KIA Ralkap Pakhat Cu SAC Sin ah Hriamnam He a Lut, Tiah SAC Nih Thanh!
=============
Kachin ram, Banmaw peng, SAC ralkap hrambunh battalion pakhat ah KIA ralkap pakhat cu May 22 ah a hriamnam he a lut i phaisa kyats sing 56 kan pek, tiah SAC nih a thanh. SAC ralkap ah a lutmi KIA ralkap hi a mui langhter loin a nupi le a fale an langhter. Cun, KA 22 zuun khat, kuan 70, kutcheh bomb 2 le kuan bawm 3 le kutkhihnak 2 tiin an langhter.
Sadaung Khuapi Um Palik Sakhan An Kah Caah SAC Ralhrang Bawi Pakhat Telh In 12 An Thi; Sagaing ramṭhen, Sagaing peng, Sadaung khuapi um palik sakhan cu mipi ralkap PDF hna nih luhhnawh in an kahdoh caah SAC le palik ralhrang 12 an thi, tiah ZERO Intelligence Corps Battalion 7 in ṭuanvo ngeitu pakhat nih a chim.
May 12, zanlei sang ah mipi ralkap hna nih an luhhnawh hna i kaphnih kar kahdohnak fakngai a chuak caah suimilam 2:30 cheu tluk a rau. Ralhrang sakhan laak khawhnak ding ah caan tlawmpal lawng aa duh nain SAC nih jet vanlawng 2 in a hel lengmang hna caah mipi ralkap hnulei an tolh ṭhan, tiah theih a si.
“Zan suimilam 6:00 tluk in zan suimilam 8:00 tiang kan kah hi a si, ralhrang sakhan kam tiang kan phan cang an khamnak hna zong kan thlak khawh dih cang nain SAC ralhrang nih jet vanlawng 2 in a kan hel lengmang caah hnulei kan tolh hi a si. SAC ralhrang lei in 12 an thi pin ah hliam fakngai in a pumi zong an tam. Mah sakhan ummi hi thazaang 50 leng hrawng an si i a thimi lak ah ralhrang bawi pakhat zong aa tel tiin kan theih” tiah ZERO Intelligence Corps Battalion 7 in ṭuanvo ngeitu pakhat nih Khit Thit ah a chim.
Kahdohnak cu ZERO Intelligence Corps Battalion 7, Myinchain pengkomh le Red Dragon Kyaukse, Kyaukse pengkomh Battalion 4, Myinchain le Sadaung pengkomh ṭangṭi phufonh hna kan si, tiah an langhter chih.
Naypyidaw-Magway Lampi Ah Motor Pahsualnak In Minung 5 Nunnak Liam; Magway ramṭhen, Myothit peng Ywepantaw khua pawng, Naypyidaw le Magway lampi ah Hijet motor le khualtlawng phor bus motor cu nizan May 21 zinglei suimilam 10:00 hrawng ah khan an i pah sual ruangah minung 5 nunnak a liam i, 7 hliamhma an pu, tiah theih a si.
Hi kong he pehtlai in motor canghsualnak pawng a ummi nih cun, “Hijet motor cu Naypyidaw ah a kal i, Salin lei i a kir lio ah hi bantuk in khualtlawng bus motor he an i pah. Ahodah a palh ti cu hngalh a si lo. A thimi le aa hliammi hna hi Hijet motor aa citmi an si,” tiah a chim.
Motor pahsualnak ah hin kum 60 tluk nu 1, kum 40 luan nu 3 le motor khaltu pa 1 an nunnak a liam i, ngakchia telh in minung 7 hliamhma an pu, tiah theih a si. Motor pahsualnak hmun hi Salin peng ah a si i hliamhma pumi le a thimi hna cu Myothit sii-inn ah an kalpi hna, tiah theih a si. Credite; The Chin Post