah duh hoih zawngin a tanglei bantukin cathanh an chuah:

12 October, 2022 ni zinglei ah Mon ramkulh ah a um mi KyaikHteYoe pura ah a kalmi mipi an umnak SAC ralkap umnak hmun cu KNLA le NUG/CRPH kuttang um PDF hna nih hriamngan le hriamhme he an kah tiah kan theih. PDF hna nih an kahmi kua le bomb hna ruangah sualnak ngei lo mipi (3) an thi i minung (19) hliamhma an tuah tiah kan theih. Pura hmun kal in pathian biak ai tiim mi mipi hna a kap tu KNLA Battalion 1 le NUG/CRPH kuttang um PDF tuah sernak cu fak khun in kan dohkalh tiah cathanh kan chuah.

A cunglei bantukin USDP party nih cathanh an chuah ko nain a hmun um mipi cheukhat nih cun “SAC ralkap nih hriamngan le hramhme tamtuk an hman mi le an duh nak hmun paoh ah an kah mi ruangah mipi kan thih i kan i hliam hi a si” tiah an chim tiah theih a si.

Kali Aung Hlei Check Gate Hngaktu SAC Ralkap Kah An Ton Caah Ralkap 5 An Thi, Tannintharyi ramṭhen, Dawei pengkomh Kali Aung(ကလိန်အောင်) hlei ummi SAC ralkap check gate cu, nihin October 14 zinglei ah hriamtlai phu khat nih an kah i, SAC ralkap 5 an thi, tiah theih a si.

Kali Aung hlei cu Ye-Dawei motor lampi cungah a ummi a si i nihin zinglei sml 4:00 hrawngah hriamtlai phu pakhat nih an kah hi a si. Cu kahdohnak a daih in SAC ralkap a thimi ruak hna cu mizaw phorhnak motor in an kalpi hna. Kali Aung hlei a zawhmi khualtlawng mi hna le mi chawkvai cu SAC ralkap nih checkhlatnak an tuah hna, tiah theih a si.

Nattalin Le Taungngu Kahdohnak Ah PDF Nih SAC Ralkap 12 An Thah Hna, Nizan October 13 ah SAC ralkap le Pago PDF karah voithum tiang kahdohnak a chuak i SAC ralkap 12 nak tlawm lo an thi i hliamhma pumi an tam, tiah Pago PDF nih cathanh an chuah.

SAC ralkap 50 hrawng cu Tharyarwaddy pengkomh PDF Battalion 3801, Companny 1 le 2 nih lamhruang in an bawh hna caah Nattalin peng Nyaung Laypin khua le Gyetma Net(ကြက်မနက်) khua karah voihnih kahdohnak a chuak. SAC ralkap 4 an thi i 7 hliamhma an pu, tiah an langhter. Cu hnuah SAC ralkap nih rallam an sial ṭhan caah Nyaung Laypin khua le Gyetma Net khua karah bomb in an puahhnawh ṭhan hna i, SAC ralkap 6 nak tlawm lo an thi, 8 hliamhma an pu, tiah theih a si.

Pago ramṭhen, Taungngu peng Myapinku(မြပင်ကူး) khua ah umhmun khuarmi SAC ralkap sentari cawnghnak hmun cu nizan October 13 zanlei ah Taungngu pengkomh PDF Battaliin 3501, Companny 1 nih an kah ve hna, tiah theih a si. Cu kahdohnak ah SAC ralkap 2 an thi i hliamhma pumi an um. Taungngu PDF lei in a thimi le aa hliammi an um lo, tiah theih a si.

Tamu Khua Ah Pyusawhti Hruaitu Aung Htun Win An Kah I A Thi, Sagaing ramṭhen, Tamu khua Sandaku(စန္ဒကူး) sang um pyusawhti hruaitu Aung Htun Win cu, dalan le pyusawhti fimhlawmtu Tamu Battalion 4 nih kan kah i a thi, tiah PDF Tamu Battalion 4 in hruaitu bawino Khant Lin nih a chim. Cu pinah nizan October 13 zinglei ah Tamu khua leng hmun pakhat ah SAC ralkap le PDF Tamu kar ah caan tlawmpal kahdohnak a chuak, tiah theih a si.

Khuate Pali A Khangtu SAC Ralkap Cu PDF Nih An Kah Hna Caah SAC Ralkap Officer Pakhat Telh In Ralkap 10 An Thi, Magway ramṭhen, Yesagyo peng Zitaw khua a khangtu SAC ralkap pawl cu, kan kah hna caah Officer 1 telh in ralkap 7 an thi, tiah Seven Star YS nih an langhter.

Nizan October 13 zanlei sml 3:00 hrawngah Zitaw khua a khangtu SAC ralkap pawl cu lamhruang in PDF nih an bawh hna i bomb an puahhnawh hna caah SAC ralkap 7 an thih hi a si, tiah theih a si. “Uico ralkap pawl cu Zitaw khua an khangh dih hnu an chuah lei ah bomb in kan puahhnawh hna i, officer 1 telh in ralkap 7 an thi,” tiah Seven Star YS in chimphuannak nawlngeitu bawino Hna Khan Hmuai(နှုတ်ခမ်းမွှေး) nih a chim.

SAC ralkap pawl cu Teytaw(သဲတော) ah umhmun an khuar i, Skat motor in thazaang an chap caah zeitik caan paoh ah kahdohnak a chuak ṭhan khomi a si, tiah a chim chap. Cun Myaing peng Watung Ai(ဝါးသုံးအိုင်) khua a khangtu SAC ralkap cu PDF nih an kah hna caah SAC ralkap 3 an thi, tiah theih a si. Cu kahdohnak ah SAC ralkap nih hriamngan le hriamhme he PDF cu an kah hna caah sml 5 chung hrawng kahdohnak a chuak i SAC ralkap lei in 7 hliamhma an pu tiah theih a si.

Myanmar Rammi Chungkhar 30 Leng Sinah Youth For Myanmar Nih Eidin An Pekchanh Hna, Mizoram ramkulh, Kawlasib pengkomh Khamrang khua ah ralzaam in ai dormi Myanmar rammi hna sinah Youth For Myanmar nih, nizan October 13 ah eidin an pekchanh hna, tiah theih a si.

Khamrang khua ah ai dormi Myanmar rammi hi chungkhar 30 leng an si i, milu in 150 leng an si. Cu chungah sianginn kai a cu cangmi ngakchia hi 30 leng an um, tiah theih a si. Youth For Myanmar nih, vanṭha laksawng (lucky draw) an zuarmi in an hmuh mi tangka in Khamrang khua ah ai dormi Myanmar rammi hna sinah eidin an pekchanh hna hi a si. Crd-The Chin Post