A ran khawh chungin phisin kan herh cang-Bangaladest

Ramhnih Buaibainak Hi Ceihhmainak Ngeih A Herh Cang-Bangaladest
==========================
Bangaladest ralkap ramri hngak le Myanmar ralkap hna karah a cang mi buaibainak hna cu a ran khawh chungin phisin khawh dingah ceihhmainak ngeih a herh cang tiah Bangaladest ramdang vuanci Masud Bin Momen nih a chim. A luancia mi thla thawh in SAC ralhrang hna i hriamnam ngan kuan Bangaladest ram chungah a tlaknak telin Cung lei dohnak kong he pehtlai in ramhnih karah buaibainak a chuah hi a si.

Cu tinin ram hnih buaibainak ruangah Bangalaset lei, Myanmar Ambassador U Aung Kyaw Moe cu a tu le tu in auh a si i cung lei vawnlawng in kahdoh ruangah thinphang thalo in an kan umter tiah a chim. ” Myanmar ramchung ah a um mi revolter (ပုန်ကန်သူ) pawl cu danpeek in tuanvo laak a si ko cuta,

Myanmar zong nih hi pawl zong cu a ccohlang ko hna.” ti zongin a chim. Rakhine ramkulh, Maungdaw thlang lei ah SAC ralhrang le AA karah kahdohnak a fak i SAC ralhrang nih an kah mi hriamnam ngan kuan cu Bangaladest ram a tlak bantuk in ramri lawnhin raltuk vanlawng zong a zuang tiah kan theih.

Relchap (Photo dang) ,Hindi Education Wing tuahmi “Orientation Training for Hindi Teachers” onnak tuah, Nihin chun suimilam 11:00AM ah LADC Conference HALL, LADC Office complex ah LADC tang Hindi cawnpiaktu hna caah 13-15 -22 Zing tiang Orientation Training thawk a si cang. Hi Training tuahnak ding hi Pu Andrew Laltlanzara EM i/c Education (MS) LADC nih onnak a ngeih.

Pu Andrew Laltlanzara, EM i/c Education (MS) nih cun, minung hi a cawng peng ding kan si, nihin ah hmunkip in Hindi cawnpiaktu hna zong nih Training hi tha te’n tuah dingin forhfialnak a ngeih hna. Hindi hi National Language a si bantukin LADC cozah zong nih biapi ah a chiah, Budget zong tuah in karhlannak caah hman a lak tawn, asinain rai nih rampum a buaihnawh caah caan sau hmala kho lo in kan um hnuah nihin ah hi tiang training Programme kan timhtuah khawh cu lawmh a um tuk.

Hi training nih hin thatnak in chuahpi hram ko hna seh tiah cah kan duh hna tiah a chim. Pi Van Bawi Tha Sung Cinzah, Dy.E.E.O(MS) zong nih bia a chim i, Hindi cawnpiaktu hna cu tha te’n training hmang dingin forhfialnak a ngeih hna i, Trainees hna nih theih herhmi zong a chim fawn. Training onnak caan hi, Pu Alex Lalzawmpuia Hindi Education Officer LADC nih a hruai , Resource Person caah Pu C. Vanlalmalsawma, Hindi Faculty,DIET, Lawngtlai nih cun Hindi cawnpiaktu training a pek hna lai.

Aizawl Ah Myanmar Mi Sinin Rithaisi (bingrang) Tlaih Than A Si!, Mizoram ramkulh, Aizawl, Zuangtui sang ah, nizaan September 12 ah, Myanmar mi sinin bingrang kan tlaih tiah, Mizoram palik nih an thanh. YMA nih rithaisi dohnak caah tiin an dirhmi phu, Central Anti Drugs Squad(CADC) hna nih an thanh ning ah cun,” Bawngkawng palik hna cu, nizaan September 12 zaantim ah, Zuangtui ah an ra i,

checkhlatnak an tuah tikah, Kalaymyo peng, Eisuak(အိပ်စွပ်) khuami, Mizoram Zokhuathar ah khua a sami pakhat sinin, bingrang 205 grams an tlaih tiah,” an chim. Bingrang an tlaihmi man cu, tulio thilman rate in, Rupees sing 100 man a si i, cu an tlaihmi pa cu, Bawngkawng palik sakhaan nih a herh ningin dantatnak an pek lai tiah, theih a si.

Falam khua SAC Ralkap Eidin Zuarmi A Cawtu An Tam!, Chin ramkulh, Falam khua Hall hmai ah, SAC kuttang um, General Administration le Municipal office zung riantuan tu hna I fonhin, nizaan September 12 zinglei sml 7 in eidin phun 16 an zuar i caan rau lo teah, an zuar khawh dih colh tiah, theih a si.

Sa cu market ah an cawk ko nain an cawknak man fawi deuh in an kan zuarh. Thilman a kai tuk lio ah hi ti bantuk man fawi tein an zuarmi hi cu, mipi hna lung i lawm sehlaw kanmah lei ah i fonh hna seh ti an duh caah man fawi tein an zuarnak hi a si tiah, khuami thil a caw ve mi pakhat nih a chim.

Voksa cuaikhat ah 12000 man kha 9000, in an zuar , arti pum 10 ah 3500 man kha 3000, Khachuan rang cuaikhat 3500 man kha 3000, khachuan sen cuaikhat 3000 man kha 2500 le Kalapee(ကုလားပဲ) cuaikhat 5000 man kha 4000 tiin man fawi tein an zuar tiah, theih a si.

Khuami pakhat nih cun, an zuar lioah cun, SAC nih security an lak piak hna i, SAC ralkap chungkhar hna zong nih an rak cawk ve caah, cawk ding hmanh hi kan i zaa hna lo, zinglei sml 7 in an zuar i sml 8 ah cun a dih colh cang tiah, khuami sinin kan theih. A luancia September 10 lio zongah khan SAC ralkap nih Hakha ah man fawi tein eidin an rak zuar bal cang.

Dawei-Htikhi Lam Kahdohnak Ah PDF Nih SAC Ralbawi 7 An Thah Hna! Tanintharyi ramṭhen, Dawei-Htikhi (ထားဝယ်-ထီးခီး) lam ah a luancia September 6 lioah Khah Lah Ya 265 in SAC ralkap pawl cu, PDF le Kawthu Lay ralkap i bawm in an kah hna caah SAC ralkap lei in ralbawi(Major) Naing Win Aung le a kuttang ralkap 6 an thi tiah, theih a si.

Myanmar-Thailand ramri Dawei-Htikhi lam cungah September 6 zanlei in SAC ralkap le PDF kahdohnak a chuak i, SAC ralkap Deputy Battalion Commander telh in ralkap 12 an rak thi. Tam lak hliamhma an pu i, hriamnam le zen-kuan zong tam ngai kan chuh hna, tiah Nway Oo Guerrilla Force nih cathanh an chuah.

Cu kahdohnak ah SAC ralkap lei in ralbawi 7 an thi. Cu hna cu: – ralbawi(Major) Naing Win Aung, Sergeant Tin Win, Deputy Sergeant Sai Kaw Hmu, Deputy Sergeant Zaw Win Htun, Deputy Sergeant Ye Kyaw Thu, Deputy Sergeant Kyaw Zeyar le Deputy Sergeant Khin Hlaing hna an si, tiah theih a si.

Cu kahdohnak ah 40mm telh in MA 3 meithal zun 4, 40mm bomb lung 11, kuan bawm 8, pistol zun 1, 60mm bomb lung 1, phummi bomb lung 1 le pehtlaihnak seh telh in SAC ralkap hmanmi thilri cheukhat kan lak tiah, PDF nih cathanh an chuah.

Butalin Peng Kahdohnak Ah PDF Ralkap 5 An Nunnak A Liam, Tualchung Mi 20 Leng Tlaih An Tong!, Sagaing ramṭhen, Butalin peng Pepyittaw(ပဲပြစ်တော) nichuah lei khua pawng ah SAC ralkap le PDF ṭangṭi phu hna cu, nihin September 13 ah kahdohnak a chuak i, PDF ralkap 5 an nunnak a liam, tiah theih a si.

Tatma(တပ်မ) 33 in SAC ralkap 80 hrawng nih Pepyittaw nichuah lei khuami 20 leng an tlaih hna pinah khuami inn 5 zong an khanghpiak hna. An tlaihmi hna chungin tam deuh cu nu an si, tiah theih a si. “SAC Ralkap an ra ti thawng kan theih i, lam in kan bawh hna lioah kan bawhnak lei in rat loin nichuah lei tu in an rat caah minutes 10 tluk hrawng kahdohnak a chuak i, PDF ralkap 5 an thih hi a si.

A thimi tam deuh cu kum 20 tluk an si hna. Cu chungah 2 lawng hi fiang tein kan hngalh hna, a dang 3 cu kan hngal rih hna lo,” tiah Butalin PDF ralkap pakhat nih a chim. SAC ralkap pawl cu Chaungmitu(ချောင်းမီးတို) khua lei ah rallam an sial caah Monywa-Butalin-Ye U lam cung ummi Natywa(နတ်ရွာ),

Tathlaing(တက်လှိုင်း), Pepyittaw nichuah lei khua le nitlak lei khuami a thong leng cu a himnak hmun ah an zam, tiah tualchung mi hna sinin theih a si. SAC ralkap nih Butalin khua cu internet line an phih i, rallam an sial caan ah phone line zong an phih, tiah theih a si.

Monywa Um, Ma-Oo(မအူ) Check Gate Kahdoh An Tong i, SAC Ralkap 5 An Thi! Sagaing ramthen, Monywa thlanglei Ma-Oo SAC check gate cu, nizaan September 12 zinglei ah, PDF tangrualphu hna nih hriamngan in an kah hna caah SAC ralkap le palik 5 an thi tiah South Monywa PDF in tuanvo ngeitu pakhat nih a chim.

“Cu SAC check gate cu, South Monywa PDF le tangrualphu 13 hna nih, 40 mm 27, 60 mm 10, 80 mm 7 le 120 mm 5 tiin hriamngan lung 49 in an kah hna tiah theih a si. SAC ralkap hna nih cun, hriamngan in voikhat lawng a kan kah khawh. Check gate i a ummi SAC ralkap cu an dihlak in an thi tiah kanmah sin thang petu pakhat sinin kan theih tiah,” South Monywa PDF in tuanvo ngeitu nih cun a chim chap.

Ma-Oo check gate i SAC ralkap hna cu, PDF tangrualphu nih faak ngaiin an tei hna caah, SAC motor pakhat a ra i, check gate pawng Ma-Oo khua ah an lut i hriamngan cu an duhnak hmun poh an kah tiah khuami hna sinin theih a si.
Khual tlawng, aa chokletmi mipi hna cu, phaisa an hal lengmang hna caah, cu SAC check gate cu PDF tangrualphu nih a tu le tu an kah tawn i , check gate pawng ah cun, SAC hna nih, i dupnak zong an i tuah tiah theih a si.

CDM Ralkap An Fale Cu KNU Lam Hruainak Thawngin Sianginn An Kai Cang! SAC ralkap an rianṭuan ning le an thil tuah a cohlang lomi CDM ralkap hna, an fale cu KNU bawmhnak thawng le lamhruainak thawngin sianginn an kai kho cang, tiah theih a si.

CDM tuahtu ralkap Sergeant Than Naing Oo a fale hna le CDM ralkap Hein Zaw a fale pathum Bung Pyi Hlian(Grade – 5), Chit Twin Eng(Grade-2) le Anh Bung Khant(KG) hna cu nihin September 13 in sianginn an kai kho cang, tiah CDM ralkap an nupi le sinin theih a si.

CDM ralkap chungkhar an fale sianginn an kai khawhnak dingah KNU nih ṭuanvo a laak hna i, CDM ralkap nupi le nih an fale cu zal, kedan le cacawnnak kongkau ah a herhmi thilri an pek hna, tiah theih a si.

Launglone Ah Pyusawhti Chungtel 4 Cu PDF Nih An Kah Hna Caah 2 An Thi! Tanintharyi ramṭhen, Dawei pengkomh, Launglone peng Inzaw le Panalay(အင်းဇော်,ပန္နလဲ) khua karah Pyusawhti 4 cu motor pakhat in an ra i, PDF nih an kah hna caah 2 an thi, 2 hliamhma an pu, tiah theih a si.

Vigo motor pakhat in a kalmi Pyusawhti 4 cu DDT-Companny 3 ralkap hna nih an kah hna i, kaphnih kar kahdohnak a chuak, tiah theih a si.”Lamhriang in kan bawh hna i kan kah hna caah Pyusawhti 2 an thi, an motor zong a taang. Caan tlawmpal chung kaphnih kar kahdohnak a chuak i, him tein hnu kan kir kho ṭhan,” tiah DDT-Companny 3 nih an thanh. Cu kahdohnak ah Pyusawhti hruaitu a nupi Ngio Win le a tupa(Pyusawhti) Naing Lin Aung an thi i, 2 cu Dawei sii-inn ah an thlopbul hna, tiah DDT sinin theih a si.

SAC Ralkap Kuttang Rianṭuantu Khuabawipa Cu PDF Nih An Kah Thah! Nizan September 12, ah Nan Hteik Aung(နန်းထိုက်အောင်) raltuknak tiin min kan pek i, SAC ralkap kuttang riantuantu Taungyarkan khuabawipa Maung Yu cu Palaw PDF ṭangṭi phu hna nih, Tinkanmaw le Shwelungaw(သင်္ကန်းမော်နှင့် ရွှေလုံးအော် ) karah kan kah thah, tiah cathanh an chuah.

“SAC nih nawlngeihnak an lak hnu in khuabawi a ṭuanmi a si. Pyusawhti chungtel pakhat a si pinah hriamnam zong a ngei. Sualnak tampi zong a tuah caah kan kah thah hi a si,” tiah PRDF in ralkap pakhat nih a chim. Khuaibawipa Maung Yu sinah kutcheh bomb lung 2, phone 1,

Wave i (125) cycle a rangmi 1, tangka kyats sing 9, registration card 8, WY rithaisii lung 8 le a tlang 1, condom tuah 2, sui kuthrolh 3, sii chunhnak le sii kan tlaih, tiah an langhter. Maung Yu cu ralkap a tla balmi phu ah hruaitu a si pinah CDM tuahtu hna le khuami hna cu a tlerh khawn lengmang hna, tiah PRDF nih an langhter.

Tamu-Aung Zeyar Motor Lam Ah Rithaisii A Hmangtu Pathum Le Zu Tam Ngai PDF Nih An Tlaih! Tamu khua in Aung Zeyar khua lei ah a kalmi motor pakhat cu, nizan September 12 ah PDF ni an lunghrinh hna caah checkhlatnak an tuah i, motor chungah tikhalkuang pakhat an hmuh i, cu chungah zu le beer tampi an hmuh, tiah theih a si. Zu le beer pawl cu SAC nih an chuahmi si loin SAC ralkap nih an cah hna i, an phorhmi hna a si caah PDF Battalion 1 nih kan tlaih, tiah cathanh an chuah.

Motor aa citmi khualtlawng mi hna cu PDF nih checkhlatnak an tuah hna tikah mino pathum sinin lungthin molhternak rithaisii an hmuh i, anmah hmuh lio ah rithaisii cu kan khangh dih. Hi hnu rithaisii hman ti lo ding in kan cawnpiak hna hnuah kan thlah ṭhan hna, tiah an langhter.

SAC nih an chuahmi thilri, an kuttang mi nih an phorhmi thilri, phung ning loin thing hau, phung ning loin caw le naa zuar, rithaisii hman le phung ning loin rianṭuan i, hmuhmi tangka hna cu kan dohmi a si caah na tuah hrimhrim lai lo. Cuti nan tuah kan in theih hna le kan in hmuh hna ahcun phung ning tein dantat nan si lai, tiah PDF Battalion 1 nih an langhter. Crd-The Chin Post