A tu hi Pathian nih Nu hi a hmanlio hna caan a si, ka ti”

A tu hi Pathian nih Nu hi a hmanlio hna caan a si, ka ti”
================
Febuary 06, 2021(2:45 am) an rianṭuannak in inn ka phan i facebook ka vun bih i Yangon (Rangoon) ah ralkap uknak laak (military coup) mi duhlonak an langternak ka hmuh i 5:30 am tiang ka zoh hna. Mah mibupi a hruaitu hna cu Karen nu pahinh an si. An biachim ngaih tik ah an thlum-al tuk; an mui zong duh an nungtuk; An mitau ah dawtnak hmuh khawh an si; zoh ah uar an um taktak; upatnak ka pek hna. (kawr/angki an ihrukmi in “Karen” tiah ka ti ko hna).

Mah nu pahnih ka hmuh hna lawng si lo in nikum hrawng khan ka thinlung chung ah a chuak ngaingai mi cu “A tu hi Pathian nih nu hi a hmanlio hna caan a si, ka ti” ti hi a si. Youtube, Facebook, le Online kip ah Laimi he Mirang he, Kawl he, tlangcungmi he, Pathian nih nu hi a hman ngaingai hna ti hi ahohmanh nih al khawh lo ding in hmuh khawh a si. Cu leng ah chungkhar le Khrihfabu ah rawlulh in thla a cam mi hi pa nak in nu an tam deuh.

Cu a si caah “Nu” hi Pathian hmanh nih a hman ko hna ah cun CBCUSA, MBC, CBC, Association kip, le local Khrihfabu kip nih “Nu” hi Pastors le Khrihfa upa zong ah hin kan hman deuh awk hna an si” ti hi forh fial kan duh ko hna.
Bawipa minthannak caah si ko seh! Amen.

Relchap, US Laimi le Unemployment”. Nihin (February 05, 2021) tlai nawn ah ka tho. Thawngpaang tlawmpal ka vun bih i, 1. minung 779,000 nih kan hnu lei zarh chung ah unemployment an sawk, 2. kan hnulei thla chung ah Chicago ah vawi 201 ikahnak a um i minung 51 nunnak a liam (kum 4 chung ah an thih a tam cem a si; a luancia kumhnih lio ah nikhat ah minung pakhat hmanh an ithat lo i palek (police) nih lawmhnak puai an rak tuah; Chicago khua chung lawnglawng i an mah le an mah a that mi hna hi US ralkap ram dang ral hraang dohnak i a thi mi nak in an tam deuh ti, a si), 3. Iowa ah hawhra ruang ah car 40 an ipah nain a thi mi an um hraw lo, 4. President Biden nih US raltuknak tilawng (USS John S. McCain (DDG 56) Taiwan lei ah a kalter, 5. President Biden nih ralzaam 125,000 a laak lai, ti bantuk thawng chia he thawngṭha pah he ka hmuh hna.

“Minung 779,000 nih unemployment an sawk” ti ka hmuh in ka lung ah a hung chuak colh mi cu, Mah lak ah hin kan company nih dinhter (Laid off) mi an itel ve i ka ruat ngai te hna. Ka lung a ka suk tuk i thla ka campiak hna. A ruang, 1. Rian dinhter ding kan chimh hna lio ah a cheu cu an mitthli a ha, an ngaih a chia, an mithmai ah thinphannak hmuh khawh an si. (Laimi pakhat a um ve i a nih tu cu a ni huar ko; a ruang a toi ah ka langhter). 2. Nizan ah pakhat nu nih phone cakuat (Tex massage) a rak ka kuat mi ah “keimah le ka fa te lawng kan si i rian ka ṭuan lo ah cun eiawk kan ngei lai lo, rak ka ṭuanter law, ka duh ko” tiah ca a ka kuat. Ka zaang a faak tuk nain ka tuah khawh mi a um lo caah, “HR chawn tuah hna, kei nih cun bawmh kan duh ko nain kan bawm kho lo cu taa, tiah ka ti. An nih hi unemployment sawknak nak nawl a hmu lo mi pawl an si.

3. Khat lei ah “pup” tiah ka lung ah a hung chuak mi cu “Laimi Pathian nih a kan dawt ning” ti hi a si. US ummi Laimi cu rian dinter kan si zong ah umemployment kan hmu i a caan ah cun rianṭuannak hmanh in kan hlawk deuh caan a um. Cu a si caah, “ka dawtmi Laimi u le nau, khoi ka kan umnak poh ah Pathian thluachuah hi rel thiam hna u sih” tiah kan sawm hna. Ka lawm, Isaac Duhtling pa (Mang Chawn) Indianapolis, USA.