AA Le Bangladesh Army nih Kuki-Chin National Army an phomh hna thawngpang update!

Kuki-Chin National Army le Bangladesh Army Kar Kahdohnak A Fak!
==========
Bangladesh ram um Kuki-Chin National Army le Bangladesh Army kar kahdohnak ruangah Bangladesh um Chinmi 300 leng cu Mizoram Lawngtlai District Parva khua ah ralzam in an rak phan, tiah theih a si. Kuki-Chin National Army le Bangladesh Army kar i kahdohnak a zualhma chin lengmang, cu kahdohnak ah Bangladesh Army le Arakan Army (AA) an tangtii tiah theih a si.

Chin Ralzaam pawl hi India ralkap nih an rak kham hna nain an kham cawk hna lo ca ah Lawngtlai Police Station nih thil umtuning zoh dingin an zuanhnawh colh hna. Kuki Chin National Army hi Bangladesh ram ummi Chinmi hna nih ramkulh (state) an hmuh khawhnak ding ah a zuam cuahmahmi an si.

Kalay-Tamu Motor Lampi Cu Zarhkhat Chung Umkal Rih Lo Dingin PDF Nih Ralrin Peknak Cathanh An Chuah! Kalay-Tamu motor lampi cu nizan November 20 thawk in zarhkhat chung umkal rih lo dingin People’s Defence Force (Kalay) nih ralrin peknak cathanh an chuah tiah theih a si. Kalaymyo ah SAC ralkap he kahdohnak a zual ngai caah Tamu motor lampi ah mizeihmanh umkal rih lo dingin Kalay Peng PDF in ṭuanvo ngeitu pakhat nih a chim.

“Kalaymyo khua chungah SAC ralkap he kan i pehtlaih ning a ṭhat lo tuk caah Kalay-Tamu motor lampi cu, November 20 thawk in a hohmanh umkal khawh a si ti lai lo. Nawl kan chuahmi nan zulh lo i, harnak pakhat khat nan ton ahcun a herh ning in ṭuanvo kan in lak hna lai, tiah Kalay PDF nih cathanh an chuah.

Kalay-Tamu motor lampi cu a luancia November 13-19 tiang umkal an rak kham i, SAC ralkap nih an hriamnam hna cu tualchung mi motor 14 hmangin India le Myanmar rammi lei Hto Ma in Kalay khua chungah luhpi an timh, tiah PDF Battalion 3 in ṭuanvo ngeitu nih a chim.

India ram in SAC ralkap hriamnam luhpi dingah Kalay-Tamu lampi hman an timh caah PDF ṭangṭi phu hna nih kham ding in an bawh hna, tiah theih a si.

Monywa In Sagaing Lei Ah A Kalmi SAC Ralkap Motor Run 10 Bomb Puahhnawh An Tong, 20 An Thi. Monywa in Sagaing lei ah a kalmi Sagaing Tatma 33 in motor 10 cu, November 19 ah Alakapa khua le Wunpyi khua karah bomb in voi 5, cun Wunpyi le Myinmu khua karah voi 1 tiin bomb voi 6 kan puahhnawh hna, tiah Army To Fight Dictatorship (PAFD) in ṭuanvo ngeitu pakhat nih a chim.

Sagaing Tatma 33 in a chuakmi SAC ralkap motor 22 cu November 19 zing sml 11:00 hrawngah Sagaing in Monywa lei ah an kal. A zanlei ah Monywa in Sagaing lei ah motor 10 an kir ṭhan i cu a kir than mi hna kha bomb kan puahhnawh mi hna hi an si, tiah People’ Army To Fight Dictatorship (PAFD) in ṭuanvo ngeitu nih cun a chim chap.

Chun sml 12:00-1:00 karah Monywa in Sagaing lei ah a kir mi motor hna cu PDF nih bomh in voi 6 an puahhnawh caah ralkap 20 an thi i, an ruak cu Nyaungpinwun(ညောင်ပင်ဝန်း) sakhan ah an chiah hna, tiah theih a si.

Cu bomb puahhnawhnak ah People’s knight Defense Force Myinmu (PKDF-MMU) le People’ Army To Fight Dictatorship(PATFD), TAUNGTHA People Defense Force (TTAPDF) ၊ D.B.B.F- MMU ၊ PAFD, Companny Dog Killers People Defense Force Myinmu (DKPDF) hna an i tel, tiah theih a si.

SAC Ralkap Nih Khin U Le Shwe Bo Peng Khuate 5 An Khangh Caah Inn 200 Deng A Ciam. Sagaing ramṭhen, Khin U peng le Shwe Bo peng ah a ummi Paunglaykone(ပေါင်းလဲကုန်း), Latpankyi, Hnedwin, Sisonelay(ဆီဆုံလေး) le Leikyakone(လိပ်ရကုန်း) khua hna cu SAC ralkap nih an khangh caah inn 200 deng a ciam, tiah theih a si.

November 18 le 19 ah SAC ralkap nih Khin U peng Paunglaykone khua ah inn 100 leng an khangh pinah November 19 ah Hnedwin khua inn 1 an khangh chap, cun nihin November 20 ah Latpankyi khua inn 50 leng, Sisonelay khua inn 8 le Shwe Bo peng Leikyakone khua inn 30 leng an khangh ṭhan, tiah theih a si.

SAC nih nawlngeihnak an lak hnu in Khin U peng ah 2022 October thla tiang khuate 47 an khangh i inn 1,856 a ciam. Cu pinah tualchung mi le PDF 218 an thah hna i, 143 tlaih an tong, tiah theih a si.

CNDF Nih Tibual Sakhan Kahdohnak Kong Cathanh An Chuah! Chin ramkulh, Falam peng Tibual SAC Ralkap camp kahdohnak kong ah CNDF nih a tanglei bantuk in cathanh an chuah. Tulio biatak te in kahdohnak a fahnak Chin ramkulh falam peng Tibual SAC camp cu eidin le zenkuan an ngeih ti lo ca ah nihin November 20 zing suimilam 10:00 ah SAC ralkap nih Helicopter pahnih in a rak chanh hna.

Zing suimilam 10:30 ah SAC ralkap nih Raltuknak MI-35 in CNDF kan umnak cu an rak kan kah. Chun suimilam 11:38 ah CNDF ralkap Snipers tlaitu nih SAC ralkap pahnih a kah hna i a hmun ah an thih colh i kuan zun 200 reng lo kan lak khawh, tiah CNDF nih cun an cathanh chung ah cun an langhter.

Chin Ramkulh Chung Kahdohnak Ah SAC Ralkap Nih Ni 5 Chung Jet Fighter A Hman. Chin ramkulh ah SAC ralkap le Chin ralkap kar kahdohnak a chuak i, SAC ralkap nih Jet Fighter hmang in ni 5 chung kahdohnak an tuah, tiah theih a si.
Chin ramkulh, Tibual SAC ralkap sakhan cu drone in voi 300 leng bomb in kan thlakhnawh caah SAC ralkap 30 hrawng an thi, tiah CNO/CNDF nih cathanh an chuah.

A luancia November 15 zing sml 5:30 ah CNDF nih Tibual SAC ralkap sakhan cu hrianngan, hriamhme le drone in an kah caah kahhnih kar kahdohnak sml 3:00 chung a rak chuak, tiah theih a si. Zing sml 9:00 hrawng in Jet Fighter nih bomb voi 3 le zanlei sml 6:00 hrawngah voi 4 a thlak. A voihnihnak an thlak bomb ruangah SAC ralkap sakhan pawng ummi inn 2 a kaang. November 15 kahdohnak ah SAC ralkap 8 hrawng an thi, tiah theih a si.

Cu kahdohnak ah ZFU/PDF-Zoland, CDM-Siyin le Chin hriamtlai phu fonh CJDC zong nih an bawmh hna, tiah theih a si.
November 16 zinglei siseh, zanlei sml 2:00 hrawngah siseh kaphnih kar kahdohnak a zual ṭhan i, zanlei sml 2:55 ah Mi- 35 vanlawng in minutes 20 tluk a rak kah hna. Cu ni kahdohnak ah Chin hriamtlai phu hna nih SAC ralkap 5 an thah hna tiah theih a si.

November 17 zing sml 9:30 le zanlei sml 2:00 hrawngah kaphnih kar kahdohnak a chuak ṭhan i, Mi-35 vanlawng hmang in minutes 45 tluk a rak kah than hna. Zaan ah ṭangṭi phu a si mi MEDF nih drone in bomb an thlak caah SAC ralkap 6 an thi, hliamhma pumi zong an tam, tiah theih a si.

November 18 zinglei ah CNDF nih SAC ralkap sakhan cu hriamngan in an kah ṭhan caah SAC ralkap 4 an thi chap. Cun nizan November 19 zing sml 5:00 hrawngah Tibual SAC ralkap sakhan cu, CNDF nih an kah ṭhan i CDF-Lautu zong nih an rak bawmh ve hna. SAC ralkap Jet Fighter 2 le raltuknak Helicopter 3 nih Tibual sakhan um ralkap pawl cu an bawmh ve hna pinah ralkap thazaang an rak chap, cun SAC ralkap a thimi ruak le aa hliammi hna cu Helicopter in Kalaymyo sii-inn ah an kalpi hna, tiah theih a si.

Cuni zanlei sml 5:00 hrawngah Tibual SAC ralkap bawmh ding in vanlawng nih a rak thlakmi ralkap hna cu, CNDF nih Bualte khua ah lamhruang in an kah ṭhan hna caah SAC ralkap 6 an thi, cu hnuah SAC ralkap nih Bualte khua cu an khangh, tiah theih a si.

Bomb Puah Sual Ruangah CDF-Paletwa Ralkap Pahnih Hliamhma Fak Ngai An Pu. CDF-Paletwa Battalion 3 in ralkap pahnih cu bomb an ser lio nizan November 19 zanlei sml 2:00 hrawngah bomb a puahsual caah an pahnih in hliamhma fak ngai an pu, asinain an nunnak kong tu ahcun thinphan awk a um lo, tiah CDF-Paletwa nih cathanh an chuah tiah theih a si.

An hliamhma thlopnak ding ca ah tangka tampi a dih ding a si pinah a hlan i hliamhma a rak pu mi ralkap hna zong sii-ai thlopbul an hauh caah sui ngun chawva bawmh ding in CDF-Paletwa nih mizapi sinah bawmhhalnak an tuah. Credit: The Chin Post