A Si Kho Lo Cu A Si Lo, US Thimnak Ai Lim Rih Loh

Asi kho lo cu asi lo
===============
US thimnak ai lim rih loh. US media le Europe media tampi nih Biden nih a tei ko cang tiah an thanh nain official asi rih lo. Trump’s team an lung dong rih loh, an cawl cuahmah ko rih. Trump’s team nih voter fraud a um tiah taza an cuai mi hna cases 30 cu hnon piak an si. Cheukhat nih san a tlai ti lo, a sung pek ding asi ko cang, pandemic ruang ah hitluk harnak tuar lio ah rampi damnak tu ihmaithlak a hau cang an ti. Nain «legal strategy» tein an cawl peng ve ko rih. Trump’s team nih an cawl hnawh mi hi a si kho maw tiah cun a si kho lo cu a si lo, si khawh nak lam a um ve. Tlamtlin ding bel cu a har. Cu kong cu ka van ttial lai.

Tutan bantuk hi US election ah a um bal lo mi asi lo. Hnubik 2000 lio ah Al Gore le W. Bush lio ah a rak um ve i Florida State Electoral Votes kha an rak icuh ve. Tutan he cun buaibai ning ai dang deuh. Kha lio kha cu Florida State lawng asi pin ah mipi vote tlawmte lawng in ai dan caah US Supreme Court a lut colh i W. Bush nih teinak a co.

Nan theih cio bang in US election cu direct in presidential candidate kha vote pek siloin state kip aiawh tu 538 electors tu kha vote pek asi. State pakhat nih electors an ngeih mi zet tu cu an i dang cio. Tchnk ah Texas ah mipi votes in Republican nih a tei ahcun Texas electoral votes kha Republican nih ai lak dih tiin asi. Tutan hi voting process a hman lo, hrawkhrol le firpiak a um ti mi puhnak ruang ah state tam nawn ah voting reult kha certifying tuah kho loin a um. Trump’s team nih taza an cuai hna, evidence felfai a um lo tiin an hnon, tlawmpal ah cases an ttin tthan tiin a buai cur ko rih. Election result a fiang set rih lo mi le thimnak bia khiaktu ah ruah mi states cu; Michigan (Nov 23 ah cerfication an tuah cang i Biden tei an pek), Georgia (Nov 20 ah cerfication an tuah i Biden tei an pek, nain 0.2% lawng in an ithlau rih caah a voi 3 nak reltthan ding in Rep. nih an hal), Pennsylvania (zeitik certification tuah ding ai fiang rih loh), Arizona (Nov 30 ah certification tuah ding), Wisconsin (Dec 1 ah certification tuah ding).

Certifying tuah khawh rih lo mi state nih a ngeih mi electors hmang in election result kha mah duhnak lei ah result chuah ter kha an izuam mi cu asi ko. Phundang chim ahcun media nih Biden nih a tei ko cang tiah an thanh nain state 50 chung in electors 538 nih official in tei tu an thanh rih lo (538/2= 269 → 270 majority). Media pawl siloin electors 538 tu kha biakhiak tu cu an si i Dec 14 ah electors pawl nih an state cio in electoral college votes an thlak lai. Thil sining tawn ahcun an state cio ah mipi votes in teitu kha votes an pek ding khi asi (tutiang media thanh ninh ah Biden – 306 le Trump – 232) an si.

Si kun ah zeidah Trump’s team nih an hngah mi le an izuam mi a si kun? Trump’s team nih ruahchannak pakhat an ngeih mi cu; state pakhat ah ningcang loin vote pek a um i election felfai in ai tuah kho lo tiah ruah asi ahcun state legislatures (state authority) nih mipi votes in thim mi electors pawl kha hnon i anmah tein an duh mi electors thimnak nawl an ngei. Cucu US constitution nih a onh mi a si. Atu a fiang lo mi swing states pawl hi Republican nih a hip mi (Republican-dominated state legislatures) an si tik ah cu state legislatures cu hip khawh an izuam. Cucaah Republican state legislatures nih a mah tein electors thim sehlaw GOP electors (Republican electors) si hna sehlaw Dec 14 ah Trump lei ah electoral votes an thlak ahcun election result phundang in a chuak kho ko. Sinain state legislatures a hip khawh zong ah cubantuk a thar in thim mi electors fehternak ah governors hnatlak a hau ve. Republican tam deuh nak state zong ah cheukhat governors cu Democrats an si tik ah cu governors zong hip chih a hau i a fawi lo ngai ding asi.

Cupin ah state pakhat lawng asi lo i state tam nawn ah Republican state legislatures kha an thinlung tei bak a hauh caah a har ngai fawn. Asi kho mi pakhat a um rih. Dec 14 i electors pawl nih votes an pek tik ah state tam nawn nih a hodah state aiawh electors asi lai tiah an ithim khawh lo ahcun electoral assembly ah majority an tling ti lo. Cutik ah House of Representatives ah ceih a hau cang i cuka hmun ah vote in biachah a hau. House of Representatives ah Democrats nih palai tam deuh an ngei nain pumpak vote siloin state delegation in vote pek a hau cang. Asullam cu state delegation pakhat nih an dihlak aiawh in vote pakhat lawng thlak khawh asi cang. Cu state delegation votes ahcun Republican nih 50 chung ah 26 an ngei i majority vote a tling. Cuticun Trump nih election a teinak lam a um ve. Mah hi a si kho mi phunhnih langhter mi hi US phunghram chung ah a lut mi an si ko. Nain kum 240 chung US lection tuanbia ah a um bal rih lo mi asi caah asi kho ding cun zumh a um lo ngai.

Cucaah tutan US thimnak kong ah a biapi tuk mi nithla 2 a tang. Dec 8 hlan ah state dihlak nih election result kha certifying an tuah lai (official in thimnak reult an thanh lai). Dec 14 ah electors an itong lai i votes an pek lai i a fiang te lai. PS: US zong ah a um lo mi nih US election kong ttial lengmang hi nan ti men lai. Politics le political economy kong hi ka cawn mi he zong zeimawzet ai pehtlaih pin ah rel le dothlat ka huam phun ngai asi. Bible zong hi kum hnihthum tel cawn ve lo ahcun hrilhfiah phun hna cu chimrel a har ngai, cubantuk in political system zong hi semester pakhat tel cawn bal ve lo ahcun a cung pavuan deuh lawng khi theih asi ko. Credit:Sangukceu Zinhlawng