Bhamo Khuapi Um SAC Ralkap Hriamngan Kahnak In Ngakchia Pathum Telh In Tualchung Mi 5 Nunnak A Liam.Kachin ramkulh, Bhamo khuapi um Sah-Kah-Khah 21 SAC ralkap nih an kah mi hriamngan cu Kanni khua telh in khua 4 ah a tla i a puah caah kum 10 tang ngakchia 3 telh in tualchung mi 5 nunnak a liam, tiah Bhamo khuapi um tualchung mi nih an chim.
Bhamo khuapi Sah-Kah-Khah 21 Byuha sakhan um SAC ralkap nih Bhamo khuapi kiangkap ah dongcat lo in hriamngan an kah mi cu Moeseinkyun, Mongkar, Kanni le Hsintkin khua ah a tla i khua 4 in tualchung mi ngakchia pathum le nu pahnih an nunnak a liam, tiah Bhamo khuapi um tualchung mi pakhat nih a chim.
A luancia March 7 ni thawk in Myitkyina–Bhamo khuapi lampi cung SAC ralkap sakhan cu KIA nih an laak khawh hna caah SAC ralkap pawl cu Bhamo khuapi chung ah lut in “KPDF khuachung ah nan ṭanpi hna” tiin sualnak ngei lo tualchung mi an tlaih hna i i, nai hrawng ah thah a tong mi 10 hrawng an si cang, tiah Bhamo khua mi nih an chim.
“Thah a tong mi hna hi mizei dah an si ti hlat an sianh hna lo i mi bawmchantu phu lei zong hmanthlak tibantuk an sianh hna lo, ruak an laakter hna i an khanghter colh hna,” tiah Bhamo khua mi pakhat nih a chim.
A Poi Tuk EE :Thla Hnih Leng Chung Ah Minung 9 Thihdan Pek An Si.Tukum 2024 kum hramthawk thla hnih chung ah minung 9 thihdan pek an si, tiah ramkhel thongtla zohkhenhtu phu AAPP nih nizan March 12 ah an thanh.
Thihdan pek mi minung 9 chung ah Insein thonginn in kum 23 Zaw Yay Htet cu thihdan voi li pek a si, kum 28 Anh Maw U cu thihdan voi hnih pek a si i an pahnih in tualchung mi sawhsawh an si, tiah AAPP nih an langhter.
Pathein thonginn in Ko Aung, Thura Phyo, Kyaw San U, Tun Tun Uu le Aung Moe Myint hna cu thih dan voi thum cio le kum 60 thong thlak ding in bia an khiahpiak hna.Pathein thonginn in Kaung Sithu le Win Myat Thein Zaw cu thihdan le kum 25 thong thlak ding in biakhiahpiak an si i, Pathein thonginn ah thihdan pek mi minung 7 cu an zate in tualchung hriamtlai phu chungtel an si, tiah AAPP nih an thanh mi ah an langhter.
Ramkhel thongtla zohkhenhtu phu AAPP nih nizan March 12 an thanh mi ah SAC ralkap nih hramhram in nawlngeihnak an laak ni thawk in tukum 2024 March thla hramthawk tiang ah Myanmar ram hmunkip ah thihdan pek mi 123 an si, tiah an langhter.Credit : The Chin Post