Taze Peng Ah Rallam Sial Mi SAC Ralkap Nih Tualchung Mi 11 An Thah Hna.Sagaing ramṭhen, Taze peng ah rallam a sial mi SAC ralkap nih ni 10 hrawng chung ah tualcung mi 11 an thah hna, tiah tualchung mi le tualchung hriamtlai phu hna nih nihin March 4 ah an chim.
Taze peng Kanhtuma khua telh in khua 8 ah kum 25-70 kar pa 11 cu SAC ralkap nih an thah hna i, cu chung ah cun mizapi ukhruaitu phu le tualchung hriamtlai phu chungtel pahnih an i tel i a dang 9 cu tualchung mi sawh an si, tiah tualchung mi nih an chim.
Taze peng rallam sial mi SAC ralkap pawl nih a luancia February 19 in March 1 kar ah tualchung mi 11 cu an thah hna i an ruak cu Kanhtuma khua pawng ah an hlonh hna, tiah Taze hrambunh tualchung hriamtlai phu in minung pakhat nih a chim.
“Thah a tong mi tualchung mi 11 ruak cu SAC ralkap nih zohchia ngaiin an tuah hna i an chiaṭha an tan hna, an paw an hlai hna, an kutke an tan hna i an lu an tan dih hna,” tiah tualchung mi nih an chim.
Kanhtuma khua palik sakhan cu Taze peng hrambunh tualchung hriamtlai phu nih a luancia February 21 ni ah an kah hnu in Taze khuapi chingchang khua hna ah SAC ralkap pawl cu rallam sial in thahnawnnak an tuah, tiah tualchung mi nih an chim.
APoi Kho TakTak :Thailand Ah Myanmar Ram Mi 100 Deng An Tlaih Hna.Thailand ram, Kanchanaburi pengkomh ah phungning lo in a lut mi Myanmar ram mi 94 cu nizan March 3 ah tlaih an sinak kong Thailand hrambunh ṭhialkamnak kong a buapitu Myanmar mi bawmchatu phu nih an chim.
Kanchanaburi pengkomh ah tlaih a tong mi Myanmar ram mi hna cu pa 58, nu 31 le ngakchia 5 an si i, motor pakhat chung ah an zate in tlaih an si, tiah Thailand hrambunh ṭhialkamnak kong a buaipitu Myanmar mi bawmchantu phu nih cun an chim.Tlaih a tong mi chung in mi cheukhat nih cun Thailand hrambunh Foundation for Education and Development (FED) ruanṭuantu sin ah pehtlaihnak an tuah kong ṭuanvo ngei Min U nih a chim.
“Tlaih a tong mi chung in phu tam ngaiin an i ṭhen hna i minung 18 a si mi phu khat nih cun a kan pehtlaih, Malaysia kalnak ding ca ah tiin ṭuanvo ngeitu sin ah tangka Kyats sing 36 an pek, tlaih a tong mi hna hi khoika dah an hren hna ti cu hngalh a si lo,” tiah Min U nih cun a chim.
A luancia February thla chung ah SAC nih ram mi nih ralkap tlak ding ti mi phung a nunter ṭhan hnu in Thailand ram ah phungning lo in a lut mi an tam i Thailand palik nih voi dang nak felfai deuh in chekhlatnak an tuah, tiah Thailand hrambunh ṭhialkamnak kong a buaipitu Myanmar mi bawmchatu phu nih cun an chim.Credit : The Chin Post